یاری نہ لاوݨی تھی

غلام حیدریتیم جتوئی بہشتی آکھیا ہا :

یاری نہ لاوݨی تھئی

لوکی کھلاوݨی تھئی

پَر ہُݨ آلے الیکشن اِچ ایں وسیب دی لوکیں تل دے آکڑ مُٹھے ناں دے سیاستدانیں نال جیرھی کیتی اے اُوندے اُتے چھڑی لوکی آپ اِی نی کِھلی سارا جڳ کھلیے ‘ ایہو لیکھا دین دھرم دے ناں تے سیاست دا وَݨج وپار کرݨ آلے لیڈریں اَتے ہُنائیں دیں جماعتیں نال تھے ‘ لوکیں کوں اَپݨی مرضی موجب ’’پرچی‘‘ پاوَݨ دا موقعہ مِلیے تاں ہنائیں ’’ووٹیں‘‘ دی مار ݙے تے ’’مارکے‘‘ کوں مُنجھا گھتیے‘ الیکشن اِچ پنبیڑ پیوݨ دے بعد ’’مارکہ‘‘ جیرھے بیان وَدے ݙیندن او پڑھ کراہیں ملوم تھیندے جو شودے ویڑھے تے ویٻلے تھی وَدِن ‘ وٻلیج تے وَات پٹیندِن ‘ بُتھیاں ڳالھیں مونھ اِچوں کڈھ ٻہندِن ۔ لوک ’’پڑھدِن‘ سُݨدِن اَتے پڑھ سُݨ کراہیں کِھلدِن ‘ لوک ایں ڳالھوں وی کِھلدن جو او ہُنائیں ’’مارکے‘‘ کوں چنڳیں رِیت سُنڄݨیندن ‘ لوکیں کوں ہُنائیں دیاں سبھے کیتیاں کرتیاں یاد اِن ‘ بھوڳ ایہ ہے جو مارکہ لوکیں نال اَپݨا ورتاوا بُھل ڳن ‘ ہُݨ تاں سئیں خواجہ محمد اصغر کوریجہ سئیں اَتے سئیں صدیق کانجو جہیں کوں وی ’’سرائیکی وسیب‘‘ اَتے سرائیکیں دے ’’حق حقوق‘‘ یاد اَمدے پِن ‘ بے واہے ‘ بے وَس ‘ داپھیے ہوئے رے سینکے سرائیکی ہنائیں کوں ہوں ویلھے یاد کائناں ہَن ۔ جیرھے ویلھے ایہ اَپݨے ’’حلقے‘‘ دے لوکیں کیتے حکومت دی طرفوں کوٹے اِچ ملیاں ہویاں ’’ملازمتاں‘‘ تے نوکریاں ‘ روق رقماں گھن تے وِچیندے ہَن ‘ اسیݙے ہِیں تل اِچ کئی ایجھے وی ہِن ‘ جنھائیں کوں الیکشن اِچ ووٹ گھنݨ دی خاطر گھدیاں ہوئیاں رقماں وَلا وَلاوݨیاں پے ڳین ‘ جیرھے تِکھے ہَن او اَپݨے ’’کوٹے‘‘ دیاں ملازمتاں تے ’’نوکریاں‘‘ تھڄوں اُتھاہیں لہور اِچ وِیچ وَٹا کراہیں وَلدے ہن ۔ تل دی وݙی کونسل دے سِرواݨ تے پَردھان رَہ تے اِتھوں دے لوکیں دی جیرھی ’’خذمت داری‘‘ اَتے سیوا ٹہنوال کیتی ہینے ‘ اوندا ’’ریکارڈ‘‘ کنہائیں سرکاری محکمیں کنے ہتھیکا اے ‘ اَتے ’’مارکہ‘‘ ضمانتاں کرائی وَدن۔ ہنائیں دے پِچھوں کئی سرکاری افسر اَتے اہلکار اِی چھک چھٻیڑ اِچ اَئے وَدِن ‘ اُنہائیں کوں ہنائیں دی یاری’’مہانگی‘‘ پی اے۔

یاری نہ لاوݨی تھئی

لوکی کِھلاوݨی تھئی

جمعۃ المبارک 17؍دسمبر1993ء

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان