21ویں صدی اچ زندگی دی ہک سویل

مستقبل دا ہک منظرنامہ

جنوری 2100۔وقت -ساڈھے چھی  وڄے

تُساں پچھلی رات توں مِٹھی نندر سُتے پیو۔ اچانک چھی وڄے کمرے دی ہک دیوار ٹی وی سکرین بݨ ویسی۔ ہک سونہڑاں چہرہ سکرین تے ظاہر تھیسی تے اپݨی مِٹھی آواز اچ آکھسی جو میں تواݙی خادم آں تے او درخواست کریسی جو ہݨ جاڳ پووو تواݙے دفتر اچ تواݙی ضرورت اے۔ تساں بسترے توں اٹھسو باتھ روم ویسو۔ جونہی باتھ روم اچ داخل تھیسو تاں باتھ روم دے شیشے، سِنک تے دیواریں اچ ہزاریں دی تعداد اچ پروٹین تے ڈی این اے دے سینسر جاڳ پوسن تے تواݙے ساہ تے پاݨی کوں چیک کریسن جو کوئی بیماری والے جراثیم تاں نئیں۔ جونہی تساںٻاہر نکلسو تاں تواݙے سر دے آسوںپاسوں کجھ تاراں ہوسن جیندے نال تساں صرف سوچ تے اپݨیں گھر کوں کنٹرول کریسو، کوئی موسیقی چلیسو، کچن اچ موجود روبورٹ کوں آکھسو جو ناشتہ تیار کرے، اپݨی مقناطیسی کار کوں آکھسو جو گیراج کوں چھوڑ تے ٻاہر آ ونڄے تے اپݨے کمرے دا ٹمپریچر سیٹ کریسو۔ ولا تساں ناشتہ کریندئیں ہوئیں اپݨی اکھ اچ پاتے ہوئے لینز دے نال انٹرنیٹ استعمال کریسومطلب اکھ جھپکݨ تے آن لائن تھئے ویسو۔ کافی پیندئیں ہوئیں خبریں دیاں ہیڈلائناں تواݙے اڳوں ہوا اچ ایل سی ڈی بݨ تے آ ویسن۔ اوندے بعد اپݨے مکان دا حفاظتی نظام چلا تے کار اچ ٻہسو تے کار خود تواکوں تواݙے دفتر پڄا ݙیسی۔     

وقت دا سفر  [TIME TRAVEL]

ٹائم ٹریول دا خیال وݙا من بھاوݨاں ہے اے خیال آئن سٹائن دے نظریہ اضافیت دا نتیجہ ہے۔ ہاکنگ نے اے ݙسایا جو گزریے ہوئے وقت دا سفر کرݨ ممکن کینی لیکن آوݨ والے وقت اچ سفر کیتا ونڄ سڳدے۔ وقت دا اے سفر 5 سائنسی طریقیں نال کیتا ونڄ سڳدے۔

حوالہ

کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان