ہڈالی

ضلع تے تحصیل خوشاب دا اے قصبہ تاریخی تے ثقافتی لحاظ نال وݙا اہم تے مشہور ہے۔ایندی وجہ تسمیہ بارے آکھیا ویندے جو بادشاہ ہمایوں دے دور اچ اتھاں دے مالک راجہ ہندال ہن۔ ایندی وجہ نال ایندا ناں ’’ہنداں آلی‘‘ مشہور ہا جو ویلھے دے گذرݨ نال ہڈالی بݨ ڳیا۔ہک ٻئی روایت دے مطابق اتھاں اعواناں، ٹِواناں تے سکھاں دے درمیان کئی خونریز جنگاں تھیاں جنہاں دی وجہ نال اے زمین لاشاں توںبھریج ڳی تے ا نہا ں کوں سنبھالݨ آلا کئی نہ ہا ، انسانی ہݙیاں تے ڈھڳ لڳے پے ہن تے آسے پاسے دے لوکاں ایں جھاہ کوں ہڈاں آلی آکھݨ شروع کر ݙتا جیڑھا جو ہڈالی بݨ ڳیا۔ہڈالی اِچ پہلے اعوان قبیلے دی سرداری ہئی ۔ سترہویں صدی دے شروع اِچ ٹِوانہ قبیلہ دے میر احمد خاں ہڈالی دے اعوان قبیلے دے افراد کوں قتل کر تے نیڑے دیڑے اپݨی سرداری قائم کر گھٖدی ۔ ملک بشیر خان ٹِوانہ شاہ پور دے زمانہ اچ ہڈالی دا قلعہ دار مبارز خان ہا۔1919ء دی ہک رپورٹ دے مطابق اتھاں ڈاکخانہ تے ریلوے اسٹیشن موجود ہن۔

برصغیر دے نامور صحافی خشونت سنگھ اتھاں دے رہݨ آلے ہن۔ قیام پاکستان دے ویلھے اتھوں نقل مکانی کرتے بھارت چلے ڳے۔معروف قانون دان تے مصنف جسٹس عبد المجید ٹوانہ ایں قصبے نال تعلق رکھدن۔ آپ1988ء اچ لاہور ہائی کورٹ دے جج بنڑیے تے 1994ء اچ ریٹائرڈ تھئے۔ ہڈالی دی آبادی 1981ء اچ 21755تے 1998ء اچ 40876نفوس تے مشتمل ہئی ۔ ہُݨ ایندی آبادی 55ہزار توں ودھ ہے۔