TDCPدے دفتر دا حال

خمیس وار 20اگست کوں اساں چھی سیلانی ظہور دھریجہ دی اڳوائی وچ گلبرگ IIIدی لبرٹی مارکیٹ دے نیڑے TDCPدے دفتر دے ٻاہر ٹھیک پنج وڄے پُڄ ڳیوسے۔ حالی اندھارا ہا ۔ فجر دیاں بانگاں مِلدیاں پیاں ہَن ۔ اِتھّاں کراچی توں آوݨ آلے ساݙے تراے سنگتی سیلانی ساݙے کنوں وی پہلے موجود ہَن ۔ صرف فرید پیرزادہ دی تانگھ ہئی ۔ اُنہاں ہک گھنٹے پہلے آوݨ دی اطلاع ݙتی ہئی تے موبائل آن کیتا ہا ۔ TDCPدا دفتر حالی بند ہا ۔ پندرھاں ویہ پاندھی ساݙے وانگ ٻاہر تھڑیاں ‘ فٹ پاتھ تے بینک دیاں پوڑھیاں اُتّے ٻیٹھے ہَن ۔ بانگاں مِلدیاں ریہاں تے اساں بانگاں ݙیندے ریہوسے۔ کُئی بندہ وی نماز لئوں نہ اُٹھیا ۔ ساکوں TDCPآلیاں ساڈھے چار وڄے آوݨ دا نادر شاہی حکم کیتا ہا جِہڑا ٹکٹ اُتے لکھیا ہویا ہا ۔ تقریباً 5:30وڄے دفتر دا پہلا ملازم پُڄا۔ بند جندرے کھولے ڳئے دفتر دا دَر کُھلیا ۔ وَل چوکیدار تے سکیورٹی گارڈ گدّی سنبھالی۔ چوکیدار ہُݨ ٹکٹ چیک کرکے ہک ہک سیلانی کوں اندر آوݨ دی موکل ݙتی۔ گریڈ ون دے اُوں ملازم Detectorلا لا کے سیلانی دے اندر ٻاہر دا حال چاتا اَتے نِکّے دَر دی نِکڑی طاقی کنوں سِر سَٹ کے اندر ونڄݨ لئوں آہدا ڳیا۔ اَساں ساریاں ٹکٹاں جمشید دھریجہ دے حوالے کیتیاں ۔ سئیں پیرزادہ اپݨاں پاسپورٹ ‘ شناختی کارڈ ‘ سفر دا ٹکٹ آپ چاتی ودّے ہَن ۔ ساݙی حیثیت ہُݨ ہک ڈیلیگیٹ دی ہئی ۔ اندر پُڄ کے ݙٹھا جو واری واری ملازم آندے پئین ۔ کجھ وَل وی نہ آئے ۔ اُنہاں کوں موبائل تے سݙیا ڳیا ۔ کجھ چُھٹی تے ہَن ۔ برحال چھی وڄے تئیں سارے ملازم تاں آ ڳئے ہَن پر فرید پیرزادہ حالی تئیں نہ پُڄے ہَن ۔ پہلے اساں 9بندیاں دا سمان تول کے Tagلائے ڳئے ۔ ساکوں ٹکٹ دی ہدایت موجب 180کلو سامان دی موکل ہئی پر ساݙا سمان صرف103کلو تھیا ۔

ٹکٹ مطابق ہدایتاں

پاکستان دی طرفوں

20کلو مع مونڈھے آلا تھیلا

70/-روپے فی کلو زائد سمان تے

2000/-روپے کرایہ

ہندوستان دی طرفوں

20کلو مع ہتھ آلا سمان

60روپے فی کلو زائد سمان تے (پاکستانی107/-روپے)

1500/-روپے کرایہ (پاکستانی2678/-روپے)

پاکستان آلیاں ساݙے سمان کوں چیک کیتا ۔ تبادلے دی رقم مطابق ہندوستان دی ٹکٹ پاکستانی روپیاں وچ2678/-روپے ہے پر پاکستان آلے صرف ݙو ہزار گھندن (ہندوستانی1120/-روپے بݨدن) ۔ ہندوستان آلے زائد سمان تے فی کلو پاکستانی 107/-روپے گھندن ۔ پاکستان آلے صرف70/-روپے گھندن (ہندوستانی39.20روپے) ہندوستان دے عملے دا رویہ زیادہ کوڑا ‘ پِھکاّ تے سخت ہا۔ پر پاکستان آلا عملہ نرم دِل تے مہربان ہا ۔ ہندوستان آلیاں آوݨ ویلے الڳ بیگ دے میلے کپڑیاں ‘ استعمال دیاں پُراݨیاں جُتیاں دا وی وزن کیتا۔ واپسی ویلے میݙا خیال ہا جو وزن ودھ پیا تاں میلے کپڑے تے جُتیاں اُنہاں کوں دان کیتی آساں۔ پُر شکر تھیا جو ساݙا وزن حالی گھٹ ہا ۔ شئیت ساݙیاں جُتیاں اُنہاں دے نصیب وچ نہ ہَن۔

