یاتریاں دا مونہ سڄݨاں دو

ساݙے ڈیلیگیٹ دے ممبراں دا واسطہ الڳ الڳ شہراں نال ہا پر منزل ہک ہئی ۔ مقصد امن تے دوستی ہئی۔ پاک بھارت عوامی تعلقات کوں سرائیکی دے حوالے نال پکا کرݨاں ہا۔ ڈیلیگیٹ دے ممبر انہاں شہراں دے ہَن:

ملتان توں…… ظہور احمد دھریجہ ‘ شوکت مغل ‘ عابد سیال

خان پور توں……جمشید دھریجہ

روہی توں ……موہن بھگت

کراچی توں …… طاہر دھریجہ‘ بیگم طاہر دھریجہ‘ راشد مصطفیٰ خان

لاہور توں……فرید پیرزادہ

اسلام آباد توں ……مجاہد بھٹی

TDCPدی بس ساڈے ݙہ سنگتیاں سمیت 42سواریاں کوں چا کے دفتر توں ٻاہر نکلی تاں اڳوں پِچھوں سکیورٹی ہئی۔ ٻارھاں موٹر سائیکلاں اُتّے 24گارڈ اڳوّں پچھوّں سڄیّ کھٻے نال نال ہَن ۔ ݙو کمانڈو گݙیاں وچ6گارڈ علاوہ ہَن ۔ بس ٹُرݨ آلی ہئی تاں میں کھیسے وچ ہتھ ماریا تاں اٹیچی کیس دے جندرے دی کنجی کھیسے وچ کوئناں ہئی۔ جلدی نال بس توں تلّے لہہ کے ٻاہر فرش تے نظر بھنوائی تاں مِدان صاف ہا۔ اَچوݨ لڳ ڳئی جو واہگہ تے چیکنگ ویلے اٹیچی کیس کیویں کُھلیساں ۔ سنگتیاں کنوں پُچھیا جو کئیں میݙی کنجی چاتی یا ݙٹھی ہووے۔ طاہر دھریجہ آکھیا جو ہک اٹیچی کیس دے جندر ے نال کنجی لڳی ہوئی ہئی اَتے او بکسا اُتّے رکھیا ڳیا ہا ‘ اوہا کنجی تہاݙی نہ ہووے ۔ کجھ دِل جاہی تھئی جو شئیت ایہا کنجی ہوسی۔واہگہ ریسٹورنٹ وچ میکوں نرھان وی چنڳاں نہ لڳا ‘ نہ میں کرنسی تبدیل کرائی ۔ 8وڄے نرھاں دے بعد بس پاکستان دے امیگریشن دفتر تے گھن ڳئی ۔ اِتھاں کلیرنس کیتے سمان لہایا ڳیا ۔ میݙے جندرے نال لڳی ہوئی کنجی مل ڳئی ۔ دل کوں سکون ملیا۔ امیگریشن دے مرحلے مکمل تھئے ۔ پاسپورٹ سکیننگ مشین توںگزارے ڳئے اَتے ݙوجھے (پوادھی) دروازے اُتّے کھڑی اِنڈیا دی بس وچ سمان چڑھایا ڳیا ۔ اِتّھاں ساکوں انڈیا امیگریشن آفس جمع کراوݨ کیتے فارم وی ݙتے ڳئے ۔ اساں جِتھّاں وی لہندے ہاسے خود کوں ڈیلیگیٹ آہدے ہاسے۔ ڈیلیگیٹ کوں انڈیا تے پاکستان ݙو نہاں جائیں تے خاص درجہ حاصل ریہا۔ پاکستانی امیگریشن وچ ایجنسیاں دے بندے موجود ہن ۔ جہڑے آوݨ ونڄݨ آلے یاتریاں ‘ سیلانیاں تے پاندھیاں اُتّے نِگاہ رکھدن۔ ڈیلیگیٹ دا ناں سُݨ کے پاکستانی امیگریشن آلے نال آ ڳئے ۔ ظہور دھریجہ جہڑے ڈیلیگیٹ دے اڳواݨ ہَن اُنہاں کوں سݙ کے سکیورٹی آلے اپݨے بوتھ اِچ گھن ڳئے ۔ مونڈھی ڳالھیں پچھونہیں اَتے ونڄݨ دی موکل ݙے ݙتونیں۔ اَساں آخری وار پاکستان وچ موبائل فون کیتا تے اڳلے سفر تے ٹُر پیوسے ۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان