آمد ثانی دا مسیحی عقیدہ

آمد ثانی یا ظہور دوم ہک مسیحی عقیدہ جینکوں یسوع مسیح دی آمد وی آکھا ویندا ہے۔ ، اینکوں متعدد اہم الفاظ اچ بیان کیتا ڳیا ہے۔ پُروضیا (Parausia) جیندا مطلب ”موجودگی“ یا ”آمد“ ہے۔ تے اِینکوں یونانی وچ بادشاہ دی آمد ظاہر کرݨ کیتے استعمال کیتا ویندے۔ بائبل دے مطابق یسوع مسیح آسمان تے چڑھ ڳئے تے ول دنیا دے آخر وچ مخالفِ مسیح تے بدی کوں نیست کرݨ ، راستباز مُردیاں کوں زندہ کرݨ، نجات یافتہ لوگاں کوں جمع کرݨ کیتے ، قدرت تے جلال دے نال شخصی طور تے ہیں زمین تے آسن۔ اُنہاں دی ݙوجھی آمد اپوکلپسِس (apokalypsis) بمعنی پردہ اٹھیجݨا وی ہوسی۔ اُوں وقت انہاں دے سرفراز ہوݨ تے آسمان تے تخت نشین تھیوݨ دے باعث اُنہاں دی قدرت تے جلال دنیا تے ظاہر کیتے ویسن۔ اِیں وقت مسیح، خدا دے سڄے ہتھ تے ٻیہہ کے حکومت کریندے پئے ہن۔ تے خدا دے تخت وچ شریک ہن، لیکن اُنہاں دی ایہ حکومت دنیا دی نظراں توں پوشیدہ ہے تے ایہ اُنہاں دی آمد ثانی apokalypsis کے ذریعے دنیا تے ظاہر تھی ویسی ۔ ایں طرح مسیح دی آمد ثانی اُنہاں دے صعُودِ آسمانی تے اُنھاں دی آسمان تے تخت نشینی توں الڳ نی تھی سڳدی کیونکہ اوہ دنیا تے اپݨے موجودہ اختیار کوں ظاہر کریسن۔ تریجھا لفظ اِپی فینیا (epiphaneia) ہے جیندا مطلب ظہور، جیہڑا مسیح دی دیدنی آمد کوں ظاہر کریندا ہے۔