Jump to content

اخی اب

وکیپیڈیا توں
اخی اب

آخیاب یا اخی اب سلطنت اسرائیل دا ستواں بادشاہ، عمری دا بیٹا تے آخزیاہ دا پیو ہئی۔ 918 قبل مسیح وچ تخت نشین تھیا۔ ایں دا ناں مشاہیر تاریخ وچوں ہے۔ اوں دے زمانے وچ سلطنت اسرائیل بت پرستی دی طرف مائل تھی گئی۔ بت پرستی کوں تحریک ݙیوݨ والی اوندی بیوی ایزابل جیہڑی ہک فنیقی بادشاہ دی بیٹی ہئی۔ ایہ عورت فنیقیاں دے دیوتا بعل زبول دی پوجا کوں بڑی تیزی نال فروغ ݙیندی پئی ہئی۔ چنانچہ اوں نے سمرون وچ جیہڑا اسرائیل دا نواں پایہ تخت ہئی، ہک مذبح تے ھیکل اوں بت کیتے تعمیر کروایا۔ آخیاب نے ٻاویہہ سال حکومت کیتی تے 898 قبل مسیح وچ ہک جنگ وچ مارا گیا۔

حکومت دا دور[لکھو | ماخذ وچ تبدیلی کرو]

تواریخ بائبل وچ لکھا ہے کہ اوں دے زمانے وچ ایلیاہ (الیاس) نبی ہن۔ جنہاں نے آخیاب کوں اس دی بت پرستی دی وجہ نال بارش نہ تھیوݨ دی بددعا ݙتی تے مکمل ترئے سال تک خشک سالی رہی۔ اوندے بعد خدا نے بارش عطا کیتی تے ایویں ایلیاہ کوں آخیاب تے فتح حاصل تھئی۔ لیکن ایزبل دے حسد تے غصہ نے ایلیاہ کوں ہجرت تے مجبور کر ݙتا تے اوہ سینا دی وادیاں دی طرف چلے گئے۔

تفہیم القران وچ مولانا مودودی لکھدے ہن کہ اوں موقع تے الیاس علیہ السلام نے جیہڑی دعا منگی، اوں دے الفاظ ایہ ہن۔ "بنی اسرائیل نے تیݙے عہد کوں ترک کیتا۔ تیݙے نبیاں کوں تلوار نال قتل کیتا۔ ہک میں ہی کلہا بچا ہاں۔ سو اوہ میݙی جان گھنݨ دے درپے ہن۔" (سلاطین باب 19، آیت 1۔10)

ہیں اثنا وچ آخیاب دی توجہ مذہبی معاملات توں اٹھ کے سلطنت دی حفاظت دی طرف مبذول تھی گئی۔ بن ہدو شاہ آرام ول ایں مملکت تے حملہ آور تھیا۔ اوندے جھنڈے تلے ٻتریہہ بادشاہ موجود ہن۔ اوں نے سمرون دا محاصرہ کر گھدا تے آخیاب کوں اطاعت کرݨ دا ہک ناشائستہ پیغام بھیجا۔آخیاب نے غصے وچ اینکوں رد کر ݙتا۔ گھمساݨ دی جنگ تھئی تے بن ہدو نے شکست کھادی لیکن ݙوجھے ہی سال بن ہدو ول حملہ آور تھی گیا۔ ایں وار اوہ پہاڑی علاقے توں کنارہ کش تھی کے اسدرلان دے میدان وچ خیمہ زن تھیا۔ بہت زور و شور نال جنگ تھئی تے بہت سارے آرامی کم آئے۔ بن ہدو مجبور تھی کے آخیاب دے سامݨے جھک گیا۔ لیکن آخیاب نے غلطی کیتی تے اونکوں معاف کر ݙتا۔ اوہ تریجھی وار رامات جلعاد دے مقام تے نمودار تھیا جیہڑا اردن دے مشرقی کنارے تے واقع ہے۔ آخیاب نے اپݨے ہمسایہ شاہ یہوداہ یہوسفط کوں وی لڑائی وچ شریک تھیوݨ تے اکسایا۔

زوراں دی جنگ تھئی۔ آخیاب ایں جنگ وچ مارا گیا۔ تے اردن دی انہاں اطراف وچ بن ہدو نے جو چاہا سو کیتا۔ تواریخ بائیبل دی اطلاع دے مطابق آخیاب دے ستر بیٹے ہن جیہڑے سمرون دی ایں جنگ وچ مارے گئے۔[١]

حوالے[لکھو | ماخذ وچ تبدیلی کرو]

  1. شاہکار اسلامی انسائیکلو پیڈیا- ص 8-9، ج اول ۔از سید قاسم محمود، عطش درانی- مکتبہ شاہکار لاہور