ہٹی تے کولے کون تولیسے ؟

ہک یہودی مَرݨ منجے تے پیا ہا‘ چھیکڑی ساہ ہانس تے ݙیندا گھندا پیا ہا‘ اوندی زال سِراندی ٻیٹھی ہئی‘ ساہ ݙیوݨ کنوں پہلے اُوں اوکھیاں اوکھیاں اَکھّیں بھالیاں ‘ زال ݙے ݙٹھُس تے پُچھیُس جیویں ہوویں !ہُݨ اِتھاں کون کون ٻیٹھے ؟ اوندی زال وَلدی ݙتی سبھے ٻیٹھن ‘ یہودی وَل پُچھیا ! شموئیل وی اِتھاہیں ہے؟ شموئیل اِتھائیں ہے‘ اچھا یہودی ٹھڈا ساہ بھریا ڈیوڈ وی ہے؟ پُچھیُس !

اوندی ذال ݙسایا جو ڈیوڈ وی ٻیٹھے یہودی دا اَچوا وَدھ ڳیا ۔ پُچھدے جو جیکب وی اِتھاہیں ہے؟ جیرھے ویلھے اوندی زال ولدی ݙتی جو جیکب وی اُتھاہیں ٻیٹھے تاں یہودی دی رَڑ نکل ڳی۔ اے ترئیے چندرے اِتھاہیں ٻیٹھن تاں وَل ہٹی تے کون ہوسے؟ ایہ آکھݨ سیتی اُونکوں ہݙکی اَئی تے او ’’دم پُخت‘‘ تھی ڳیا۔

ہک تریمت دا اَخیرلا ویلھا ہا‘ اُوندیاں دِھیاں ‘ اُوندے پُتر ‘ بھیݨیں بِھرا‘ سَکے سوڑے تے اوندا پئے کھٹڑے دے آسے پاسے تے سِراندی پَواندی کھڑے ہَن ‘او مئی اپݨے پَے کوں اشارہ کر تے اَپݨے نیڑے سݙیا تے آکھیُس بَھلا تھیوی ! میݙا بچݨ ہُݨ محال اے ‘ موت سِر تے اَئی کھڑی اے ‘ میݙی آخری خواہش ایہ ہے جو جیرھے ویلھے میݙا جنازہ چَوّے جنازے آلی ویگن اِچ توں تے میݙا بھرا کٹھے ٻہو ‘ ایہ سُݨ تے اُوندے پَے دا مونہہ رَتا لال تھی ڳیا تے اُوں آکھیا توں ایہ کیا پی اَکھیندیں‘ تیکوں چنڳیں رِیت عِلم اِیں جو تیݙا بھرا میکوں اصلوں نی بھمدا ‘ وَل میں اوندے مونڈھے نال مونڈھا رَلا تے کیئیں ٻہساں؟ ایہ مَیں کنوں کائناں تھیسے ۔ اُوندی زال اوندا ہتھ گُھٹیا تے آکھیُس ! ݙیکھ گھن توں چھیکڑی باقی میݙی آخری خواہش اِی پوری نِوھی پیا کریندا۔ پئے اُوندے ہتھ تے ہولے ہولے تھاپڑی ݙتی تے آکھیُس ‘ توں اَکھیندیں پِیں تاں مَیں ٻہہ رہساں ‘ اُوندے نال پر ڳالھ ایہ ہے جو تیݙے جنازے نال ڄلݨ دی چَس ویندی رَہسے۔

ݙوں بِھرا ’’کولیں‘‘ دا وَنڑج وپار کریندے ہَن ‘ جیرھے مُحلّے اِچ ہُنائیں دی ہٹی ہئی اُتھاہیں رَہݨ آلے لوکیں کٹھا کیتا ‘ اَتے آپت اِچ اَیکا کر تے ایہ ڳݨ مُنج کیتونے جو او ایجھی جماعت جوڑ بݨاوِن جیندے ممبر نہ کُوڑ مریسن تے نہ گھٹ تولیسن ‘ ہُنیں کولیں دی ہٹی آلیں بھرانویں اِچوں وݙے بھرا کوں اَپݨی جماعت اِچ رَلا گھدا اَتے قاعدے قنون موجب حلف چَوایونے جو او ݙیوݨ گھنݨ اِچ کُوڑ کائناں مَریسے ‘ اَتے سودا گھٹ نہ تولیسے ‘ جماعت دے ہک رضا کار اونکوں آکھیا جو او اَپݨے چھوٹے بھرا کوں وی ہوں جماعت اِچ رَلݨ کیتے آکھے ایہ چنڳی ڳالھ کائنی‘ جو وݙا بِھرا تاں جماعت دا ممبر ہووے تے چھوٹا نہ ہووے ‘ اوں بندے وَلدی ݙتی ایہ اُوندی مرضی اے ‘ ممبر بݨے تے بھانویں نہ بݨے وَل تُساں ایہ وی تاں سوچو جو مَیں آنگے وی ممبر بݨ ڳیا ‘ حلف چا کھڑا تاں ہٹی تے کولے کون تولیسے؟۔

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان