ݙاݙا سئیں

ݙاݙا سئیں بیمار تھئے تاں چاچے سئیں کوں آکھیا پُتر! میں بیمار ہاں تاں پتا نی بچاں نہ بچاں مَیں آہداں بھرا اپݨے محمد اجمل کوں بندہ بھیج تے سݙوا چا ، چاچے سئیں آکھیا جیا ! ابا جی ضرور ، او ترائے(3)ݙینہ (ݙاݙا سئیں) آہدے رہیے پُتر اپݨے بھرا کوں سݙوائے وے ، چاچا سئیں روز ایہو جواب ݙیون جیا ۔ ابا جی بندہ بھیجی بیٹھاں پتا نی بھرا کیوں نی آندا پیا ؟ تریجھے ݙینہ دے بعد ابا جی کوں ݙاݙا سئیں دی بیماری دا تار مِلیا اوں ݙینہ ہی ݙوپہراں کوں بندہ آڳیا ۔ ݙاݙا سئیں دی وفات دی اطلاح ݙیوݨ کیتے ۔ ابا سئیں فوراً روانہ تھی ڳئے ۔ اُتھاں ڳئے تاں لوکاں ݙسایا جو تہاݙے ابا سئیں ولا ولا آہدے ہَن اچھا محمد اجمل مَیں تیݙا ٻہوں انتظار کیتے پتا نی توں کیوں نی آیا ۔ میکوں ہُݨ گناہ کائنی جو میں تیکوں امانت نہ ݙتی ، میں ٻہوں کوشش کیتی ہَم ، چاچا سئیں دا انصاف ایہ تھیا۔ جو کجھ ہوسی ۔ ابے سئیں دا تاں انھاں دا کفن دفن وغیرہ دا سارا خرچ میں کیتے ہُݨ مزید کجھ نی جیکوں اساں تقسیم کرݨے ۔ ابا جی آکھیا ٹھیک ہے بھئی جان وݙے بھرا ہیوے تساں جو تہاݙا فیصلہ ہے منظور ہے میکوں۔ ابا سئیں کِتی ݙینہ ایہا ڳالھ یاد کر کر تے عورتاں وانگوں روندے ہَن ، جو ابا سئیں آخری ویلھے مایوس تھی کراہیں ایہ الفاظ آکھیے ۔ اچھا محمد اجمل مَیں تیݙا ٻہوں انتظار کیتے توں نی آیا ۔ ابا سئیں آہدے ہَن میکوں ایہ ارمان ساری حیاتی رہ ویسی ۔

چاچا سئیں تھاݨیدار ہَن اَتے ابا جی کنوں عمر اِچ وݙے ہَن ۔ ابا جی ایں سانگوں اپݨے بھرا دا ٻہوں احترام اَتے عزت کریندے ہَن ۔انھاں اپݨے پُتراں کوں ایمرسن کالج اَتے ایچی سن کالج وچ تعلیم ݙیوائی ، انھاں دے پُتر ہوائی جہاز اُتے سفر کر تے پڑھݨ ویندے ہَن اَتے انھاں دے خیالات ستویں اَسمان اُتے رہندے ہَن۔

حوالہ

کتاب: رَلے پندھ کریسوں ، مصنّف: زاہدہ اجمل ہاشمی، چھاپہ خانہ : جھوک پرنٹرز ملتان