ہندوستان آلے پاسے امیگریشن

پاکستانی امیگریشن دفتر توں ٻاہروں ہندوستان دی بس یاتریاں کوں چاتا اَتے ہندوستان دے امیگریشن دفتر ونڄ پُچایا۔ ہُݨ اَساں سرحد پار ہاسے ‘ ہندوستان دی حد وچ ۔ساݙا سارا سمان اِتھّاں ݙوجھی واری لہا ݙتا ڳیا ۔ عملے سامان کھول کھول کے چیک کیتا ۔ ساݙے ڈیلیگیٹ دا سُݨ کے عملہ جُھم تھی ڳیا ۔ موہن بھگت کوں کجھ سُݨاوݨ دا اَکھیونیں ۔ اُونیں ہِک تارا کڈھیا تے اہجاں اَلاپ کیتا جو سارے ٻوّے تھی ڳے ۔ اُنہاں کوں ساݙے ڈیلیگیٹ ہووݨ دا یقین تھی ڳیا ۔ بس امیگریشن دفتر دے ٻئے پاسوں آ ڳئی ۔ سمان قُلیّاں وَلا چاڑھ ݙتا۔ اساں سمان چڑھاوݨ دا بھاڑا فی یاتری 30/-روپے ہندوستانی ادا کیتے۔ ݙہ یاتریاں دے ترے سو روپے بݨے۔ ایں توں پہلے پاکستان امیگریشن دے عملے وی ساݙے ڈیلیگیٹ دے ݙہ بندیاں دے ترے سو پاکستانی وصول کیتے ہَن ۔ ہندوستان کرنسی  مطابق اِنہاں دے ترے سو پاکستان دے 536روپے بݨدے ہَن ۔ سِکھ قُلی ڳالھ نہ سُݨدے ہَن ۔ ادا کرݨے پئے۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان