ہوسن تاں او اِی ایہو جہے

ہیجڑے آپت اِچ وِڑھن یا کہیں ٻے نال بھڑ پَوِّن ‘ ہک ݙوجھے کوں تاڑیں تے پَلّوتیں دی مَار ݙیندن‘ جھیڑا وَدھ اِی ونڄے تاں چاٹیں چماٹیں اَتے بُجیں نونہدریں تے مُک ویندے‘ کھلے پولے تئیں گھٹ وَدھ ویندن ‘ ایئیں مُلاں ملواݨیں دا لیکھا اے ‘ ایہ وی آپت اِچ آڑو ٻٹ تھیون یا کہیں ٻے نال خر خسہ ڳنڈھ کھڑن‘ زبانی کلامی ٻتھی ݙیندن‘ہک ٻے کوں کلام پاک دیں آیتئیں‘ رسول کریم دیں حدیثیں اَتے اپݨے فتویں دیاں ماراںݙیندن‘ آمھیں ساَمھیںہووِن ‘ ہتھیں ٻکیں پئے اِی ونڄن تاں ݙاڑھی چُوݨے ‘ لتیں مُکیں اَتے کھلے پَولے تئیں پُڄدن ݙانگ ‘ ݙنگوری دے دِڳے سوٹے آلی نوبت کݙاہیں کائنی اَمدی ‘ایہ مُنڈھ لا دے سیاݨے اِن ‘ آپ آپت اِچ لڑسِن اِی سہی تاں ایجھی بھڑاند بھڑسِن جیندے اِچ ݙونہیں دا فیدہ ہوسے اِنہیں کنوں وَدھ تے انہیں کوں سُݨݨ آلے ہک ݙوجھے نال لڑدِن۔انہیں دے پَوں ٻارہاں۔

ایہو جہی ’’کُکِڑ بھڑاند‘‘ اَڄ کلھ مفتی محمد حسین نعیمی اَتے مولانا عبدالغفور الوری آپت اِچ بھڑدے پِن واہ جو وڑھاند اے ‘ جوڑ کوں جوڑ ٹکریا پے ‘ عدالتیں اَتے اخباریں اِچ رونقاں لڳیاں پِن ‘ سچ کیا ہے؟ تے کُوڑ کیا ہے؟ سچا کون ہے ؟ تے کُوڑا کون ہے؟۔ ایہ فیصلہ تاں عدالت کرݨے تے کریسے پَراَساں انہائیں دے اپݨے بیانیں موجب ایہ سوچݨے تے اندازہ کرݨے جو ایہے لوک جیرھے دین دے تھمبے گنڑیندے تے سݙویندن ’’دنیا‘‘ (پیسہ پا تے مال مݙی) کنوں کِتنے اَوازار اِن تے پَرے بھڄدن؟۔

مفتی محمد حسین نعیمی آکھیے جو مولانا الوری الیکشن کنوں ہک پاسے تھیوݨ کیتے ݙاہ لکھ روپے دی رَقم اَتے ہک کروڑ روپے مُل آلا پلاٹ گھدا ہا ۔ او ’’الّراشی والمُرتشی‘‘ ہے۔ رشوت گھندا وی ہے تے ݙیندا وی ہے ‘ ہِیں ڳالھوں او مسلمان کائنی ریہا ۔ او نِوے روپے مہوار تے مَیں کنے نوکری کریندا رَہ ڳے اُوں میݙے گھر دا لُوݨ کھادا ہویا اے۔ اوندی وَعدے خلافی سببوں اوندے مدرسے دی سرکاری گرانٹ ݙوں واری بند تھئی ہئی ۔ جیرھی میاں نواز شریف دے چھوٹے بھرا میںا شہباز شریف وَلا بحال کرائی ہئی‘ او میݙے اُتے کُوڑے دود ٻدھ تے مَیں کنوں رقم گھنݨ چہندے ۔

اوݙوں مولوی الوری اَکھیندے جو مفتی نعیمی دے مدرسے اِچ اونکوں سٹھ روپے مہوار تنخواہ مِلدی ہئی ‘ ایندا مطلب اے تریہہ روپے خیر نال مفتی نعیمی ہوریں آپ رَکھ گھندے ہَن ‘ رہ ڳی ݙاہ لکھ روپے آلی ڳالھ او میکوں تاں کائنی ملیئے ۔ مفتی صاحب آپ پِیڑ ڳے ہوسِن ‘ مفتی صاحب میݙے اُتے دود ٻدھے جو مَیں اُنہیں کوں اغواء کرا تے تاوان گھنساں ‘ ݙسو ! ایہ بھلا کرتے کوئی کیا کریسے ۔ جیرھا اَپݨی مرضی نال حکومت دے ہتھ آپ اغوا تھیا ہویا ہووے ڳالھیں تاں ٻیاں ایں ٻہوں ساریاں ہِن ۔ پر لمبڑ تھی ویسے ‘ ایہ ہِن ’’عالم‘‘ کہیں ٻے یا تریجھے بندے کجھ کائنی آکھیا ۔ ݙوہیں ہک ݙوجھے کوں پُݨدے پِن‘ ہک ٻے کوں کُوڑا سݙیندے پِن ہِک ٻے تے ناجائز تے حرام دی کھٹی کھاوݨ بارے لوکیں کوں آپ ݙسیندے پِن ‘ باقی کیا رہ ڳیا؟ ایہ ݙونہیں ’’عالم‘‘ دینی مدرسے دی کھولی ٻیٹھے ہِن ۔ ݙینھ رات درس ٻیٹھے ݙیندن‘ انہیں کنیں پڑھ تے ‘ اِنہیں دے مدرسیں اِچوں تسیل تمام تھی تے جیرھے نکلسِن ‘ او وی مولوی ‘ مولانا مفتی اَتے اللہ ڄاݨے کیا کیا سݙویسن ‘ اپݨے آپ کوں عالم اَکھویسن ہوسن تاں او اِی ایہو جہے ‘ اینویں ناں؟

30؍اکتوبر1991ء

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان