اصغر ثاقب

اصل ناں       غلام اصغر

قلمی ناں        اصغر ثاقبؔ

جٖمنْ            1964ء

تعلیم            پرائمری

فون نمبر        0344 3674372

جاہ پتہ         چاہ جکھڑ والا موضع کوٹلہ تحصیل کوٹ ادو ضلع مظفر گٖڑھ

اصغر ثاقبؔ اپنْے زمانے دے معروف شاعر عاشق حسین کھنڈویہ (مرحوم)دے شاگرد ہن، استاد دی وفات دے بعد اپنْے استاد بھائی فقیر عبد الرحمٰن اخترؔ نال وی مشورہ سخن کریندے رہ گٖئین۔شاعری دے نال نال ثاقبؔ صاحب 1989ء کنوں تقریبََا 2014ء تک موسیقی نال وی وابستہ رہ گٖئین۔لیکن اجٖکل صرف شاعری کریندے پئین۔ بقول اصغر ثاقب ؔ کجھ سرائیکی ادبی تنظیماں دی طرفوں ایوارڈ وی حاصل کر چکے ہن۔نمونہ کلام حاضر ہے۔

غزل

سوچ سیانْی کنتے گٖئی ہے

من کوں بھانْی کنتے گٖئی ہے

لوک ڈٖسیندن پیت پرانْی

پیت پرانْی کنتے گٖئی ہے

غربت دا گٖل چولا پاکے

پیرو رانْی کنتے گٖئی ہے

بُکھے بٖال سما کے روندی

درد رنجانْی کنتے گٖئی ہے

عقل سلیم دی ملکہ ثاقبؔ

روپ دی رانْی کنتے گٖئی ہے