آزاد نظماں ( فرھاد فریدی ) دیاں

مصروف

مصروف

سجن میڈے میکوں اکثر

کریندے فون رہ ویندن

وڈا عرصہ گزر گیا ہے

تیڈے کولوں

اساں کئی شعر نی سنڑیا

کیوں اجکل شعر نی لکھدا

ڈسا کیوں شعر نی لکھدا

سنڑو سجنڑو

تہاکوں تاں خبر ہوسے

تہاکوں کیا خبر کینی

تہاڈے حال میں وانگوں

بدل حالات ایجھے گن

میکوں فرصت نہیں ملدی

ڈساں فرصت نی کیوں ملدی

مہنگائی اتلی ودھ گی ہے

مگر تنخواہ اوہا ہے

اے ظالم لوکاں ڈے دل کینی

ہوون ہا

تاں اج ساڈے

ملک دے وچ

غریباں کوں

ترائے وقت دی روٹی

دے چنتے ناں ہوندے

در در دے دھکے ناں ہوندے

ڈکھ اے

میڈا وی حال ایہو ہے

میں کیویں پیٹ کوں پالاں

جتھاں ہر روز نو گھنٹے

ویندا کم تے ہامی میں

ہنڑ

اتھائیں پندرہ گھنٹے

میکوں کم تےونجڑاں ہے

میں جیکر کم تے ونجاں ناں

تہاڈے واسطے لکھاں

روزانہ شعر بہہ تے میں

ڈساؤ پیٹ پالنڑ دا

طریقہ کئی

جتھاں آزاد ہوواں میں

لکھنڑ اشعار دے کیتے

تہاکوں وقت وی ڈیواں

ڈساؤ پیٹ پالنڑ دا

طریقہ کئی

سنڑو سجنڑو

تہاکوں وقت کیا ڈیواں

میکوں خود آپ دے کیتے

کڈاہیں وقت نی ملدا

جو کلہیں بہہ تے اپنڑے توں

کڈاہیں حال چا گھناں

جو کیا ہم تے

تے ہنڑ میڈا

اے کیجھا حال تھی گیا ہے

سنڑو ہک واقعہ میڈا

جو کجھ ڈیہنہ پہلے دا ہووے

مہینے کئی گزر گے ہن

شکل اپنڑی میں شیشے وچ

ڈٹھی ناں ہئی

اچانک دید شیشے تے

میڈی جو پی

وڈی ہک چیک نکتی اے

میں ڈر گیا ہاں

جو میڈے سامنڑے شاید

کوئی جن بھوت آ گیا ہے

اکھیں توں نیر جاری تھئے

شکل اپنڑی کوں میں پہچان نی سگیا

جو میڈے سامنڑے والا

جیرھا اے شخص شیشے وچ ہے

ایہو میں ہاں

ولا کجھ غور کیتا ہے

ایہو محسوس کیتا اے

جیرھا اے شخص سامہیں ہے

ایہو فرھاد لگدا ہے

جیرھے بندے کوں

شیشے وچ

شکل اپنڑی

وی ڈیکھنڑ دی

کڈہیں فرصت نہیں ملدی

بھلا او شعر لکھسے

ڈساؤ شعر کیا لکھسے

شاعر ۔ فرھاد فریدی

2023=12=27