ہینرک اوٹو ویلینڈ

ہینرک اوٹو ویلینڈ

ہینرک اوٹو ویلینڈ (4 جون 1877 – 5 اگست 1957) ہک جرمن کیمیا دان ہا ۔ انہاں بائل ایسڈز وچ اپݨی تحقیق واسطے 1927 دا کیمسٹری دا نوبل انعام جتیا ۔

گزر گزران

1901 وچ ویلینڈ جوہانس تھیلے دے ماتحت تعلیم حاصل کریندے ہوئے میونخ یونیورسٹی توں ڈاکٹریٹ دی ڈگری حاصل کیتی ۔ 1904 وچ انہاں اپݨی ہیبیلیٹیشن مکمل کیتی ، ول یونیورسٹی وچ پڑھاوݨا جاری رکھیا تے 1907 توں بوہرنگر انگیل ہائیم واسطے بطور مشیر کم کرݨ شروع کیتا ۔ 1914 وچ او آرگینک کیمسٹری وچ خصوصی موضوعات واسطے ایسوسی ایٹ پروفیسر تے میونخ وچ سٹیٹ لیبارٹری دے آرگینک ڈویژن دا ڈائریکٹر بݨ ڳیا ۔ 1917 توں 1918 تئیں ویلینڈ ڈاہلم وچ قیصر ولہیم انسٹی ٹیوٹ فار فزیکل کیمسٹری اینڈ الیکٹرو کیمسٹری (KWI) دی خدمت وچ کم کیتا جیندا اوں وقت فرٹز ہابر دی قیادت ہئی ، جیڑھی جو باقاعدہ فوجی سروس دا ہک متبادل ہا ۔ اتھاں او ہتھیاراں دی تحقیق وچ شامل ہا مثال دے طور تے مسٹرڈ گیس واسطے نویں مصنوعی رستے ڳولیندا ہا ۔ انہاں کوں ایڈامسائٹ دی پہلی تیاری دا سہرا وی ݙتا ویندا ہے ۔

1913 توں 1921 تئیں ، او میونخ دی تکنیکی یونیورسٹی وچ پروفیسر ہا ۔ ول او لوڈوگ گیٹرمین دے جانشین دے طور تے فرائیبرگ یونیورسٹی منتقل تھی ڳیا (انہاں گیٹرمین دی مشہور کک بک دی ذمہ داری وی سنبھالی) ۔ فرائیبرگ وچ انہاں ٹوڈ زہر تے بائل ایسڈز تے کم کرݨ شروع کیتا ۔ بوہرنگر انگیل ہائیم دے نال مل تے انہاں مصنوعی الکلائیڈز تے کم کیتا جیویں جو مورفین تے سٹریکنین ۔

1925 وچ ویلینڈ رچرڈ ولسٹٹر دے جانشین دے طور تے میونخ یونیورسٹی وچ کیمسٹری دے پروفیسر بݨ ڳیا ۔

1941 وچ ، ویلینڈ زہر الفا-امانیٹن کوں وکھ کیتا ، جیڑھا جو دنیا دے سب توں زیادہ زہریلے مشروم امانیٹا فیلائیڈز دا اہم فعال ایجنٹ ہے ۔

ویلینڈ کامیابی نال لوکاں ، خاص طور تے یہودی شاگرداں کوں بچاوݨ دی کوشش کیتی جیڑھے جو نورمبرگ قوانین دے بعد "نسلی طور تے بوجھل" ہن ۔ جیڑھے شاگرد "نسلی طور تے بوجھل" ہووݨ دی وجہ توں کڈھ ݙتے ڳئے ہن او ہینرک ویلینڈ دے گروپ وچ کیمیا دان یا "گیسٹے ڈیس گہیمرات" (پرائیوی کونسلر دے مہمان) دے طور تے رہ سڳدے ہن ۔ ہانس کونراڈ لیپیلٹ ، ویلینڈ دا ہک شاگرد ، کرٹ ہوبر دی بیوہ کلارا ہوبر واسطے پیسے جمع کرݨ دے بعد موت دی سزا سنائی ڳئی ہئی ۔

ٹٻر

ہینرک دا پیو ، تھیوڈور ویلینڈ (1846–1928) کیمسٹری وچ ڈاکٹریٹ دی ڈگری نال ہک فارماسسٹ ہا ۔ ایندا پفورزہیم وچ سونے تے چاندی دی ریفائنری ہئی ۔ ہینرک ویلینڈ ، ہیلین بوہرنگر دا کزن ہا ، جیڑھی البرٹ بوہرنگر دی ذال ہئی ، جیڑھا جو بوہرنگر انگیل ہائیم فارماسیوٹیکل کمپنی دا بانی ہا ۔ انہاں 1915 توں 1920 تئیں کمپنی واسطے کم کیتا تے کمپنی دا سائنسی شعبہ قائم کیتا ۔

ایوا ویلینڈ ، ہینرک ویلینڈ دی دھی ، 14 مئی 1937 کوں فیوڈور لینن نال شادی شدہ ہئی ۔

ہینرک ویلینڈ انعام

1964 توں ، ہینرک ویلینڈ انعام سالانہ ݙتا ویندا ہے ۔ پہلے لپیڈز تے متعلقہ مادیاں دی کیمسٹری ، بائیو کیمسٹری ، طبیعیات تے طبی دوائی تے تحقیق کوں ودھارا ݙیوݨ واسطے ، اڄ کل ایہ انعام کیمسٹری ، بائیو کیمسٹری تے طبیعیات دے شعبیاں وچ حیاتیاتی طور تے فعال مالیکیولز تے سسٹمز تے انہاں دی طبی اہمیت تے شاندار تحقیق واسطے ݙتا ویندا ہے ۔ ایہ انعام سب توں زیادہ قیمتی بین الاقوامی سائنس ایوارڈز وچوں ہک اے تے ایندی 50 سال توں زیادہ دی کامیاب تاریخ ہے ۔ ہینرک ویلینڈ انعام 2000 توں 2010 تئیں بوہرنگر انگیل ہائیم ولوں سپانسر کیتا ڳیا ہا ۔ 2011 توں ، ایہ بوہرنگر انگیل ہائیم فاؤنڈیشن ولوں ݙتا ویندا پیا ہے ۔ ایوارڈ حاصل کرݨ والیاں دا انتخاب ہمیشہ ہک آزاد بورڈ آف ٹرسٹیز ولوں کیتا ویندا ہے ۔ 2014 توں ، اینکوں 100,000 یورو نال نوازا ڳیا ہے ۔