ٹکٹ مطابق راہ وچ رُکن دیاں جائیں ایہ ہِن:

(1)۔نرھان۔ ست وڄے TDCP توں ٹُرے۔ نرھان اَٹھ وڄے واہگہ دے TDCPریسٹورنٹ وچ کرایا ڳیا (18ک م دے سفر تے)

6-(1) وڄےDTC(دہلی ٹرانسپورٹ کارپوریشن) دے دفتر توں ٹُرے تاں 8:30وجے ہریانہ دے ٹورسٹ کمپلیکس تے 165ک م دے سفر دے بعد نرھان کرایا ڳیا(ݙسو شوگر دا مریض کیا کریسی)

(2)۔پشاپ کرݨ دی جاء۔ منگولیا کرتار پور ٹورسٹ (پنجاب) کمپلیکس 10:50 تے ۔ تقریباً 90ک ۔م بعد (1:30گھنٹے دے سفر دے بعد)

(2)۔سرہند۔ پشاپ کرݨ کیتے رُکے 10:30تے ۔تقریباً120ک ۔م بعد(1:30گھنٹے دے سفر دے بعد )

(3)۔ کھاݨاں ݙوپہراں ۔ فلو ٹنگ ریسٹورنٹ سر ہند ہریانہ (پنجاب) 2:20تے

(3)۔ کرتار پورمنگولیا کمپلیکس1:00 وڄے۔ نرھان تے کھاݨے وچ ایہ وقفہ مناسب ہا ۔ اِتھوں واہگہ تقریباً90ک۔ م ہے ۔1:30تے روانگی تے 3:20تے واہگہ پُڄ ڳیوسے۔

(4)۔ دیگر دی چاہ۔ 4:15پپلی ٹورسٹ کمپلیکس ۔اڳوں دِلی دا سفر تقریباً 165 ک۔ م ہا۔6:30تے دِلّی پُڄ ڳیوسے۔

(4)۔ پاکستان وچ 5:00وڄے TDCPدے ریسٹورنٹ وچ واہگہ بارڈر تے۔

……………

لہور وچ TDCPدے دفتر دی حالت کُئی خاص کوئنیں۔ سیلانیاں دے ٻہݨ کیتے کُئی انتظام کوئنیں پر دلّی (DCP)وچ سمان دی پڑتال دے بعد یاتریاں کوں ہک کمرے وچ ٻلھایا ڳیا تے چاہ وی پلائی ڳئی ۔

لہور دفتر وچ TDCPدیاں ݙو پاکستانی بساں کھڑیاں ہن۔6:15اُتے فرید پیرزادہ پُڄ ڳئے ۔ سمان دی پڑتال ‘ وزن ‘ ٹیگ دے مرحلیاں توں گزرے۔ 6:30اُتے یاتریاں کوں بورڈنگ کارڈ جاری کیتے ڳئے ۔ ایں توں پہلے سمان دا وزن کرکے سمان کوں پڑتالیا ڳیا ہا تے ٹیگ لائے ونڄ چُکے ہَن ۔ ہُݨ سمان TDCPدے حوالے ہا ۔ ساکوں نالوں وی نہ پھرݨ ݙیندے ہَن ۔ سَت وڄے سارے یاتریاں کوں بس وچ ٻہݨ دی موکل ملی ۔ ہک ہک ٹھڈی بوتل منرل واٹر دی نال ݙتونیں۔ اَتے7:10تے بس دِلّی دو ٹُر پئی۔

فرید پیرزادہ دے آوݨ دے بعد ساݙا ڈیلیگیٹ مکمل تھی ڳیا ہا ۔ اساں فینصلہ کیتا ہا جو شناختی کارڈ بارے ڳالھ صرف ظہور دھریجہ کرن کیوں جو اوہ وی شناحتی کارڈ گھن کے ویزے لواوݨ اسلام آباد نال ڳئے ہَن ۔ فرید پیرزادہ وی کُئی ڳالھ نہ چھیڑی۔ سارا سفر گزردا ریہا کئیں وی اپݨے شناختی کارڈ دا ذکر نہ چھیڑیا ۔ اے تئیں جو اساں لہور وَل آ کے گھر پُڄ ڳیوسے۔ ساݙے نویں شناختی کارڈ کیویں بݨے اَتے ہر بندے کوں کِنہاں مرحلیاں کنوں گزرݨا پیا ایہ ہر یاتری دی الڳ الڳ رام کہاݨی ہے۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان