اساں شاعر کوݨ

اساں شاعر کونڑ ہیں؟ کہیندے کیا لگدے ہیں؟ کہیں کوں کیا ڈیندے ہیں؟ جو ساکوں سنڑنڑ ڈھیر سارے لوگ آندن، داد ڈیندن، رات جاگدن، ساکوں مل کے خوش تھیندن تے ساڈے نال تصویر بنڑاونڑ آپڑیں کیتےاعزاز سمجھدن. ایہو جئے ڈھیر سارے سوال اکثر میڈے ذہن دے خلا وچ پر مریندے رھندن تے جواب ہکو ای ملدے جو انہاں لوکاں تے ساڈے وچ ڈھیر ساریاں شئیاں ہکو جئیاں ہن اساں ہکو جئے ہیں ساڈے ڈکھ، درد، غم، خوشی، خواب تے ول خواب دی تعبیر، بُکھ، تس، رزق تے رزق دے رولے، بے وسی تے وس دا وس وچ نہ ہوونڑ، کرب تے اوندی چس، پیار، پریت، جی پریت، ساہ سلوک، بہونڑ کھلوونڑ، وچھوڑے، کھانونڑ، پینونڑ، میل ملاقات، شادیاں، رسم، ریت، رواج، تے ایہو جیاں ڈھیر ساریاں شئیاں ساڈے تے ساڈے سُنڑنڑ آلاں وچ ہکو جئیاں ہن تے ساڈے وچ کوئی ذات پات، امیر، غریب تے رنگ و نسل دی برتری ناں دی کوئی شئے کوئی نی ہوندی تہوں اساں ہک ڈوجھے نال مل کے روحانی تسکین تے شانتی محسوس کریندے ہیں. میں اکثر دوستاں کوں آھدا رھنداں جو ایں دور وچ ہکو رشتہ ہے جہڑا کہیں وی ملاوٹ تے لالچ توں پاک ہے تے او رشتہ "لفظ" دا رشتہ ہے تونڑیں شاعر ادیب ہوون یا انہاں دے سامعین تےقاری ہوون بغیر کہیں لالچ دے ہک جا تے بہہ تھیندن تے ہک ڈوجھے دے ڈکھ درد ونڈنڑ لگ ویندن.

ایہو جئیاں محبتاں دا اظہار ظفر عدم تے کروڑ لعل عیسن دے لوکاں میڈے نال کجھ ڈینھ پہلے کیتے. بطور شاعر میں اے سمجھینداں جو میں ہالیں سکھنڑ دے عمل وچوں گزردا پیاں دوست میڈی اوقات توں ودھ محبتاں دا اظہار کریندن تاں اے گالھ کہیں کہیں ویلے میڈے کیتے امتحان دی شکل وی اختیار کر گھندی ہے تے انہاں دیاں محبتاں دے اگوں میں آپڑیں آپ کوں بہوں چھوٹا محسوس کرنڑ لگ وینداں.

ظفر عدم میڈے نال شام رکھ کے میڈے تے ہک احسان اے وی کیتے جو اوں تقریب دی صدارت مرشد اشولال فقیر کیتی جہڑی میڈے کیتے کہیں وی وڈے توں وڈے اعزاز کن گھٹ کئے نی اتھاں جتنے وی مہمان تے سامعین آئے ہن ساراں دا دلوں نیاز مند ہاں، شعراء جہڑے شریک تھئے ہن انہاں دے آونڑ نال میڈا مانڑ ودھ گیا ہے. انہاں دا وی ممنون ہاں.

جناب افضل عاجز، سلیم شہزاد، مظہرنیازی، تنویر خالد، مفتی عمران خان، قیوم خان، اختر مجاز، شاہد بخاری، ندیم بخاری، اختر مجاز تے نسیم بخاری تاں میڈے آپڑیں ہن تے انہاں دا شکریہ ادا کرنڑ کوئی مناسب گالھ نئیں. ھا...... انہاں نال سفر کرڑاں میڈے زندگی دے سوہڑیں وقت وچوں ہک اے جیا وقت ھا جہڑا میں چاہواں تاں وی ولا نی سکدا کیوں جو سوہڑیں ویلے کڈاہیں ول کے نئیں آندے.

محمدظہیراحمد مہاروی