آثار نبوی صلی ﷲ علیہ وسلم دی حفاظت ݙوجھا حصہ

نعلین مبارک

امام جلال الدین سیوطی ڄیاں اعلٰی مرتبے دا محدث وی سوہݨے دے نعلین تے پوری کتاب لکھ چھوڑیندائے تے کتاب اچ کیشے لکھدائے سوہݨے دی نعلین کیویں ہئی، کیرے رنگ دی ہئی، کیرے ڈیزائن دی ہئی، کیرے چمڑے دی ہئی، سوہݨے کݙاں پئی ہے، کتھاں پئی ہے، لاہائی ہنیں تاں کتھاں رکھی ہنیں، نعلین بردار کوݨ ہئی، سنبھالݨ کیندے ذمے ہئی، ڄیرا چیندا ہئی او رکھدا کتھاں ہئی، ﷲ اکبر، جلال الدین سیوطیؒ لکھدے ہن ڄو ابن مسعود رضی ﷲ عنہ سوہݨے دے نعلین بردار ہن ـ

پیالے

حضور صلی ﷲ علیہ وسلم دے زیر استعمال پیالے سانبھے پئے ہن ـ بخاری شریف اچ ترائے پیالاں دا ذکر ہے جیراں دے وچ سوہݨا پاݨی، کھیر یا ماکھی نوش فرمیندے رہ ڳئین ـ نال اے وی محفوظ ہے ڄو کیرے پیالے دے وچ کتنی واری پاݨی نوش فرمایاـ ہک پیالہ حضرت سہل بن سعد رضی ﷲ عنہ کول ݙوجھا حضرت انس بن مالک رضی ﷲ عنہ کول لکڑ دا پیالہ لوہے دا کڑا لڳا ہویا ہئی ساراں کول زیادہ سئیں دے استعمال اچ رہ ڳیاـ حضرت انس رضی ﷲ عنہ حصول برکت واسطے صحابہ کرام تے تابعین کوں سݙ سݙ اس پیالے دے وچ پاݨی پلیندے ہن ـ تریجھا پیالہ حضرت عبدﷲ ابن سلام کول موجود ہئی ـ

چادر مبارک

نبی رحمت صلی ﷲ علیہ وسلم دی ہک قمیص مبارک تے ہک چادر مبارک حضرت عائشہ رضی ﷲ عنہا کول موجود ہئی انھاں دے وصال دے بعد حضرت اسماء رضی ﷲ عنہا سنبھال رکھیاں ـ اگر کوئی محلے دے وچ بیمار تھیوے ہا تاں چادر مبارک دا ہک پلوں پاݨی نال پُسا کے او پاݨی بیمار کوں پلیندے ہن ﷲ پاک شفا چا ݙیندا ہئی ـ ہک چادر حضرت عبدالرحمان بن عوف رضی ﷲ عنہ کول موجود ہئی ایہا چادر یا کئی ٻئی حضرت سعد بن ابی وقص رضی ﷲ عنہ کول وی موجود ہئی اسے چادر دے واقعے دے وچ ہک دیہاتی غیر معروف صحابی دا وی ذکر ملدا ہےـ

چارپائی

حضور صلی ﷲ علیہ وسلم مدینہ تشریف گھن آئے تاں حضرت ابو ایوب انصاری رضی ﷲ عنہ کھٹڑی دا انتظام کیتاـ سوہݨے دے پڑدہ وٹاوݨ دے بعد صحابہ کرام وصیت کر ویندے ہن ڄو ساݙا جنازہ اسے منجی تے اٹھایا ونڄےـ کئی وریاں تک حصول برکت واسطے جنازے اسے کھٹڑی تے چویندے رہ ـ

متفرق شئیاں

سوہݨے دی مندری، سوہݨے دا عصا، لباس، چمڑے، سواریاں، موئے مبارک، تلواراں، غرض سوہݨے دے غلاماں ہک ہک شئے محفوظ کیتی تے ساݙے تئیں پچا چھوڑی ـ غفار تعبیر