21؍اگست آݙت وار
راند موجب سویلے چیڑیاں دے چِلکار نال اَکھ کُھل ڳئی ۔ سُبھاش متریجا سئیں ساکوں نرھان کراوݨ بھون آڳئے ہَن ۔ اَڄ اساں میانوالی ڈسٹرکٹ ایسوسی ایشن دے جنک پوری سیکٹر دے کٹھ وچ خاص ممھان ہاسے۔ نرھان کرکے اساں تیاری کیتی اَتے 10:15تے بھون وچوں نِکل ڄلیوسے ۔ نال اِی ݙہ پندرہ منٹ دے سفر تے میٹرو سٹیشن راجندر پلیس ہئی۔ پیریں ٹُردیں اُتھاں پُڄ ڳیوسے۔ میٹرو ساکوں گھن کے اُبھے کن ٹُر پئی ۔ تِلک نگر دے سٹاپ دے گیٹ نمبر3تے ڈاکٹر راج کمار سئیں تے اُنہاں دے سنگتیاں ساکوں جی آیاں کوں آکھیا ۔ ساݙا سواگت کیتا تے کاراں دے ذریعے جنک پوری سیکٹر تئیں گھن ڳئے ۔ اِتھاں لارنس پبلک سیکنڈری سکول وچ آل انڈیا میانوالی ڈسٹرکٹ ایسوسی ایشن (رجسٹرڈ) دے جنک پوری سیکٹر دا اجلاس ہئی ۔ اَج اُنہاں دی ڈائریکٹری 2009ء دے نویں چھاپے دی مُکھ ݙکھالی تقریب ہئی ۔ اجلاس اُنہاں پہلے مِتھیا ہوئیا ہا پر ساݙے آوݨ دے بعد اُوکوں خاص استقبالی رنگ ݙے ݙتّا ڳیا ہا۔
حوالہ
[لکھو | ماخذ وچ تبدیلی کرو]کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان