آزاد آسام تحریک

آزاد آسام دی اصطلاح بھارت دے صوبہ آسام وچ تحریکِ آزادی چلاوݨ والے استعمال کریندے ہن۔ اینکوں متحدہ محاذِ آزادیِ آسام (United Liberation Front of Asom) وی آکھدن۔ تے الفا وی آکھا ویندا ہے۔ الفا تنظیم 1979 وچ آسام دی آزادی کیتے تشکیل ݙتی گئی ہئی جیہڑی ہندوستان دی شمال مشرقی ریاستاں وچوں سب توں زیادہ سرگرم علیحدگی پسند تنظيم ہے۔ لیکن ایہ تحریک 1971ء توں جاری ہے۔

تفصیل

’لبریشن فرنٹ آف آسام‘ یعنی الفا دے سربراہ دا ناں اروند راج کھووا ہے جنہاں دے مطابق انہاں دی تنظیم حکومت نال بات چیت کیتے تیار ہے لیکن خود حکومت دی جانب توں مذاکرات دے عمل وچ رکاوٹاں پیدا کیتیاں ویندن۔ ایہ گروپ ہک اپݨے آزاد وطن کیتے لڑدا پیا ہے۔ اس گروپ دا آکھݨ ہے کہ قومی حکومت آسام دے قدرتی وسائل دا استحصال کریندی اے تے اتھوں دے مقامی باشندیاں دے مفاد کیتے ٻہوں گھٹ کم کریندی ہے۔ ۔ علیحدگی دی اس پُرتشدد تحریک وچ 1979ء توں ہݨ تک 20 ہزار توں زیادہ افراد ہلاک تھی چکے ہن۔ ریاست آسام گھاٹے جنگلاں نال، بالخصوص سرسبز پہاڑیاں نال بھری ریاست ہے اس واسطے گوریلا جنگ آسان ہے تے اینکوں کنٹرول کرݨا ہمیشہ مشکل ریہا ہے۔

اروند راج کھووا نے مرکزي حکومت تے الزام عائد کیتا ہے کہ جتھاں مرکزی حکومت دیگر علیحدگي پسند گروپاں دے نال ہتھیار سٹݨ دی شرط بغیر بات چیت کریندی اے اتھئیں الفا تے ہتھیار چھوڑن دے بعد بات چیت دی شرط لائی ویندی اے.