ہندوستانی کرنسی مطابق قیمتاں

سمان بس اِچ چڑھا ݙتا ڳیا ۔ ہُݨ میکوں دِل جاہی ہئی۔ میں ترے ہزارپاکستانی دے بدلے 1680/-روپے ہندوستانی تبدیل کرائے ۔ یعنی 100پاکستانی روپے بدلے 56 ہندوستانی روپے ملے۔ ایں توں پہلے 2004ء وچ جݙاں پٹیالہ ڳئے ہاسے اُوں ویلے پاکستانی سو روپے دے بدلے70/-ہندوستانی روپے ملے ہَن ۔ ایندے کنوں اَڄ پاکستانی کرنسی دے ڈَہݨ دا پتہ لڳا۔ کراچی توں راشد مصطفیٰ 170/-پاکستانی روپیاں دے بدلے 100/-روپے ہندوتانی گھن آئے ہن۔ بر حال گھوگھا کھادا ۔ پچھلی واری پٹیالہ ونڄن ویلے میں سرحد تے کرنسی نہ بدلی ہئی ۔ ہندوستان وچ ساکوں100روپے بدلے 55روپے تے60/-روپے قبول کرݨے پئے ہَن اوہ وی منتاں ترلیاں ‘ سفارشاں دے بعد پُلس دے ہتھڑیکے ۔ اوہ کہاݨی وَل کݙانہیں سُݨویسوں۔

ایں پھیرے میں ملتان توں 83/-روپے دے حساب نال 300/-ڈالر گھن کے ٹُریا ہَم ۔ جہڑے پاکستانی مالیت وچ 24900/-روپے وچ ملے ہن۔ ڈالر انٹرنیشنل کرنسی ہے تہوں ڈالر دا نال ہووݨ ٻہوں ضروری ہے ۔ ہندوستان وچ میں صرف100ڈالر دی ہندوستانی کرنسی تبدیل کرائی تاں ہک ڈالر دے بدلے 48/-ہندوستانی روپے ملے۔ ایں طرح100پاکستانی روپیاں دے بدلے 58/-روپے ہندوستانی ملے ۔ ایہ سودا چنڳاں ہا۔ باقی ݙو سو ڈالر میں تبدیل نہ کرائے نہ استعمال دی لوڑ پئی۔ بر حال ہندوستانی کرنسی واہگہ بارڈر توں گھن گھنݨاں فیدہ وند ہے۔ بس ذرا مُک مُکا کرݨاں پوندے۔

ہندوستان وچ اساںجتّھاں خریداری کریندے ہاسے ۔ 100/-روپیاں دے بدلے56روپیاں دا خیال رکھدے ہاسے ۔ ہر شئے دا مُل ذہن اِچ ڈبل ؍دوہرا کر گھندے ہاسے۔ اکثراء ہندوستانی مال مہانگا نظردا ہا ۔ مثلاً اُتھاں کھنڈ40/-روپے کلو ‘ پٹرول34/-روپے لیٹر ‘کیلے35/-روپے درجن ‘ پرچ جیݙی روٹی5/- توں6/-روپے دی‘ منرل واٹر (ہک لیٹر)10/-روپے ‘چھوٹا گوشت  ہاف پلیٹ 55/-روپے ‘ دال چنا ہاف پلیٹ25/- روپے ‘سیون اپ13/- روپے‘  دی ہئی۔ ایں لحاظ نال پاکستانی روپیاں وچ قیمتاں ایہ ہَن۔

کھنڈ71.40روپے

پٹرول 60.70 روپے

کیلے62.50روپے درجن

روٹی (ساݙے سائز دی)20/-روپے

منرل واٹر ہک لٹر17.85روپے

مٹن ہاف پلیٹ98.20روپے‘

دال چنا ہاف پلیٹ 44.60روپے

سیون اپ 300)م ۔ل)23.25روپے

ہندوستان دی بس پاکستانی بس کنوں زیادہ کھلی ‘ آرام دہ تے سوہݨی ہئی۔ پتہ ایہ لڳا جو لہور دے TDCPکنوں اِی ایں بس ٹرناں ہوندے پر کیوں جو ایہ بس زیادہ جھکی تے نازک ہے اَتے واہگہ کنوں لہور تئیں سڑک بݨدی پئی ہے جتھاں ایہ بس سفر نہیں کر سڳدی تہوں ایہ یاتریاں کوں واہگہ کنوں چا کے دلّی تئیں سفر کریندی ہے ۔ واپسی ویلے وی ایں بس ساکوں واہگہ چھوڑ ݙتا اَتے پاکستانی بس لہور گھن آئی۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان