غفور ملک: نسخیاں دے درمیان فرق

وکیپیڈیا توں
Content deleted Content added
"سرائیکی وسیب دا ہیرو غفور ملک غفور ملک سرائیکی وسیب، زبان و ادب نال بے انتہا محبت نال سرشار بے لوث تے اݨ کھُٹ خذمت کرݨ آلا ہک باصلاحیت انسان ہائی. ملک برادران( ظہور، منظور، غفور) نال میݙا رابطہ سئیں مجاہد جتوئی صیب دے توسط نال تھیا جݙاں میں زندگی وچ پہلی..." نال ورقہ تخلیق تھیا
 
(کوئی فرق کائنی)

حالیہ نسخہ بمطابق ٢٢:١٧, ١٠ نومبر ٢٠٢١

سرائیکی وسیب دا ہیرو غفور ملک

غفور ملک سرائیکی وسیب، زبان و ادب نال بے انتہا محبت نال سرشار بے لوث تے اݨ کھُٹ خذمت کرݨ آلا ہک باصلاحیت انسان ہائی.

ملک برادران( ظہور، منظور، غفور) نال میݙا رابطہ سئیں مجاہد جتوئی صیب دے توسط نال تھیا جݙاں میں زندگی وچ پہلی واری کراچی ڳیم تاں  مجاہد جتوئی صیب دے ریفرنس نال انہاں کوں ملیم اتے انہاں کراچی وچ ڈھڳ عرصہ  اساݙی میزبانی کیتی اتے کراچی جہے شہر دا سونہا کروایونے. انہاں دے دفتر وچ سرائیکی دے حوالے نال ڈھڳ ساری شخصیات نال ملاقات تھئی.

غفور ملک تے انہاں دے بھرانواں دی انہاں ݙینھاں "سرائیکو ایڈورٹائزنگ " دے ناں نال ہک ٻہوں وݙی تے مشہور ایڈورٹائزنگ کمپنی ہائی.

ملک برادران دی سرائیکی کاز نال ٻہوں محبت ہائی ݙینھ رات سرائیکی حوالے نال رُجھے راہندے ہن.

پہلے انہاں دا تے نزیر لغاری صیب دا تعلق  سرائیکی ادبی سنگت نال ہائی بعد وچ کجھ وجوہات پاروں انہاں سرائیکی ادبی سانجھ بݨائی.

سرائیکی ادبی سانجھ دے بݨݨ دے بعد شوبز دی دنیا وچ  سرائیکی زبان تے کلچر دے نویں دور دا آغاز تھیا. پہلا سرائیکی اسٹیج ڈرامہ "پٹ انگریزی تھاݨے " ریلیز تھیا جیندا اسکرپٹ ظہور ملک سئیں نے لکھیا اتے اوں اسکرپٹ دی ترتیب اتے پروف دا اعزاز ظہور ملک صیب میکوں ݙتا. اوندے وچ غفور ملک نے ہیرو دا رول پلے کیتا تے منظور ملک صیب نے وی شاندار اداکاری کیتی. اے ڈرامہ سرائیکی زبا تے ثقافت  کوں اسٹیج تے متعارف کرانوݨ دا سنگ میل بݨیا.ایں ڈرامہ دا بنیادی مقصد سرائیکی قومی شعور جڳاوݨ تے وسیب کوں قومی جدوجہد سانگے اشاک کرݨ ہا.

اوندے بعد ہک ٻیا ڈرامہ "آؤ کوڑ کٹوں" ریلیز تھیا جیندے وچ مرحوم ایم ڈی گُل نے وی کم کیتا اتے جاوید حفیظ ملک، غفور ملک، منظورملک، انیلہ ناز، حافظ سجاد اتے ٻے اداکاراں نے بھرپور پرفارمنس ݙتی اتے، ایں ڈرامے دا موضوع وسیب دے سماجی ایشوز ہن اتے ایکوں بھرپور پزیرائی ملی.غفور ملک دی محنت دی توں اڄ سرائیکی اسٹیج ڈرامیاں، سرائیکی فیچر فلماں وغیرہ دے دنیا بھر وچ مشہوری تے دُھم مچ ڳئی. شوبز وچ انہاں دی خدمات تے کم اُتے لکھݨ ٻہیجے تاں ہک ٻہوں طویل فہرست اے جیندا احاطہ کرݨ ایں مختصر مضمون وچ ممکن نہ ہوسے.   

