افضل چوہان

اصل ناں    محمد افضل

قلمی ناں    افضلؔ چوہان

جٖمنْ        1960ء

جاہ پتہ     مظفر گٖڑھ شہر

افضل چوہان سرائیکی زبان دا شاعر ہے۔شعری مجموعہ’’  ہنجھ دا سیک‘‘ تے بٖیا کئی کتاباں دے مصنف،ہر لعزیز شخصیت دے مالک تے حضرت مخدوم غفور ستاری مرحوم دے لاڈٖلے شاگرد افضلؔ چوہان اردو تے سرائیکی دے کہنہ مشق شاعر ہن ،آپ دے شاعرانہ تخیلات دی پرواز بلند تے مشاہدہ بٖہوں تیز ہے۔

کتاباں

• ہنج دا سیک

کلام تے تبصرہ

طاہر تونسوی لکھدن:

افضل چوہان دی غزل دی بہوں خوبی ایہ ہے جو اوندے وچ عصری شعور تے آگہی وی ہے۔ تے نویں دور دے مسائل دا ادراک وی۔ تے اے موضوع اوندے شعراں وچ ݙھل تے سامنے آ ویندے تے ایں طرح اوندی غزل وچ اوندا شعری تے فکری تجربہ واضح تھی کرائیں سامنے آندے البتہ ہک خوبی ایہ ہے جو غزل دی روایت نال اپناں تخلیقی عمل اڳوں تے ودھیندے”

پروفیسر عمران میر لکھدے ہن:

ہنجھ دا سیک”ہنجھ دا سیک اجوکے عہد دے ہر قسمے رنگاں دا اینجھا البم ہے جیندے وچ پورا وسیب اپنے خال و خد سودھا ‘آپنے ڳناہ ثواب سودھا پوری جزیات دے نال موجود ہے۔افضل چوہان ہنجھ نال آپنی وسوں اتے وسوں واناں دیاں تصویراں بنائن اتے ہر تصور لاتھی کہانی کوںشاعرانہ سلیقے نالب بیان کیتے اتے اے وی ݙسیے جو اے کہانی ساݙی آپنی ہے’مانگویں نی۔افضل چوہان شالا ایہو جیہاں تصویراں بݨیندا رہ ونڄے

نمونہ کلام

ݙو شعر

نہ جنگل نہ بَر کوں پھول

ہُن توں آپ کو آپ اچ ڳول

پہلے عشق سمند رجھاڳ

ول اسرار دی ڳنݙھڑی کھول

ہک شعر

ولا منصور بیٹھا ضد کریندے

بیا جھوٹا ولا ہک کھانونا ہے

غزل

عشق کوںظاہر کرا ں یا آپ کو بے گھر کراں

تُوںݙسا کیویں ہمالہ ذات دا میں سَر کراں

پتھراں کو موم کیتم ایہ تا ہا وس وچ میݙے

ہُن ݙسا میں موم کوں کیوں ولا پتھر کراں

چوراں دے دل چھوٹے ہوندن

ٹھڳاں دے دل وݙے ہوندن

غاصب دا دل ہوندا کائنی

غزل

منہ کالا تھئے ڳُت مُنی

میں عشق اچ کے تئیں پُنی

میݙیاں لیر کتیر پوشاکاں

میݙی لیر لویراں چُنی

میکوں ساڑے ہجر حشر وچ

ڳئی درد دے سیک اچ بھُنی

پندھ رات اندھاری جنگل

میں ایویں تا نَیں رُنی

کافی

کراں پُھل تعویذ وسیلے

متاں یار ملم کہیں حیلے

اساں تتڑی روہی جائے

ساݙے اندر ٹبڑے ٹیلے

اساں ݙیلھے لال کرینہ دے

اساں ساوے رتڑے پیلے

اساں بویاں ببلیں جالیں

ساݙے رنگ بہوں بھڑکیلے

سب سنگتی ساتھی ٹُر ڳئے

ودا افضل آپ کوں گھیلے