آزادی دی اہمیت

اساں ازاد پیدا کیتے گیوں، اے ازادی ساکوں بہوں مہانگی پئے گئی ہے، میں تاں حیران آں غلامی آخر کیا ہوندی ہے ؟ ساڈی روح اچ مارشل لاء لایا گئے، اساں آپنڑی مرضی نال پھڑکنڑ لو وی ترس گیوں، تساں نوہے بول سگدے، صرف اوہو کجھ بول سگدو جیہرا معاشرے اچ رائج ہے، ساڈی اتنا اوقات وی کینی جتنا فرشتیں دی ہے، انھیں سوال کیتا مولا انھیں فسادیں کوں کت سانگے خلق کریندا پئیں ؟ اساں اے جرات وی نئیں کر سگدے نہ ساکوں ضرورت ہے۔

اساں خدا دے ناں دی خیرات منگدے ودے ہاسے، ساڈی بھوئیں، ساڈا مال، ساڈیاں کنڑکاں، ساڈیاں جاگیراں، ساڈے گاونڑ، ساڈی وساکھی، ساڈی جھمر، ساڈے دول واجے ساڈے کنوں افضل اتے برتر لوکاں کھس گھدیاں ہن، اساں ہنڑ ہنائیں کنوں خدا دا ناں گھن گھن تے آپنڑی ہر شئے منگدے ودے ہاسے، اساں خوش ہاسے جو ساڈی بھوئیں تیں ہزاراں سالاں توں موجود مندر اچ لاتھا کافراں دا بت پلیدگی دا مرکز ہے، لہذا ساڈی دھرتی تیں ایں مندر اچو سونے دے نال بنڑیا بت تروڑ کے چا ونجنڑ آلا ڈاکو ساڈا ہیرو ہے کیوں جو او شریعت دا پابند ہے، چھیکڑ اچ ساڈی دھرتی کوں ونڈ ڈتا گئے، ساڈی پناکی دی سنڑیج تھی گئے اے، ساکوں پناکی دے بدلے اچ مسلمان زمین ڈے ڈتی گئی اے تے ہزاراں سالاں توں ساڈے نال وسنڑ آلے ساڈے بھراویں کوں جیہری زمین ڈتی گئی اے او کہیں ہندو فاشسٹ بھگوان دے ناویں انتقال تھی گئی اے، خدا تاں اے ونڈ نا ہئی کیتی، لیکن تساں ایں ونڈ دے خلاف وی نوہے الا سگدے کیوں جو اساں او نام نہاد ترقی یافتہ مہذب حملہ آور کوں گورا گورا آکھ تے آپ توں خود افضل کیتا ہا، ولا اساں اچو جیہرا اوندی بولی بول سگدے اوکوں چنگا چوکھا سمجھیا ویندے، ساڈا خدا انگریز کوں حملہ آور سمجھدے اتے اساں اونکوں گورا سمجھدوں، تے اوں آلی کار بنڑنڑ واسطے محنتاں وی کریندوں، "پٹ انگریزی تھانڑے " جیویں سندھ دے خدا اے اونکوں حکم کیتا ہووے، اوں خدا دا سنیہا اساں تائیں پجا ڈتے، اوں ساکوں زمین ولا ڈتی، ہئی حرام ضرور کیتی، لیکن ولا ڈتی، اتے ساڈے اتیں سرمایہ دار، جاگیر دار اتے وڈیرے مسلط کر گیا، پننڑ آلیں کوں پہلے آکھ ڈتا ہس جو تساں ہک اسلامی لشکر بنڑاونڑے جیہرا تہاڈے بالیں دے ڈڈھ اچو کھاد کڈھ کے بندوخاں گھننسی، جیہرا تہاکوں پہرے دے ناں تیں کنگال کریسی، جاہ جاہ چیک پوسٹاں بنڑا تیں تہاڈی مقامیت کوں قتل کریسی، اج ساڈے کنوں بھوئیں ہے جیہری ساڈی نئیں، مال ہے جییرا ادھ موا ہے، پانڑی ہے جییرا زہریلا ہے، دول واجے کینی، جھمر کینی، جیکر کتھائیں بچی وی ودی ہے تاں پِھکی ہے، اساں کامیاب ہسے، انگریز شکست کھا گئے، ہاری من گئے،۔۔۔ اساں روس تروڑ ڈتا ہا، انڈیا وی تروڑ ڈیسوں۔ (مظہر حسین)