ݙاݙا کٹو خاں بزدار

ڈاڈاکٹو خان بزدار ساڈی نال آلی وستی دے بزرگ ان تے پارٹیشن دے ویلھے نینگر ہن. اھدن. . . . . "جڈاں بھگی پئی تاں میں بھوگی آلے تیں مال چریندا ودا ہم، بھوگی آلے تیں سارے کراڑ رہندے ہن ، پتا نئیں کون لوک آن پئے انہاں شوداں کوں ماریو نیں. . رملی بھرا گھروں بھجدا آیا تے آکھیوس مال گھر ولا جل ڈاکا پئے گئے. . . اساں ڈونہاں بھرا مال ہکل تیں گھر واڑی اچ آ ڈھکیوسے. . نماشاں ویلھے کراڑ تے کراڑیاں شودیاں اپنڑے گھر چھوڑ لکدے ودے ہن . .اساڈے مال دے بھانڑے اچ آن لکئے تاں رملی بھرا ٹکر ونج ڈتا پر انہاں شودیاں نہ کھادا بکھے پئے رہ گئے. . ہک ڈو ڈینہہ بعد ڈوگرے آئے تے انہاں شودیاں کوں نال گھن گئے. . ابا ڈوگریاں دی فوج ہئی جیویں اتھاں ہنڑ پولیس اے ایویں فوج ہوندی ہئی او کئی بئی زبان الیندے ہن. . . کراڑ ایہا اساں آلی بولی کریندے ہن ایہا جٹاکی. . ڈاڈھے چنگے جوآن ہن . . گورے وی ڈٹھے ہم جلسے تیں مال نیندے ہاسے اتھاں گورے صاحب ودے ہوندے ہن رتے لال جوآن ہن پتلیاں بھوکاں. . . ہک کراڑ ہوندا ہا ٹھاکر داس وڈا زمیندار ھا فوجے دی وستی دا. . . چالیہ پنججھا گھوڑی ہوندی ہس سٹھ کھوہ دا مالک ہا ، بھگی آلے ڈینہاں اوندے پتر تارے کراڑ میرو وڈانی دا نک کپ گھدا . اہدن جو میرو اوندی گھوڑی کھسندا پیا ہا. . .بئے کوئی کراڑ کائناں بھڑیۓ ہن مسلماناں نال. . میرو وڈانی ہنڑ تئیں جیندا رہ گئے نک تیں بنڑماں رکھی ودا ہوندا ہا بھاڑی. . . ناں اساں کراڑاں دی ہک سوئی وی ناں چاتی. . کراڑ وی اساڈے جہیں جھمر کھیڈدے ہن ڈوہڑے وی اہدے ہن جھمر اچ. . . ورت ورتارے دے پاسوں ڈاڈھے چنگے ھن ، چوٹی گھیو ویچنڑ ویندے ہاسے کراڑاں کن تاں تھاں خالی نہ ہن ولیندے ، گھیو آلے تھاں اچ کجھ نہ کجھ سٹ چھوڑن ہا تھاں دا آدر کریندے ہن. . ." . (کلھ سلطان بزدار تے میں ڈاڈے کٹو کوں رج کے سنڑیا اوندیاں گالھیں ڈاڈھیاں چسولیاں لگیاں. .)

(بلال بزدار، ٣ اپریل ٢٠١٧ء)