آ جانی تونسہ ڄلوں
تونسہ شریف اچ اُنویں تاں بدبختی پچھلے ستر سالیں کنیں عروج تے ھے پیریں سرداریں دے قہر ءچ جکڑیا ھویا شہر اج وی پچھلی صدی دا نقشہ ڈیندے، تعلیم یافتہ طبقے دے باوجود جہالت دی انتہا ھے، ول ول آزمائے ھوئے لُوکیں کوں گریٹ لیڈر، فخر سنگھنڑ، دا خطاب ڈے کے آپڑیں نسلیں نال دھوکا فریب کرنڑ وطیرہ بنڑ چکے، جیرھے شہر ءچ دنیاں دا پہلا جانور پارک، کمال پارک جئیندے وچ بھیڈاں بکریاں گڈھاں کھوتے، سیر سپاٹے کریندے ھوون، جیرھے شہر دے اکلوتے لاڈلے ہسپتال ءچ پوری تحصیل دی عزت نفس مجروح تھیندی ھووے، جیرھے شہر ءچ غریبیں دی ساری عمر دی کمائ سڑ کے سُوا تھی گئ ھووے بدلے ءچ باہر دا ایم این اے آ کے انھیں دے ڈکھ ءچ شامل تھیندا ھووے، مقامی سیاہ ست دان ٹھکارے مریندے ھوون، اُلٹا غریبیں تے پرچہ کٹوا کے غریب عوام دے مونھ تے تھپڑ مریندے ھوون،جنھیں پیریں سرداریں دے گھر ویھاڑی تیں ڈی جی خان ھوون، انھیں کوں ترائے چار دفعہ آزما کے ول وی انھائیں دے گیت گاونڑ آلی قوم آپڑیں شہر دا ناں فخر نال یونان صغیر لکھ کے آپکوں باشعور تے پڑھے لکھیے لوکیں ءچ شمار کرے انھیں کوں کوئ ونج سمجھاوے میڈا ویر کھوتے تے کتاباں لڈنڑ نال کھوتا باشعور تیں عالم نیں بنڑ ویندا.
خواجہ شیراز صاحب تیرہ سال ایم این اے رہ گئے کوئ ڈس سگدے تیرہ سال ءچ پیر صاحب کتنی دفعہ تونسہ تشریف گھن آئے ہن کتنے ہسپتال و سکول بنڑئن، سردار قیصرانی، آپڑیں وستی یا حلقے ءچ کتناں ترقیاتی کم کرائن جتھاں انسان و جانور کٹھے پانڑی پیندے رہن او حلقے سردار تیں پیر دے ہن، پتہ نیں ساڈی مجبوری کیرھی ھے ساڈیاں زباناں کیوں گونگیاں ہن ساڈے ضمیر کیوں، مرگئین ساڈیں اکھیں تے کینجھی پٹی بدھی کھڑی ھے سب کجھ جانڑ کے وی نانگ پلیندے پئے ہیں ولا اوھے لوک آنڑنڑ دے فکر ءچ ہیں جیرھے ساکوں ویچ کے محل ماڑیاں گھندن،اکھیں بھالو سُتے لوکو، پہلے انھیں کونسلریں کنیں شروع کرو جیرھے آپ تاں لکھاں روپے گھن کے نہال ہن پر ساکوں ایں حالت ءچ آنڑ آلے ایھے کم ظرف ہن، اُٹھو متاں شام غریباں تھی ونجے متاں خیمے سڑ ونجن متاں علی اصغر تسے مر ونجن، متاں تھاڈیں ساڈیں لاشیں تے گھوڑے دُرکائے ونجن، اٹھو. (جمیل بلوچ)