ہولاس

ہولاس، اتر پردیش، بھارت دے ضلع سہارنپور وچ واقع، سندھ وادی دی تہذیب دے آخری دور دا آثار قدیمہ دا ٹھیڑھ ہے۔

تاریخی اہمیت

ہولاس، دوآب وچ چالكولیتھک کلچر فیز نال تعلق رکھݨ والیاں 70 توں ودھ جہیں وچوں ہک ہے۔ ایہ جہیں زیادہ تر دریائے جمنا دے معاون دریاواں، یعنی ہنڈن دریا، کرشنی، کٹھ نالہ تے مسکارا دے اُچے کناریاں دے نال واقع ہن۔ انہاں وچوں زیادہ تر وستیاں چھوٹیاں ہن، سبھ توں وݙی وستی 200 ضرب 200 میٹر دی ہے، تے انہاں وچوں ترائے جہیں کھٹیاں گئیاں ہن (ہولاس، عالمگیر پور تے برگاؤں)۔ ایہ ہڑپہ دے آخری دور دا ٹھیڑھ 2000 قبل مسیح توں شروع تھیندا ہے تے ایہ 1000 قبل مسیح تائیں جاری ریہا۔

بݨتر

ابتدائی دور وچ کچی مٹی دیاں مستطیل عمارتاں ملیاں ہن جنہاں وچ پکے فرش، چلھاݨے تے دھوں نکلݨ کیتے موریاں موجود ہن۔ درمیانی دور وچ، مستطیل کچے گھراں دے اندر گول گودام نما ڈٻے دی طرز دیاں ترائے یا ݙو عمارتاں دے مجموعے ملے ہن۔ آخری مرحلے نال تعلق رکھݨ والیاں کجھ عمارتاں وچ پنج گول بٹھیاں ملیاں ہن۔

ملݨ والیاں چیزاں

ہتھ نال تے چاک نال بݨے ہوئے برتن جنہاں تے جیومیٹری یا قدرتی ڈیزائن کالے رنگ نال بݨئے ہوئے ہن، چاقو دے بلیڈ، ہݙیاں دے نوکیلے اوزار وغیرہ۔ ہولاس توں پک مٹی دی مہر وی ملی ہے۔

رڑھ راہکی

ہولاس وچ چݨا، لوبیا ، اخروٹ، مٹر، چھولے، چاول (جنگلی تے کاشت شدہ ݙوہیں ونکیاں دے) رادھے ویندے ہن۔ ایں ٹھیڑھ توں پیپل دے پھل وی ملے ہن۔