ݙاکہ

چوری تے ݙاکے دے واقعے اَݨ ڳیݨویں  ہِن ، پر میں  جیرھے ݙاکے دی ڳالھ پیا کریندا ں  او ہک نظم ہئی جینکوں  ڳڑھی اختیار خاں  دے احسن فقیر لکھیا ہا ۔ اے نظم تقسیم دے ویلے دی ہئی ،کِراڑ ویندے پے ہَن تے ڈھیرلوک ہنائیں  کوں  ٹیشݨ تے ونڄ تے امن امان ٻلہا اَمدے ہَن تے کجھ لوک ݙاکے وی مریندے ہَن ۔احسن فقیر ایں  بھاڄڑ دا سارا حال لکھیا ہا ۔ احسن فقیراسیݙی وستی رجبی تے وی اَمدا ہا تے اونویں  اَمدیں ویندیں  ابّے کوں  ملدا ہا ۔ اپݨا کلام سُݨیندا ہا ، ہر جاہ تے ݙاکے دی فرمائش تھیندی ہئی ۔ میکوں  یاد کائنی جو احسن فقیر دی نظم ءِچ ذکر ہے یا کائنا پر وݙے ݙسیندن جواسیݙی وستی دے  جُنگ کھوہ تے کِراڑیں  کوں  لُٹیا ڳیا ہا تے ہِک کِراڑ کوں  مار تے کھوہ ءِچ وی سٹیا ہانے ۔ ٻیا ݙاکہ دھریجہ پھاٹک تے تھیا ہا ۔ایویں  ڈھیر سارے واقعے ہن۔ احسن فقیر دی  نظم ءِچ وݙیاں  سوہݨیاں  بحراں  ہَن ، ہک لائن میکوں  ہُݨ وی یاد کھڑی ہے جو ’’دین پوریں  دے ٹین کھڑک ڳے جے تئیں ڳے کھڑکیندے‘‘۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان