اقبال میاݨہ

اصل ناں       محمد اقبال

قلمی ناں        اقبالؔ میاݨہ

ڄمݨ            1956ء

تعلیم            مڈل

پیشہ            کاشت کاری

فون نمبر         0303 9213148

          جاہ پتہ          قصبہ دُلّے والا ضلع بھکر

دُلیّ والا ضلع بھکر نے کئی سرائیکی شعراء پیدا کیتے ، جنہاں اچوں سونا خان بے وس دلے والا دی پہچان بݨیے ،تے ملک گیر شہرت حاصل کیتی ۔ایویں دلے والا دے واسی ہک خوبصورت لبٖ و لہجے دے شاعر اقبالؔ میانہ وی ہِن جیڑھے ݙوجھیاں صنفاں دے نال نال غزل وی خوبصورت لکھدن ۔ نمونہ کلام پیشِ خدمت ہے۔

غزل

جڳارے رات ساری دے نواں ہک روڳ لا ویندن

عجب جھئیں کجھ خیال آندن ولا یاداں ݙیوا ویندن

اساں جذبے جوانی دے کتھئیں تاں چھوڑ آئے ہیں

زبان ہُݨ ساتھ نئیں ݙیندی قدم وی لڑ کھڑا ویندن

جگر دے زخم سیوݨ تھوں فراغت وی نسے ملدی

جیڑھے زخماں نوں سیندا ہاں اُدھڑ اوہے ولا ویندن

کوئی ݙکھ ہے حیاتی دا نہ ہک لحظہ اَرام آندے

نہ ساہی درد ݙیندے ہن ، نہ ساہواں نوں مُکا ویندن

اساں اقبال ہُݨ سمجھے جو سچے خواب نئیں ہوندے

جیڑھے جتنے قریب ہوندن اوہے تھی بے وفا ویندن

غزل

میں کیا آہداں تھیندا ہے کیا آہدیں آہدیں

سزا مل ڳئی ہے جزاآہدیں آہدیں

کہانی وفا دی مکمل کتھائیں نئیں

اتھاں لوک مر ڳئے وفا آہدیں آہدیں

جہڑا کل ݙسیندا ہا مئے ناروا ہے

اُسے اڄ ہے پیتی روا آہدیں آہدیں

میں عتبار کر کے زہر پی ڳیا ہاں

طبیباں پلئی ہے دواآہدیں آہدیں

مریضِ محبت اتھائیں آ کے مر ڳئے

پیالے کوں ہونٹھاں تے لا آہدیں آہدیں

میں اقبال سجدے تاں کئی وار کیتن

مگر بھُل ڳیا ہاں دعاء آہدیں آہدیں