افتخار غالب

اصل ناں      افتخار احمد

تخلص        غالبؔ 

جمن          1969ء   

تعلیم         ایم اے اردو ،سرائیکی

پیشہ         ٹیچر   

فون نمبر       03007486748

جاہ پتہ        علی پورضلع مظفر گڑھ

افتخار غالب علی پور دا نمائندہ شاعر ہے۔توڑے جو فی الحال انہاں دا کوئی مجموعہ کلام منظر عام تے نہیں آیا پر ول وی انہاں دا ناں پورے سرائیکی وسیب اچ نشابر ہے۔ایہا ای وجہ ہے جو اوہ ہک پختہ کار ، کہنہ مشق شاعر ہن، انہاندے تخیّلات دی پرواز بلند تے مشاہدہ بہوں تیز ہے۔اوہ ہر بندے دا چہرہ پڑھ کے جیڑھا تاثر گھندن تے جو کجھ محسوس کرندن۔اوندا اظہار شعری پیرائے وچ کجھ ایں طرح کریندن تے آہدن۔

میں کہیں منگتے دے چہرے تے پڑھاں تحریر کمب وینداں

زمانے کوں میڈی کیوں بے وسی محسوس نئیں تھیندی

بہر حال افتخار غالب اپنے ہم عصر شعراء وچ اپناں ہک خاص مقام رکھدن۔تے غزل دے حوالے نال خوبصورت غزل لکھدن۔

(1)غزل

نکھڑ کے میں توں مزاج شاہی دی ہر ادا کوں سنبھال رکھیں

عروج تے پُج گیا ہیں جیویں تاں انتظارِ زوال رکھیں

قدم قدم تے الوچ دل دے ملوک جذبے خراج منگسن

نواں مسافر ہیں دل سنبھالیں سجاک سوچیں کوں نال رکھیں

انا دی مستی کڈاہیں تیکوں نہ واپسی دی دلیل ڈیسی

مگر توں مونجھاں لُکا کے چہرے دی مسکراہٹ بحال رکھیں

ہجر دا توں وی شکار تھیسیں اے پہلے پچھلے پہر دی کھیڈِ

اے انتظاراں طویل ہوندین توں ڈیوے اکھیں دے بال رکھیں

میں ڈھیر مدت دے بعد روندے ہوئے دل کوں آخر وندال آیا

تے توں نکھیڑے کوں لیکھ سمجھیں نہ دل دیوچ کوئی ملال رکھیں

خدا کرے جو کڈاہیں تئیں توں خیالِ غالبؔ جدا نہ تھیوے

وصال رُت اچ ہجر دے ماریئے بے آسریں دا خیال رکھیں

(2)غزل

میڈے الفاظ گنگے ہن، میڈی گفتار زخمی ہے

انا میڈی مدامیں توں میڈا دلدار زخمی ہے

اے تیر انداز دنیاں ہے ،ایندی زد وچ شرافت ہے

تے ہر دستار والے دی اِتھاں دستار زخمی ہے

خوشامد کر کے پُج گیا ہیں توں خود غرضی محلیں وچ

تیڈا کیا یار کہیں گھر دی جیکر دیوار زخمی ہے

پکڑ میڈے نہ چولے کوں زلیخا ! میں نہیں یوسف

میڈی تہذیب ننگی ہے میڈا کر دار زخمی ہے

ڈکیٹیاں قتل تے عزتیں دی نیلامی نظردی ہے

میڈی دھرتی ہے ستّی ہوئی یا پہریدار زخمی ہے

کیویں پِٹ دھاڑ کئی میڈی پُجے دربار تئیں غالبؔ

میڈے دل دے تنبورے دی جو ہر ہک تار زخمی ہے

٭٭٭