’’ تتی رو رو واٹ نہاراں ‘‘ استاد حسین بخش خان ڈاڈھی

ہندوستانی ٹی وی چینل تے نویں گلوکاریں کوں اڳوں گھن آوݨ سانگے پروگرام چلدن ، نینگر چھوہَر تے چھوہریں وچاڳ ڳاوݨ دے مقابلے تھیندن ، وݙے گلوکار، موسیقار جج بݨدن ۔ ہک ݙینھ سوہݨے سوہݨے شکلیں آلے نینگر تے نینگریں ڳاوݨ سݨائے تے اپݨے فن دا مظاہرہ کیتا۔ سݨیوسے تاں ہک توں ہک آل و آل ہا۔ جیرھا آوے ایویں لڳے اے جھُݨ ویسے تے بازی چا ویسے ۔ ہک سانولا سلوݨا نینگر آیا اوں قدیم سرائیکی کافی ’’ تتی رو رو واٹ نہاراں ، کدی سانول موڑ مہاراں ‘‘ ایجھی سوہݨی دِھر نال آکھی جو مہان استادیں دے بھرے مجمعے وچ واہ واہ تے بھل بھل تھی ڳی ۔سچ تاں اے ہے جو جݙاں او ڳمدا کھڑا ہا اوندے اُتے بے خودی دی کیفیت ہئی۔ سارے جج ہک ہک لوظ تے ہک ہک بٖول تے جھمدے ہن تے داد ݙیندے ہن۔ اجٖاں ڳاوݨ مُکا نہ ہا تے ہک جج  گجرا پہلے چائی کھڑا ہا تے سانولے سلوݨے نینگر دا مَتھا ونڄ چمیا تے آکھیا ’’ آواز بھی کمال کی ہے لیکن اس میں سب سے بڑا کمال زبان اور موسیقی کا ہے۔ یہ بڑے گھرانے کے کسی بہت بڑے موسیقار کا شہکار لگتا ہے، یہ بتاؤ یہ کونسی بھاشا ہے اور کس مہان گائیک کے رنگ میں آپ نے گایا ہے۔ ‘‘

سانولے سلوݨے نینگر گلوکار آکھیا ’’ میں نے استاد حسین بخش خان ڈھاڈھی کے انگ میں سرائیکی بھاشا کی کافی گائی ہے۔ ‘‘

ہر پاسوںتاڑیاں وجٖݨ پئے ڳیاں ، واہ واہ تھیوݨ پے ڳی ۔ سارے ججیں اوندا متھا چمیا تے شائقین دیاں تاڑیں ے واہ واہ بس تھیوݨ وچ نہ امدی ہئی۔ اتھاں میں نال بٖیٹھے ہوئے سنگتیں کوں آکھیا جو اساں جینکوں گھر دا پیر چُلھ دا وٹا سمجھدوں اوندی بٖاہر شان تے کیا قدر ہے ۔

حسین بخش خان ڈاڈھی سرائیکی دا بٖہوں وݙا گائیک ، اونکوں ستارہ ریاست آکھیا ویندا ہا۔ اوں سرائیکی کوں اوں ویلے منوایا جݙاں سرائیکی دا ناں چاوݨ آلے نہ ہوندے ہن۔ ڳاوݨ دا اوندا اپݨا وکھرا انداز تے وکھری دِھر ہئی۔ اونکوں علم موسیقی تے دسترس تے ملکہ حاصل ہا۔ ایجھے لوک روز روز نی بلکہ صدیاں بعد پیدا تھیندن ۔او سرائیکی موسیقی دا ہک عہد ہا۔ اوندے بٖال سخاوت علی خان ، شرافت علی خان تے اوندیاں دھیاں دیاں سوہݨیاں آوازاں ہَن پر حسین بخش خان بس ہک ہا ،اوجھا نہ جٖئے تے نہ جٖمسے ۔

حوالہ

معروف سرائیکی لکھاری سئیں ظہور احمد دھریجہ دی کتاب (سرائیکی اجرک) وچوں چوݨ