آسیہ

وکیپیڈیا توں
Jump to navigation Jump to search
آسیہ بنت مزاحم دے ناں دی خطاطی

آسیہ بنت مزاحم مصر دے باشا فرعون دی ذال ہَن۔ ٻہوں پارسا اَتے ہمدرد تِرِیمت ہَن۔ جہڑیلے موسیٰ علیہ السلام ڄَمّے تاں اُنّھاں دی اَمّاں سئیݨ نے اُنّھاں کُوں ہِک صندوق وِچ بند کر تے دریائے نیل وِچ وَہا ݙِتّا۔ جاں جو فرعون کُوں پتہ نہ لڳ ون٘ڄے اَتے اُوہ اُنّھاں کُوں قتل ناں کر ݙیوے۔ جیڑھے ویلے اِیہ صندوق فرعون دے محل دے نیڑے پُڄّیا تاں آسیہ نے صندوق کُوں ݙیکھ تے اِیکُوں دریا وِچُوں ٻاہر کڈھوا گِھدّا۔ سوہݨاں نِکّا ٻال نظر آیا تاں وݙّی پِرِیت نال اِین٘دی پرورش کِیتی۔

آسیہ فرعون تُوں آپݨاں ایمان لُکائی رکھین٘دی ہئی اَتے بعد وِچ اِیکُوں اِیں دے بارے عِلم تِھی ڳیا ہئی۔ اِنّھاں دے بارے وِچ کُجھ نصوص اَتے اُنّھاں دی شروحات والتفسری پیشِ خدمت ہِے:

1۔ فرمان باری تعالٰی ہے :

 "اللہ سئیں نے ایمان آلیاں کِیتے فرعون دی ذال دی مثال ݙسائی ہِے، جیڑھے ویلے اُوں نے آکھیا جو اے میݙے ربّ میݙے کِیتے آپݨے کول جنّت وِچ گھر بݨا، اَتے فرعون اَتے اِین٘دے عمل تُوں نجات ݙٰیوا اَتے میکُوں ظالماں دی قوم تُوں وِی نجات عطا فرما۔" [١]

ابو موسیٰ اشعری بیان کرین٘دے ہِن جو نبی صلی اللہ علیہ وآلہ وسلم نے فرمایا:

"مرداں وِچُوں تاں ٻہوں سارے درجۂ کمال تئیں اپڑے جاں جو تِرِیمتاں وِچُوں سوائے فرعون دی ذال آسیہ اَتے مریم بنت عمران دے کوئی ٻئی تِرِیمت درجۂ کمال تئیں نئیں پُڄّی، اَتے عائشہ بنت ابی بکر رضی اللہ عنہا دی باقی سبھ تِرِیمتاں اُتّے فضیلت اِین٘ویں اِی ہِے جین٘ویں ثرید باقی سبھ کھاݨیاں اُتّے افضل ہِے۔"[٢]

ابنِ عباس بیان کرین٘دے ہِن جو نبی صلی اللہ علیہ وسلم نے زمین اُتّے چار لِیکاں لائیاں اَتے فرماوݨ لڳے:

"بَھلا تُساں ڄاݨدے ہِیوے جو اِیہ کیا ہِے؟ صحابہ کرام نے عرض کِیتا اللہ اَتے اُون٘دا رسول صلی اللہ علیہ وآلہ وسلم کُوں وَدھ عِلم ہِے، نبی صلی اللہ علیہ وآلہ وسلم نے فرمایا:
"جنتی تِرِیمتاں وِچُوں سبھ تُوں افضل خدیجہ بنت خویلد اَتے فاطمہ بنت محمد صلی اللہ علیہ وآلہ وسم اَتے فرعون دی ذال آسیہ بن مزاحم اَتے مریم بنت عمران رضی اللہ عنہن اجمعین ہِن۔"[٣]

ٻاہْرلے رابطے[لکھو | ماخذ وچ تبدیلی کرو]

حوالہ جات[لکھو | ماخذ وچ تبدیلی کرو]

  1. القرآن۔ سورۃ التحریم، آیت 11۔
  2. صحیح بخاری حدیث نمبر 3230، صحیح مسلم حدیث نمبر 2431
  3. مسنداحمد حديث نمبر 2663