ابو ہبیرہ بصریؒ

خواجہ امین الدین ابوہبیرہ بصریؒؒ، سلسلہ چشتیہ دی ہک اہم شخصیت ہن۔ اکثر مشائخ نے صرف ہبیرہ ہی انہاں دا ناں لکھا۔ بعض ابو ہبیرہؒ آہدے ہن. انہاں دا لقب امین الدین ہئی۔ ابو ہبیرہ بصریؒ دی ولادت 167ھ وچ تھئی. انہاں دا تعلق بصرہ نال ہئی تے اکابر وقت وچوں ہن۔

حالات زندگی

ابو ہبیرہؒ ستارہاں سال دی عمر وچ علوم ظاہری توں فارغ تھئے. بعد وچ حذیفہ مرعشیؒ دے مرید و خلیفہ اعظم بݨے۔ ہر روز ݙو وار قرآن ختم کریندے. حذیفہ مرعشیؒ دے مرید ہووݨ توں پہلے آپؒ نے تریہہ سال ریاضت شاقہ وچ گزارے. مجاہدہ و ریاضت وچ بے مثال ہن. ہک ݙینہ زارو قطار روندے پئے ہن کہ ہاتف غیبی توں آواز آئی، اساں تیکوں بخش ݙتا. حذیفہ مرعشیؒ دی بارگاہ وچ ونج. مرید تھیوݨ دے بعد ہک ہی ہفتے وچ مقام قرب حاصل تھی گیا تے ہک سال بعد خلافت ملی۔ جیں ݙینہ خرقہ خلافت عطا تھیا، انہاں دے ناں توں ہک شاخ تصوف وی نکلی جینکوں ’’ ہبیریہ‘‘ آکھا ویندا ہے. انہاں دے بہت سارے خلفاء ہن. سب توں زیادہ مشہور ممشاد علوی ہن۔ جیں ݙینہ خلافت ملی اوں ݙینہ توں نمک تے شکر ترک کر ݙتی تے لذت کام و دہن توں دست بردار تھئے. آپؒ اس قدر روندے ہن کہ بعض اوقات حاضرین کوں اندیشہ ہوندا کہ آپؒ فوت تھی ویسن۔ ہک سو ویہہ سال تک زندہ رہے۔ ہمیشہ باوضو رہندے ہن۔ بلا ضرورت گفتگو نہ کریندے ہن تے اللہ دے ذکر وچ مشغول رہندے ہن۔ آپؒ صاحب عالی کرامات ہن.

وفات

ابو ہبیرہ بصریؒ دی وفات 7 شوال 278ھ کوں تھئی. بعض جگہ 287ھ ہے. انہاں دی عمر ١٢٠ سال ہئی ۔