آس دی پونبل
گھنڈ کھلائی کتاب ’’آس دی پونبل،،
رپورٹ: اظہر رضا مہروی
مخفی سرائیکی ادبی سنگت بہاولپور دے زیرِ اہتمام گزری رات اقبال ٹاون ریاض بلوچ ہوراں دی جا تے سرائیکی دی نوجوان شاعر سئیں شعبان جھلݨ شعبان ہوراں دی کتاب ’’آس دی پونبل ،، دی تقریبِ رونمائی کیتی گئی. ایں تقریب دی صدارت سردار خادم حسین مخفیؔ ہوراں کیتی. میزبانی دے فرائض ریاض بلوچ ہوراں انجام ݙتے. خصوصی مقالہ حفیظ طاہر گھوٹیہ ہوراں پڑھیا مہماناں اچ چیف ایڈیٹر ست روزہ اخبار ’’سنہڑا،، ملک ریاض شاہد، حکیم محمد عربی اتے محمد سخی دے نال نال طلبہ و طالبات شرکت کیتی. نظامت پروفیسر عصمت اللہ شاہ ہوراں کیتی. سب توں پہلے ایں تقریب دا منڈھ قادر پاک اللہ دے کلام پاک توں شروع تھیا اتے تلاوتِ کلامِ پاک حافظ فرحان ہوراں کیتی. تقریب دی صدارت سانگے خادم حسین مخفی صیب کوں اسٹیج تے دعوت ݙتی ڳئی.
تفصیل[لکھو | ماخذ وچ تبدیلی کرو]
انہاں محفل دے گھوٹ شعبان جھلݨ شعبان کوں اسٹیج تے سݙ تے پھلاں دے ہار پاوائے اتے اسٹیج تے ٻلہایا. عمصت اللہ شاہ صیب سرائیکی خطے اتے سرائیکی تعلیمی سلسلے تے ڳالھ مہاڑ کریندیں ہوئیں اظہارِ خیال فرمایا. اتے مخفی سرائیکی ادبی سنگت بارے ݙسایا جو اے تریجھا کٹھ اے اتے اساݙی خوش قسمتی ہے جو اساں اپݨے ٻال دی کتاب دی تقریبِ رونمائی کرویندے پیئوں. ایں دوراں محمد سخی ہال اچ آئے اتے شعبان ہوراں کو گجرے تے پھلاں دے ہار پاوائے اتے مبارکباد ݙتی. عصمت اللہ صیب ہوراں سرائیکی ادبی روایت اتے تاریخ تے سوجھلا پیندیں آکھیا جو ’’آس دی پونبل،، سرائیکی شاعری دی آس ہے. ایں دے بعد انہاں ایں تقریب دے خصوصی مقالہ نگار اتے مہاندرے نقاد سئیں حفیظ طاہر گھوٹیہ ہوراں کوں دعوت ݙتی گھوٹیہ صیب شعبان جھلݨ شعبان دی کتاب دی تفصیلی ڳالھ مہاڑ کریندیں قدیم تے جدید اصنافِ سخن تے پوری ڳالھ کیتی اتے اوں دا تقابل شعبان دی کتاب نال کیتا اتے حوالے دے ڈھیر سارے اشعار پڑھیئے. انہاں شعبان دی شاعری کوں حقیقت دی شاعری آکھیا تے قوافی تے ڳالھ کریندیں انہاں جتھاں نویں اتے اوپریاں زبان دے قافیئے کوں وݙی مہارت نال ایں ورتݨ جو او پوری چس رس نال ایں زبان دا حصہ لڳدے پن آکھیا اتھائیں انہاں اے وی نشابر کیتا جو کجھ قافیئے بتھے وی ہن.
انہاں شعبان دی شاعری کوں جدت دی شاعری آکھیا تے مثالاں وی ݙتیاں. ترفع دے عناصر دی وضاحت کریندیں کتاب اچ کمیاں کوتاہیاں کوں وی نشابر کیتا. ول انہاں ایں کتاب اچ تکرار لفظی تے گالھ کیتی اتے اینکوں ما ٻولی دی بہترین مثال قرار ݙتا. انہاں آکھیا شعبان چھوٹی بحر دا وݙا شاعر ہے. شعبان تلمیحات دا آپݨا جہان آباد کیتے اتے کعبے تے ٹنگیڄݨ آلیاں غزلاں دے مقابلے او وسوں وسبے روہی پتݨ منارے دی تلمیع ورتی اے. چھیکڑ اچ انہاں آکھیا اے سارا میݙا موقف اے اتے ایں نال کہیں کوں اختلاف وی تھی سڳدے. انہاں دے بعد پروفیسر عصمت اللہ شاہ صیب کوں اسٹیج تے سݙیا اتے انہاں ایں کتاب بارے اظہارِ خیال کیتا اتے کتاب کوں ٻہوں پسند کریندیں ہوئیں مستقبل دی آس قرار ݙتے. انہاں دے بعد عصمت اللہ شاہ صیب تقریب دے گھوٹ شعبان جھلݨ شعبان ہوراں کوں اظہارِ خیال دی دعوت ݙتی. او ٻہوں خوشی دا اظہار کیتا اتے کتاب دیاں کوتاہیاں جیڑھیاں کتابت دیاں ہن توں آئندہ ایڈیشن اچ پاک کرݨ دی یقین دیہائی کروائی اتے سب دے لنگھ آوݨ دا شکریہ ادا کیتا. چھیکڑ اچ تقریب دے صدر سردار خادم حسین مخفیؔ صیب آکھیا جلدی دی وجہ توں کتابت دیاں کجھ غلطیاں سامݨے آئن اگر کجھ وقت ویلا ݙتا ویندا تاں ٻیا سوہںا ہا پر ول وی اے مجموعہ سرائیکی ادب اچ سوہݨا ودھارا اے. عصمت اللہ شاہ صیب عوامی گلوکار سئیں سجاد سانول کوں دعوت ݙتی اتے انہاں شعبان ہوراں دی کتاب آس دی پونبل اچوں ݙوں گیت ڳائے جیڑھے انہاں دے پہلے البم دا حصہ ہن اتے انہاں ݙسایا جو میں موسیقی دی ابتدا شعبان صیب ہوراں دی ایں کتاب توں شروع کیتے ایہو میݙا فخر اے. بعد ازاں شعبان جھلݨ شعبان کجھ مہماناں کوں اپݨی کتاب سوکھڑی ݙتی اتے چاہ پاݨی نال اے تقریب اپݨے اختام کوں پہنچی.