ݙیݨ غلامی

راج کمار ملک ایہ نظم پاکستان کوں گھن ڳئے ہِن:

ݙیݨ غلامی ویندی پئی ہے

اگلٖے ہفتے دِلّی ہئی ‘ گھنٹہ گھر تے مِلّی ہئی

صحت ݙاڈھی ڈِھلّی ہئی

کُجھ رُنّی کجھ کِھلّی ہئی

ٹھڈے ساہ بھریندی پئی ہے

ݙیݨ غلامی ویندی پئی ہے

آئے تھی ڳن ݙڈھ سو سال

سر تے تھی ڳن چِٹّے وال

ݙیراں کوں سݙویندی پئی ہے

پیکے خط بھڄویندی پئی ہے

ݙیݨ غلامی ویندی پئی ہے

کٹّھے کرکے زیور ڳاہݨے

کپڑے لِتّے پُراݨے ٻاݨے

پلنگ پِیڑھے سَوّڑ سِراݨے

لوݨ مسالے چاول داݨے

ہتّوں پتّوں لیندی پئی ہے

ݙیݨ غلامی ویندی پئی ہے

1947ء کنوں اڳیّ دے غلامی دے زمانے کوں ایں نظم وچ ݙاڈھا سوہݨاں بیان کیتا ڳے۔

اُنہاں دے کمپیوٹر وچ ہک پُراݨے ہندو شاعر تیجا رام موجّی دیاں نظماں وی موجود ہَن۔ ’’موجیؔ خیر پور سادات (علی پور)ضلع مظفرگڑھ دا شاعر ہا ۔ پاکستان بݨݨ ویلے ہندوستان چلا ڳیا ۔ اوندا کلام ملتان وچ فیض بخش ‘ ذوالفقار دے ادارے نے چھاپیا ہا۔ بعد وچ ایں کلام کوں دلنور نور پوری دے ادارے وی چھاپیا ۔

اوندی نظم ’’پیسہ‘‘ دا حوالہ سئیں ڈاکٹر مہر عبدالحق اپݨی کتاب سرائیکی لوک گیت (1984ء) وچ صفحہ99اُتّے ݙتّے پر ایں نظم دے صرف8بند لِکھِّن۔ ڈاکٹر مہر عبدالحق شاعر دا ناں ’’من موہن‘‘ لکھے (جہڑا غلط ہے) راج کمار ملک میکوں کمپیوٹر اُتّے نظم ݙکھالی۔ نظم طویل ہئی ۔ میں اُنہاں کوں آکھیا جو ایں نظم دا پرنٹ کڈھ ݙئیو۔ اُنہاں ایہ پرنٹ دان کیتا۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان