ݙنبھݨ آلے پیر

اسیݙی وستی ء ِ چ گھوڑی آلے پیر اَمدے ہَن ، لوہے دے بݨیے ہوئے ݙنبھݨے چئی ودے ہوند ے ہَن ، اَکھیندے ہَن زناوریں  کوں  ݙنبھݨ نال بیماری نیڑے نی اَمدی ۔بھاہ دا مچ مچدا ہا ،ݙنبھݨ آلا لوہے کوں  بھاہ ء ِ چ سرخ انگارا کرتے ݙاند منیہہ یا ڳائوں  دی ستھل تے مریندا ہا، ݙنبھݨ آلی جاہ دا چَم لہہ ویندا ہا تے رَت وہݨ پئے ویندی ہئی ۔ کئی زناور ترپ مار تے کلّہ ترڑوا ویندے ہَن تے انہاں  شودیں  دے رنگاٹ ہوندے ہن۔ پیر داݨے وی گھندا ہا تے ٻوہل وی ۔روٹی مانی چاہ پاݨی تے سیوا داری انج تھیندی ہئی،اوں  ویلے اے منظر ݙیکھ تے سریراں  چڑھدیاں  ہَن ، اَج سمجھ اَئی اے تاں  پتہ لڳدے جو ݙنبھݨ آلے پیر ٹھڳ دے نال نال ظالم وی ہَن ۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان