ابراہیم گاردی

ابراھیم گاردی مسلماناں دا ہک سردار تے مرہٹہ فوج دا توپچی ہئی۔

اکتوبر 1760 توں جنوری 1761 تک مرہٹاں دی اتحادی افواج مختلف مقامات تے ابدالی لشکر نال ٹکراندی رہی، مرہٹاں دی اتحادی افواج وچ ابراہیم خان گاردی وی ہئی جیہڑا اپݨے نال ݙو ہزار سوار تے 9 ہزار پیدل فوج گھن آیا ہئی۔ آخری لڑائی وچ مرہٹاں دی اتحادی افواج دا سپہ سالار بسواں راوُ مارا گیا، ابدالی دے لشکر نے اتحادی لشکر دا قتل عام شروع کر ݙتا، مرہٹاں دی کمر توڑ ݙتی گئی تاں احمد شاہ ابدالی نے تلوار نیام وچ سٹ ݙتی، شکست خوردہ اتحادی افواج دے گرفتار تھیوݨ والے سرداراں تے فوجیاں وچ یارہاں ہزار فوجی مہیا کرݨ والا مسلمان سردار ابراہیم خان گاردی وی شامل ہئی۔ جݙݨ اینکوں فاتح بادشاہ دے سامݨے پیش کیتا گیا تاں احمد شاہ ابدالی نے نفرت آمیز لہجے وچ اوندے توں پچھا، ٻولو خان صاحب کیا حال ہے؟ کیویں تشریف آوری تھئی؟ ابراہیم گاردی نے آکھا، میں ہک جاں فروش سپاہی ہاں، حضور جان بخشی کریسن تاں ہیں طرح حق نمک ادا کریساں ، نفرت تے غصے نال احمد شاہ ابدالی دا چہرہ سرخ تھی گیا ّ گاردی! جاں فروشاں دی جان بخشی تاں تھی سڳدی ہے لیکن ایمان فروش دنیا وچ رہݨ دے قابل نی ہوندے ّ ایہ تاریخی جملہ آکھݨ دے بعد احمد شاہ ابدالی نے حکم ݙتا ” ایں ایمان فروش کوں میݙی اکھیاں توں دور کر کے صفحہ ہستی توں مٹا ݙتا ونجے ” پوری ذمہ داری نال حکم دی تعمیل کر ݙتی ڳئی۔