ہک خواہش

ھک خواہش

ایندے وچ کوئ شک نہیں کہ اج توں چالیہہ سال پہلے تاج لنگاہ سئیں فدا حسین گاڈی سئیں ریاض ہاشمی سئیں عاشق بزدار سئیں صوفی تاج گوپانگ سئیں جیہیں ایجوکیٹڈ سنگت نے سرائیکی قومی شناخت حقوق تے علیحدہ صوبہ واسطے اٹھی ہائی اوندا اج نتیجہ اے کہ اج ہر بال ہر جوان ہر بزرگ تک اے شعور پج گے کہ علیحدہ صوبہ ہووے انییں دی سیاسی محنت دا فائدہ پیپلزپارٹی، جنوبی پنچاب صوبہ محاذ تے پی ٹی آئی وارے وارے تے چائندے کھڑن اور اساں سب جانڑدے ہوئیں وی مختلف وفاقی پارٹیں وچ تقسیم تھی وییندوں۔

جییرے ویلہے صوبہ محاذ بنڑیا ہا تے اوں ویلہے اتھوں دے تل وطنی ہوونڑ دی وجہ توں لوکیں انہیں کوں اتنا پیار ڈتا لوک دھڑا دھڑ حمایت دا اعلان کرنڑ لگ گے مگر کیوں جو او سیٹیں دے بکھے ہن اباہل وچ صوبہ محاذ تروڑ تے جلدی جلدی آپنڑی جاہ بنڑاونڑ دے چکر وچ ہک بے دے مخالف تھی گے. ایویں جمشید دستی جس ویلہے علیحدہ پارٹی دی بنیاد رکھی تے وسیب نے انہیں کوں بہوں عزت ڈتی مگر او ایم این اے بنڑڑ دی سیاست تا سمجھدے ہن لیکن پارٹی سیاست دا فنڈہ انہیں دی سیاسی سوجھ بوجھ کنو اتے دی گال ہائی۔

اج اساں اے گال آھدوں کہ سرائیکی تحریک اگلے فیز وچ داخل تھی چکی اے مگر اوندے نویں شکل بنڑاونڑ واسطے تیار کائنسے اوندی مین وجہ سرائیکی پارٹیاں دے ڈھیر وجود وچ آونڑ تے ہک بے دے وجود کوں تسلیم نہ کرنڑ اے ۔ فوٹو وچ تے سٹیج تے اپنڑی نشابر جاہ گھننڑ سانگھے نویاں پارٹیاں بنڑ گن ۔ کلہا کلہا بندہ جینکوں ہمسایہ نہء جانڑدا اپنڑی پارٹی بنڑا تے کھڑے تھیا ۔ ارمان دی گال تے اے ہے کہ او باقاعدہ ڈوجھی باقی سیاسی پارٹیاں تے فتوی وی لیندا کھڑے ۔ جڈاں وسیب وچ زیادہ پارٹیاں بنڑڑ تے تنقید تھیونڑ شروع تھائی اے تے انہیں وت فورم بناونڑ شروع کر ڈتن ۔ جنہیں کوں آپ سیاسی لیکچر گھننڑ دی ضرورت ہائ او خود لیکچر ڈیونڑ شروع تھی گن۔ جنییں دے اپنڑے سیاسی کنسپٹ کلیر کائنی او وی سیاسی پارٹی بنڑا بیٹھن ۔ ادبی ثقافتی تنظیماں سیاست پیا کریندن تے سیاسی پارٹیاں ثقافتی کم۔ اگوں دا سوچنڑ دی بجائے سوشل میڈیا تے ہک بے دے خلاف جنگ وچ وقت ضائع تھیندا پے ۔

میڈی رائے وچ اگر تاں سنجیدہ سرائیکی قوم پرستی دی سیاست کرنی اے تاں وت اے این پی طرز دی سیاست کوں اپنڑے واسطے مشعل راہ بنڑاونڑا پوسے۔ ورکرز تے حامی دی کوئ کمی کائنی۔ کمی اے تے متفقہ لیڈر شپ دی جنہیں دے نظریات تے منزل واضح ہووے ۔ او وقت گزر گے جو اساں سندھ یا پختون خواہ دے مفادات دے محافظ بنڑیے ودے رہوں۔ میڈی نظر وچ سب توں پہلے ملتان شجاع آباد تے مظفر گڑھ کوں فوکس کرتے سیاسی مرکز بنڑایا ونجے ۔ انہاں علاقیں وچ نسبتاً سردای تے برادری سسٹم کمزور اے۔ اگر انہیں علاقے دے وچ اپنڑے مضبوط یونٹ تے ورکر دی زیادہ توں زیادہ کھیپ تیار کیتی ونجے تاں آپنڑی وفاقی سیاست وچ جاہ بنڑا سگدوں. اج وقت اے کہ انہیں علاقے وچ زیادہ توں زیادہ وزٹ کیتے ونجن ۔ ھک نویں سیاسی پارٹی بنڑاونڑ واسطے جذبے دی ضرورت ہوسے نہ کہ فوٹو مافیہا دی. اوندے واسطے اُنہیں لوکیں کوں اگوں تے گھن آیا ونجے جنہیں دی وسیب وچ مؤثر شناخت اے یا مالی طور تے مضبوط ان۔ نال نال ورکرز دا وی کوٹہ رکھیا ونجے

میں سجھداں ک اگر اے لوک ہک مٹھ تھی پوون اور پارٹی بنڑاونڑ دا اعلان کرن تاں وسیب تے انہیں دا احسان ہوسے ۔ رانا محبوب اختر ظہور احمد دھریجہ رانا فراز نون عاشق بزدار حیدر جاوید سید اللہ نواز وینس اسلم خان گورمانی آصف خان محمود مہے مودی

اگر اے لوگ ہک مٹھ تھی تے اللہ دا ناں گھن تے اج ہکو پارٹی دا اعلان کر ڈیون. ہکو متفقہ انتخابی نشان تے الیکشن لڑن دا اعلان کر ڈیون تاں میکوں امید اے نہ صرف ساریاں چھوٹیاں پارٹیاں انہیں دا حصہ ہوسن بلکہ وسیب دے موثر لوکیں کوں اے آپنڑے نال ملاونڑ دی صلاحیت رکھیندن۔ ہالی الیکشن کوں وقت وی ہے پیا. اے اینجھے ناں ہن کہ ورکر وی پورا اعتماد کرتے نال جُڑ ویسی. اگر اج نویں فیز دا مقابلہ کرنڑ دا نا سوچیا گیا تے وت کل بائ کہیں پارٹی کوں ووٹ ڈے تے روسوں ودے۔ نویں جذبے دی ضرورت اے

اے ہک خواہش اے ۔ ضروری تاں نہیں جو ساریاں خواہشاں پوریاں تھیون۔

انجینئر شاہنواز خان مشوری صدر سوجھل دھرتی واس