سرائیکی فلمز تے اسٹیج دی وݙی تعداد وچ سنگر، ستارے غفور ملک نے ہی متعارف کرائے، جیندے وچ اکرم نظامی، شاہد آکاش، فیضو کُکڑ باز سمیت ڈھڳ سارے آرٹسٹ شامل ہن.

مرحوم منیر دھریجہ دی زیر ادارت خانپوروں اوں ویلے دے سرائیکی قومی اخبار "ݙینھ وار جھوک" دے کراچی سندھ کیتے بیورو چیف مقرر تھئے اتے انہاں ماں ٻولی دی خدمت دے جذبے نال جھوک اخبار دی ٻہوں خدمت کیتی. اوں زمانے وچ جھوک ٻہوں پاپولر ہائی اتے  ہک قومی اخبار سمجھیا ویندا ہائی.  کیونجو غفور ملک  دا تعلق ایڈورٹائزنگ دے شعبے نال ہائی تاں جھوک اخبار کیتے مستقل بنیاداں تے وݙے وݙے کمرشل اتے سرکاری اداریاں کنوں اشتہار ݙیوائے. میں تاں اے وی آکھساں جھوک اخبار کوں مقبول عام بݨاوݨ ایکوں کامیاب کرݨ وچ مرحوم غفور ملک دا ٻہوں وݙا تے اہم کردار ہائی. کراچی دی ہر مشہور جاہ تے جھوک اخبار دی سرکولیشن ممکن بݨائی.

غفور ملک نے شوبز دی دنیا وچ سرائیکی کلچر کوں پروموٹ کرݨ کیتے بین الاقوامی معیار دا مہینہ وار رسالہ "روہی" دا وی اجراء کیتا اتے وسیب دے فنکاراں دا ٹیلینٹ دنیا وچ متعارف کرایا.

غفور ملک نے یو ٹیوب تے وی سرائیکی کلچر کوں پروموٹ کرݨ کیتے "روہی گولڈ" دے  چینل بݨایا جتھاں سرائیکی لوک گیت، قومی گیت، ڈرامے وغیرہ دی ہک وݙی کولیکشن موجود اے.

ورلڈ سرائیکی آرگنائزیشن World Saraiki Organization بݨائی اتے ایں پلیٹ فارم دے ذریعے سرائیکی کلچر کوں خلیجی ممالک وچ متعارف کرایا.

UAE/Dubai

وچ سب توں پہلے سرائیکی کلچرل پروگرام کرانوݨ دا اعزاز وی غفور ملک دے ناں اے.

کلچر، موسیقی، آرٹ دے نال نال غفور ملک نے سرائیکی قومی اتے سیاسی ایشوز وچ وی اپݨا بھر پور رول ادا کیتا.

انہاں دا ہر عمل/کم بھانوے اسٹیج، ٹیلی فلمز، گیت کوئی فارمیٹ ہووے انہاں دے لاشعور وچ اے ڳالھ ہوندی ہائی جو ہائی جو انٹرٹئینمنٹ دے نال نال سرائیکی ایشوز کوں کینوے اجاگر کیتا ونڄے اتے وسیب دی عوام وچ قومی شعور دا احساس ݙیوایا ونڄے.

انہاں دی سرائیکی قومی ایشو نال جڑت دا اتگوں اندازہ لاتا ونڄ سڳدے جو سرائیکی ایشوز تے مختلف قومی سیاستداناں دے بیانات مکمل تصدیق نال کٹھے کرتے ہک کتاب چھاپی جیندا ناں "اعتراف" اے.ایں کتاب سرائیکی قومی تحریک کیتے ٻہوں ایمیت دی حامل اے.

غفور ملک اپݨی ذات اتے عمل نال ثابت کیتے جو او سرائیکی وسیب دے سچے اتے کھرے سوجھواݨ ہن اتے سرائیکی زبان و ثقافت کیتے انہاں دیاں بے لوث خدمات انہاں کوں تاریخ وچ ہمیشہ زندہ رکھیسن.

اللہ سئیں دا بخش ہوونے شالا. مولا کریم انہاں کوں جنت الفردوس وچ اعلی مقام عطا فرماوے آمین

عبید خواجہ

صدر

انٹرنیشنل سرائیکی کانگریس

یو ایس اے