استاد کریم بخش واجب
اصل ناں کریم بخش
تخلص واجبؔ
جمن 1954ء
تعلیم میٹرک
پیشہ ریٹائر ملازم (واپڈا)
فون نمبر 0345 7123659
جاہ پتہ شیخو شوگر مل روڈ سنانواں تحصیل کوٹ ادو ضلع مظفر گٖڑھ
کریم بخش واجبؔ دا شمار ضلع مظفر گٖڑھ دے استاد شعراء وچ تھیندے ،آپ ہک مشاق شاعر ہن۔ میکوں یاد ہے 5اگست 2017ء کوں کوٹ ادو وچ ہک طرحی مشاعرہ تھیندا پیا ہا ، جیندے طرح مصرعہ تے شعراء دے درمیان سخت مقابلہ ہا ۔اللہ دی مہر بانی نال ایں مقابلے وچ واجب صاحب پہلی پوزیشن حاصل کیتی ہئی، تے آپ کوں ایوارڈ پیش کیتا گٖیا۔واجب صاحب جتھاں ہک اچھے شاعر ہن اُتھاں ہک بٖہوں اچھے انسان وی ہن۔ آپ نے جئیں ویلے اپنْاں کلام تے کوائف میڈٖو بھیجٖے تاں نال ہک خوبصورت پیغام وی بھیجٖا ،جیڑھا جو نذرِ قارئین ہے۔’’وڈٖے دا احترام ،چھوٹے تے شفقت تے ہر انسان نال محبت کرو!‘‘ایہ پیغام آپ دے اندر دا ترجمان ہے ۔تے ہُنْ واجب صاحب دی غزل دا نمونہ پیشِ خدمت ہے۔
(1)غزل
[لکھو | ماخذ وچ تبدیلی کرو]خدا جٖانْے میڈٖے بارے میڈٖی جند جان کیا آکھئے
میں بچداں یا نمہی بچدا میڈٖے لقمان کیا آکھئے
اوندا تکرار تے جھیڑا میڈٖے ساہ نال رہ ویندے
خبر نئیں ڈٖو جٖہاڑیں دے میڈٖے مہمان کیا آکھئے
اے کون اَہدے جو نئیں سُنْدا نہ بھوئیں تے بٖہہ کے شکوے کر
دعائیں محفوظ ہن تیڈٖیاں بٖیا اسمان کیا آکھئے
سُنْیا تاں ہے مگر سُنْ کے کہیں محسوس نئیں کیتا
میڈٖی تحریر کیا آکھئے ، میڈٖے عنوان کیا آکھئے
زمانہ اجٖتلک واجبؔ جیکوں گونگا سمجھدا ہا
کھڑے اسمان سر تے چئی ایکوں میں خان کیا آکھئے
(2)غزل
[لکھو | ماخذ وچ تبدیلی کرو]کون ئِ جیڑھا در کھڑکیندے کیا اَہدے
تیکوں نندروں آن جگٖیندے کیا اَہدے
کیوں او اپنْی نندر ونجٖا کے ساری رات
تیکوں نال جگٖارے ڈٖیندے کیا اَہدے
چارے پاسے تُر تُر ڈٖہدے ڈٖیکھ کے تیکوں
بٖولنْ کیتے تھوڈٖ جُڑیندے کیا اَہدے
توڑے یکدم توں تاں اوندے نال ودیں
ول وی تیڈٖا خفت مریندے کیا اَہدے
کون ئِ واجبؔ آخر اوندا مسئلہ کیا ہے
تیکوں تاں ہر گٖال ڈٖسیندے کیا اَہدے
؎میڈٖے صبر دا تے اپنْے شر دا ڈٖسا ہاں کیڑھا جواب ڈٖیسیں؟
اکھیں دے ساحل تے آ کے واجب ؔ جڈٖاں کریسن سوال ہنجوں
٭٭٭