الف توں پہلے
معروف شاعر ساجد علی پوری دی کتاب (الف توں پہلے) دے اندر ہک جھات سب توں پہلے سئیں علی پوری دی نظم ماں بولی دا درشن آخری 6 لائناں جیڑھا کجھ اج الینداں میں میڈی اماں دی بولی ء میڈی بولی زمانے ءچ جیویں شفقت ونڈیندی اے میکوں لگدے میڈے اندر میڈی اماں الیندی اے۔۔۔۔ شاعری شعور دل دماغ تے دور پرے توں کئو امدی ہے یار دے پاسوں جیرہی عرشوں لاہندی ہے ایندا ناں ملاں دے خوف کنوں وجدان پے لکھدوں اے سارے سنگ سمولے تھی نظماں لکھدن شعر بنڑیندن پیار دے قصے عشق دے حصے من موہنڑیاں سوہنڑیاں غزلاں لکھدن جیرہی شاعری ءچ دھرتی ما ء دا ناں کینی ماں بولی دی چھاں کینی مظلوم مقامی لوگیں دا زکر نہیں او شاعری یتیم اے لاوارث ہے انات ہے ایں گالہوں ساجد سئیں دی کتاب الف توں پہلے وڈی بھاگ وند تے صاحب اولاد ہے اے کتاب اپنڑے( ناں الف توں پہلے ) دی وجہ کنوں پر اسرار ہے میڈے اندر دا صوفی مچل گئے جو میں (الف توں پہلے) دے معنی و مفہوم خلق خدا کوں ڈسینداں عقل آکھے متاں ملاں ماری بلھے شاہ دا پاسا گھن ونج اوتوں شعر ادھارے منگ چا جیویں سئیں فرمائے اساں الف توں پہلے ہاسے اساں الف کوں آپ ٹھہایا بیا ہک مصرعہ پٹھانے خاں اہدا ہا کن فیکون تا کل دی گالھ ہے اساں پہلے پریت لگائ کتاب دے ورقے ورقے تے جہان آباد ہے کتاب دے وچ چندر ہن تارے ہن پکھیاں دے چلکارے ہن صحرا ہن بلدے ہوے تھل ہن اتنا وسیع ہن جو قیس "مجنوں ڈیکھے تاں خوف کھاوے تے ساجد سئیں سرکار دے ID دے اتے عشق لیلہ توں فراغت دی پوسٹ لاوے کتاب دے اندر دریا پتن ،واہ وہیرے ،جنگل ،جھڑ تے برساتاں کالیاں شمور گنگیاں راتاں کتاب دے اندر لکھ مسیتاں ہزار مندر تے ملوک لفظیں دا منہ تار سمندر ۔۔۔۔۔ کتاب کیا ہے ؟ ہک بجھارت رازیں بھری پوتھی ۔۔۔ ایں کتاب وچ قلندری ہے پئ جیکوں راس آوے سکندری ہے پئ ۔۔۔ ہیندے اندر خزاں ہے پئ بہار ہے پئ ۔۔سئیں ساجد لفظیں دی پرشاد ونڈاوے ہر ہک گھر رے اندر اکھریں دی سوغات پچاوے ۔۔ ساجد سوچیندے پہلوں الیندے بعد اچ ۔۔ہیندی شکل نہ ڈیکھو ہیندے لفظ پڑھو۔۔ہیندے مصرے ڈیکھو۔۔
طلب دا یوسف بزار آوے کہیں زلیخا کوں پیار آوے
یا اے لائن ڈیکھو اجاں تماشے کوں ڈھیر دیر اے ہیندیاں نظماں "سارا خدا صرف میڈا" "ہے کون آخر" شاعر دے شعور دا چشم دید گواہ ڈو لائناں پڑھو۔۔۔
ڈیکھ تاں سہی زمانے دی مستک اتے کتنے لہور دے لگے سرخ چھٹے کھڑن۔۔ میڈا غافل قلم آں ذرا جاگ ہن ورق تاریخ دے ڈھیر چٹے کھڑن۔۔ عزیز شاہد تے نظم لکھ تے میڈا ہاں ٹھاریس۔۔۔ نظم "مٹھا خواب" ہر سرائیکی سوجھوان کوں زبانی یاد ہوونی چاہیدیے۔۔ میڈا خیال اے میں قاری دی خاطر وی کجھ بچاواں یکی کتاب میں نہ سناواں ۔۔میڈی سک نئیں لتھی میں ساجد سرکار دا لفظ لفظ پڑھساں رب دی طرفوں زبان مل گئ تاں میں الیساں نہ تاں کاغز قلم تے مس ہے پئ۔۔۔۔۔۔تے نال لفظیں دے میڈی چس ہے پئ۔۔میں لکھساں ساجد دی دائ. (تاج محمد گوپانگ)