ہرمن ایمیل فشر

ہرمن ایمیل فشر

ہرمن ایمیل لوئس فشر (9 اکتوبر 1852 – 15 جولائی 1919) ہک جرمن کیمیا دان ہن تے 1902 وچ کیمسٹری دا نوبل انعام حاصل کیتا ہا ۔ انہاں فشر ایسٹریفیکیشن دریافت کیتا ۔ انہاں فشر پروجیکشن وی تیار کیتا ، جیڑھا جو غیر متناسب کاربن ایٹم بݨاوݨ دا ہک علامتی طریقہ ہے ۔ انہاں اینزائم ایکشن دا تالا تے چابی دا طریقہ کار وی پیش کیتا ۔ انہاں کݙاہیں وی اپݨا پہلا ݙتا ڳیا ناں استعمال نہیں کیتا ، تے او اپݨی پوری زندگی صرف ایمیل فشر دے ناں نال ڄاتے ویندے ہن ۔

ابتدائی سال تے گزر گزران

فشر ایوسکیرچن ، کولون دے نیڑے ، لورینز فشر ، ہک کاروباری شخص ، تے انہاں دی ذال جولی پوینسجن دے پتر دے طور تے پیدا تھئے ۔ گریجویشن کرݨ دے بعد او قدرتی سائنس پڑھݨا چاہندے ہن ، پر انہاں دے پیو انہاں خاندان دے کاروبار وچ کم کرݨ تے مجبور کیتا جݙݨ تک ایہ معلوم نہ تھی ڳیا جو انہاں دا پتر ایں کم کیتے موزوں کائنی ۔ فشر ول بون یونیورسٹی وچ 1871 وچ ڳئے ، پر 1872 وچ سٹراسبرگ یونیورسٹی وچ ول ڳئے ۔ انہاں 1874 وچ ایڈولف وان بایر دے تحت فیتھلینز دے مطالعہ نال ڈاکٹریٹ دی ڈگری حاصل کیتی ۔

فشر سٹراسبرگ وچ بایر دے نال ہک آزاد تحقیقی طالب علم دے طور تے ریہے ۔ 1874 دے موسم خزاں وچ ، انہاں کوں نامیاتی لیبارٹری دے اسسٹنٹ دے طور تے مقرر کیتا ڳیا ۔ اتھائیں 1875 وچ ، انہاں ہائیڈرازائنز دریافت کیتے تے انہاں کوں ناں ݙتا ، جنہاں وچ غیر متناسب ڈائیمتھائل ہائیڈرازائن وی شامل ہا ، جیڑھا جو بعد وچ خلائی دوڑ دے دوران ٻہوں اہم تھی ڳیا ، تے فینائل ہائیڈرازائن ۔ مؤخر الذکر مرکب کاربوکسائلک مرکبات (الڈیہائڈز تے کیٹونز) نال رد عمل ظاہر کر تے کرسٹل ٹھوس پیدا کریندا ہے ۔ شکراں دے فینائل ہائیڈرازونز انہاں شکراں تے پیورینز دی ترکیب تے کم کرݨ دی اجازت ݙتی ، جئیں انہاں کوں 1902 وچ کیمسٹری دا نوبل انعام ݙیوایا ۔ پائرووک ایسڈ دے فینائل ہائیڈرازون کوں استعمال کریندے ہوئے ، انہاں انڈول دی ترکیب تیار کیتی ۔

1875 وچ ، وان بایر کوں جسٹس وان لیبیگ دی جاء میونخ یونیورسٹی وچ گھنݨ کیتے آکھیا ڳیا تے فشر انہاں دے نال اتھائیں ڳئے تاں جو نامیاتی کیمسٹری وچ اسسٹنٹ بݨ سڳن ۔ 1878 وچ فشر میونخ وچ "پرائیویٹ ڈوزنٹ" دے طور تے کوالیفائی کیتا ، جتھاں انہاں کوں 1879 وچ تجزیاتی کیمسٹری دے ایسوسی ایٹ پروفیسر دے طور تے مقرر کیتا ڳیا ۔

1882 وچ ، انہاں کوں ایرلانجن یونیورسٹی وچ کیمسٹری دے پروفیسر دے طور تے، اتے 1885 وچ ورزبرگ یونیورسٹی وچ مقرر کیتا ڳیا ۔ 1892 وچ انہاں وان ہوفمین دی جاء برلن یونیورسٹی وچ کیمسٹری دے پروفیسر دے طور تے گھدی ۔

پرکھ پرچول

انہاں فینائل ہائیڈریزائنز دے ڈیریویٹوز دی تحقیقات کیتی ، انہاں دا ڈیازو مرکبات نال تعلق قائم کیتا ، تے انہاں ایں ڳالھ تے توجہ ݙتی جو او ٻئے مادیاں نال کتنا جلدی مل ویندے ہن ۔ اینجھے کنڈینسیشن پراڈکٹس وچوں بلاشبہ سبھ توں اہم ہائیڈرازونز ہن ، جیڑھے جو الڈیہائڈز تے کیٹونز نال تعامل دے نتیجے وچ پیدا تھیندے ہن ۔ انہاں دے مشاہدات ، جیڑھے جو 1886 وچ شائع تھئے ، اینجھے ہائیڈرازونز ، ہائیڈروکلورک ایسڈ یا زنک کلورائیڈ نال رلا ملا کرݨ تے ، انڈول دے ڈیریویٹوز پیدا کریندے ہن ، جیڑھا جو انڈیگو دا بنیادی مادہ ہے ، وان بایر دے انڈیگو تے ایندے متعلق ٻہوں سارے مادیاں دے بارے وچ پیش کیتے ڳئے خیالات دی تصدیق ہن ۔

انہاں ول فوشین (جیکوں اوں ویلے "روسانیلین" میجنٹا ڈائز آکھیا ویندا ہا) ڈائز تے توجہ ݙتی ، تے اپݨے کزن اوٹو فشر دے نال مل تے ، انہاں 1878 تے 1879 وچ مقالے شائع کیتے جنہاں ایہ ثابت کیتا جو ایہ ڈائز ٹرائفینائل میتھین دے ڈیریویٹوز ہن ۔ ایمیل فشر دی اڳلی تحقیق یورک ایسڈ نال متعلق مرکبات نال تعلق رکھدی ہئی ۔ اتھائیں وان بایر کم شروع کر ݙتا ہا ، پر فشر پیورینز دے علم دے شعبے کوں ٻہوں ودھایا ۔ 1881 تے 1882 وچ انہاں مقالے شائع کیتے جنہاں یورک ایسڈ ، زانتھین ، کیفین (پہلی ترکیب حاصل کرݨ) ، تھیوبرومین تے ایں گروپ دے کجھ ٻئے مرکبات دے فارمولے قائم کیتے ۔ پیورین خود الگ تھیوