وادی سندھ نال ݙڈھپ

وادی سندھ نال ریاست، ملاں، میڈیا اتے سرمایہ دار دی بدماشی اتے اشرافیہ دا ڈڈھپ کوئی اجوکی یا کلہوکی گالھ نئیں، ست ڈہائیاں توں وادی سندھ دے مقامی لوک ایں ڈڈھپ اتے جبر دا نشانہ بنڑدے پین، ایویں ڈسدے جیویں اساں پنجاب دے بدھل ہیسے، سمندر دی ہوا کوں سوہنڑاں کریندی کینجھر جھیل توں گھن کراہیں کالا باغ تائیں وادی سندھ دے سینے اتیں جھمراں لیندے اے سوہنڑے لوک ہزاراں ورہیاں توں مہذب ہن، وادی سندھ اچوں ملنڑ آلی ننگی نچدی تریمت(ڈانسنگ گرل) ایں وسوں دے لبرل چہرے دی علامت ہے، بھل جو ایں وادی دے واسیاں کوں انھیں دی سویلائزیشن، انھیں دے کلچر، انھیں دے معاشرتی سوہنڑپ انھیں دے سماجی رویاں تے ڈینڑاں دا حملہ نہ تھیندا، اے وادی تاں سچل سرمست اتے خواجے جہیں صوفی جنڑیندی رہی ہے، اے دھرتی ماء تاں محبتیں دی ہیک انج کائنات ہائی، لیکن ایں وسوں تیں حملہ تھیا، کوئی بت شکن آیا، کوئی عربی مسیحا ہوونڑ دا دروہ کر گیا، اے وسوں لٹیندی رہی، وت باہروں آئے لوکاں اتھو دے خزانے ڈٹھے، بکھ اتے کج نہ ہوونڑ دی وجہ توں ایں دھرتی دے سچے لوکاں انھاں کوں جاہ ڈتی، اج او بلوچ اتے مہاجر اتھو دے لوکاں کوں کمی آھدن اتے جاہل آھدن، پنجاب دا ساڈے نال کوئی پرانڑاں ویر ہے، یا پنجاب بہوں سادہ ہے، ہر حملہ آور، جابر اشرافیہ، سرمایہ دار یا سیکورٹی سٹیٹ جڈوں وی ساڈا استحصال کیتا پنجاب اوندا بانہہ بیل رہیے، صرف ساڈی معیشیت نئیں قتل کیتی گئی، ساڈی وسوں دے اقدار مارے گئے، ساڈی کریکٹر ایسیسینینشن ایں حد تونڑیں کیتی گئی جو اج ہر پنجاب دے بال توں وی پچھوں تاں او وی آکھسی جو سندھی اتے سرائیکی جاہل تے کرپٹ ہین۔

سرمایہ دار ساڈے کنوں ساڈی طاقت زراعت کھس گھدی، ایں دھرتی جائے جڈاں نیشنلائزیشن کیتی ہائی اوں ویلھے سرمایہ دار، ریاست، پنجاب اتے ملاں ہیک صف اچ کھڑ تے اوندی مخالفت کیتی، کیوں جو وادی سندھ ترقی کر ونجے ہا، ہیک ڈکٹیٹر ساڈے دریا ویچ ڈتے،

میں وی تسا، میڈی روہی تسی

تسی روہی جائی میکوں آکھ نہ پنج دریائی

انڈس دے پیٹے کوں سنگوڑ ڈتا گیا، اوندے اتیں ڈیم بدھ ڈتے گئے، بیراج دب ڈتے گئے، اڈوں بنڑایاں گیاں، ساڈیاں زمیناں تے پنجاب کوں آباد کیتا گیا، ساڈی بھوئیں ریاست نال محبت دے انعام اچ ساڈے کنوں چھیک تے پنجاب کوں ڈے ڈتی گئی، اج میڈیا دے اتیں بیہہ کہ سرمایہ دار دی بھڑوت کرنڑ آلے صحافی زور لئی پئے ہوندن جو سندھی اتے سرائیکی کوں جاہل اتے کرپٹ ثابت کیتا ونجے آصف زرداری دا ایہو قصور ہے جو او وادی سندھ دا پتر ہے، اتے وادی دے لوکاں سانگے میڈیا، ریاست، ملاں تے سرمایہ دار نال لڑدا ودے، آصف زرداری تے ہر نواں کیس جییرلے کھولیا ویندے تاں ساڈا سوال ایہو ہوندے جو ایں کنوں پچھلے کیس دا فیصلہ کیا تھیا ہا لیکن پروپیگیشن دا شکار لوک جیہرے خود کوں عقل دان سمجھیندن او ایندا ہیکو جواب ڈیندن جو زرداری چور ہے زرداری ڈاکو ہے، ساڈے مقابلے اچ ایں ڈلی ہوئی منطق دے لوک ہین، ساکوں انھاں نال الاونڑ سانگے آپنڑاں قد چھوٹا کرنڑاں پوندے، ایں سانگے اساں سارا مسئلہ ویلھے دے حوالے کر ڈتے، ویلھا سبھ توں ودھ جواب ڈے سگدے۔ مظہر حسین