ہیورون جھیل

ہیورون جھیل

ہیورون جھیل شمالی امریکہ دیاں پنج وݙیاں جھیلاں وچوں ہک ہے ۔ ایندا اُبھا تے پوادھی حصہ کینیڈا دے صوبے اونٹاریو وچ ہے ، جݙاں جو لما تے پچادھی حصہ امریکہ دی ریاست مشی گن وچ ۔ جھیل دا ناں فرانسیسی چڑھی کاراں اتھوں دے تل وطنی لوکاں دے ناں تے رکھیا ہئی جنہاں کوں او ہیورون (Wyandot) دے ناں نال ڄاݨدے ہن ۔ آبیات دے لحاظ نال ، ہیورون جھیل ، جھیل مشی گن-ہیورون دے پوادھی حصے تے مشتمل ہے ، جیڑھا جھیل مشی گن دے برابر سطح تے ہے ، جیندے نال ایہ 5 میل چوڑی (8.0 کلومیٹر) ، 20 فیتھم گہری (120 فٹ؛ 37 میٹر) آبنائے میکیناک نال ڳنڈھیا ہویا ہے ۔ جھیل مشی گن-ہیورون رل تے دنیا دی سب توں وݙی مٹھے پاݨی دی جھیل بݨدی ہے ۔ ہیورونیئن گلیشیئشن دا ناں ہیورون جھیل دے علاقے توں جمع کیتے ڳئے شواہد توں رکھیا ڳیا ہئی ۔ جھیل دے شمالی حصیاں وچ شمالی چینل تے جارجیئن بے شامل ہن ۔ ساگیناؤ بے جھیل دے لمے پچادھی کونے وچ واقع ہے ۔ اہم اندر آوݨ والا پاݨی سپیریئر جھیل توں سینٹ میریز دریا دے ذریعے آندا ہے ، تے اہم ٻاہر ونڄݨ والا پاݨی سینٹ کلیئر دریا دے ذریعے ایری جھیل دی طرف ویندا ہے ۔ ہیورون جھیل دا کافی وݙا نکاسی آب دا علاقہ ہے جیڑھا مشی گن تے اونٹاریو دے کجھ حصیاں تے محیط ہے ۔ ہیورون جھیل وچ پاݨی ٻیاں وݙیاں جھیلاں دے مقابلے وچ تیزی نال ویندا ہے تے اتھاں پاݨی صرف 22 سال تئیں راہندا ہے ۔

جغرافیہ تے طبعی خصوصیات

ہیورون جھیل شمالی امریکہ دیاں وݙیاں جھیلاں دے سلسلے دا حصہ ہے ۔ ایہ جھیل کینیڈا تے امریکہ دی سرحد تے واقع ہے ، جتھاں کینیڈا دا صوبہ اونٹاریو اُبھے تے پوادھی پاسوں ہے تے امریکہ دی ریاست مشی گن لمے پچادھوں ہے ۔ جھیل دی شکل تقریباً لمبی ہے ۔ ایندا پاݨی زیادہ تر بارشاں تے برف پگھرݨ نال آندا ہے ۔

آب و ہوا

ہیورون جھیل دے نیڑے دا موسم براعظمی ہے ۔ گرمیاں وچ موسم معتدل راہندا ہے ، جݙاں جو سردیاں وچ ٹھڈھ ٻہوں ودھ ویندی ہے ۔ جھیل دے اتے اکثر برف ڄم ویندی ہے ، جیڑھی کجھ مہینیاں تک راہندی ہے ۔

حیاتیات

ہیورون جھیل وچ مچھیاں دیاں کئی قسماں پائیاں ویندیاں ہن ، جنہاں وچوں لیک ٹراؤٹ ، سالمن ، وائٹ فش تے والی (walleye) قابل ذکر ہن ۔ جھیل دے نیڑے دے جنگلات وچ وی مختلف قسماں دے جانور تے پکھی وی موجود ہن ۔ اتھاں مختلف قسم دے آبی نباتات وی پاتے ویندے ہن ۔

معیشت

ہیورون جھیل ایں علاقے دی معیشت وچ ٻہوں اہم کردار ادا کریندی ہے ۔ مچھی پکڑݨ ، سیاحت ، تے نقل و حمل اتھوں دی معیشت دے اہم حصے ہن ۔ جھیل دے کنارے آباد شہر جیویں کہ سارنیا ، بے سٹی ، تے الپینا تجارت تے نقل و حمل دے مراکز ہن ۔

تاریخ

یورپی لوکاں دے آوݨ توں پہلے ، ایں علاقے وچ مقامی انڈین قبیلے آباد ہن ۔ فرانسیسی چڑھی کاراں ایں جھیل دا ناں ہیورون قبیلے دے ناں تے رکھیا ۔

ماحولیاتی مسائل

ہیورون جھیل کوں وی ٻیاں جھیلاں وانگوں کئی ماحولیاتی مسائل دا سامنا ہے ۔ آلودگی ، ٻرہیچو پودے تے جانوراں دا داخلہ ، تے موسمیاتی تبدیلی انہاں وچوں کجھ اہم مسائل ہن ۔ آلودگی دی وجہ توں جھیل دے پاݨی دا معیار گھٹ ڳیا ہے تے مچھیاں دیاں کجھ قسماں خطرے وچ ہن ۔