ہیرا نند سوزؔ

1922ء تا 2003ء

ہیرا نند سوز 19مئی 1922ء کوں میانوالی وچ پیدا تھئے ، آپ سرائیکی دے علاوہ اردو دے معروف شاعر تے افسانہ نگار ہن۔جݙاں جو 7جنوری 2003ء کوں فریدآباد بھارت اچ آپ دا انتقال تھی گٖیا۔

(1)غزل

جے توں جگنو ہیں تاں کوئی مار سٹیسی تیکوں

جے توں ݙیوا ہیں تاں قبراں تے بٖلیسی تیکوں

سوچ گھن ڈھہہ جو پیا تھک کے تاں آندا ویندا

کوئی وی چا کے نہ تیݙے گھر پُچیسی تیکوں

پار ونڄنْاں ہے تاں ݙوجھاں کوں ہٹانْاں پوسی

بھیڑ وچ وی کوئی راہ نہ ݙیسی تیکوں

انہاں ݙٹھا نی سوا نیزے تے آندا سورج

کون ہُنْ راہ طریقت دا ݙسیسی تیکوں

یار اوں پار تے وچکار گناہاں دی چنانہہ

دل تیݙا کچّا گھڑا ہے تاں بُٖݙیسی تیکوں

سوزؔ حق گٖالھ جے آکھیں تاں زمانہ سُنْ کے

وانگ سقراط دے وت زہر پلیسی تیکوں

(2)غزل

ایں واری جے ساونْ آسی

ہور وی مونجھ ودھاونْ آسی

میݙی وستی سُنڄی مُنڄی

کون ایندے وچ رہونْ آسی

ہڑھ اولڑا ہے نفرت دا

کندھاں کوٹھے ڈھاونْ آسی

کوئی کݙی تاں سورج بنْ کے

سُتّا شہر جگٖاونْ آسی

جیڑھا چھاں ہے غیراں کیتے

میݙے دل کوں تاونْ آسی

اوہے اپنْے آپ توں رُسیا

سوزؔ کوں کون مناونْ آسی