استاد نذیر فیض مڳی

1945ء تا۔۔۔۔۔

استاد نذیر فیض دا تعلق مگٖی قبیلے نال ہا اوہ 1945ء کو ں کوٹلہ شیر محمد وچ ملک خدا بخش دے گھر پیدا تھئے۔پرائمری کوٹلہ وچ ، تے میٹرک دا امتحان فاضل پور توں پاس کیتا۔ایندے بعد عشق و محبت دا فطری جذبہ پیدا تھیا تاں شعر و شاعری شروع کر ڈٖتی ۔ تے تعلیم مکمل طور تے چھُٹ گٖئی۔شاعری دے حوالے نال آپ ہک ترقی پسند تے مزحمتی شاعر ہن ۔استاد نذیر فیض دی ساری حیاتی ڈٖکھی انسانیت دے ڈٖکھ درد ونڈاونْ تے مونجھے ماندے لوکاں دیاں مونجھاں مٹاونْ اچ گزری۔اوہ ہک فراغ دل سخی انسان ہن۔ انہاں دی وساخ تے سارا ڈٖینہ دوست احباب دے آنونْ ونجٖنْ آلیاں دی دھمڑ چوک لگٖی رہ ویندی ہئی۔لنگر ہر ویلے چلدا رہ ویندا ہا۔

(1)غزل

تیڈٖا نام نشابر جگٖ تے تیڈٖی ذات سنجٖاپوں

رب نہ بخشے جیکر جانی گٖالھ کراں کئی آپوں

کہں ویلے کیا سُدھ ہے ساکوں سیت رنجیپا ڈٖیوے

ہاں تے لیکوں مورت تیڈٖی دل اپنْے تے چھاپوں

زاری، جیکر تیڈٖی قامت کہیں دے سانویں جٖانْوں

کلہیں بٖہہ تے تولوں تیکوں ، کلہیں بٖہہ تے ناپوں

پوہ دا پورھیا ، ہاڑھ دی محنت غیر نہ لیکھے لاوے

رل مل جانی ایکا کر تے اپنْی رادھی لاپوں

دوروں بٖہہ تے کیہیں جھیڑے، آہُنْ وسوں نیڑے

پرے رہ تے ہک ڈٖوجھے تے مفتے کوڑ نہ تھاپوں

فیضؔ قیامت تانْیں تیڈٖے خواب سلامت رہسن

تیڈٖا نام نشابر جگٖ تے تیڈٖی ذات سنجٖاپوں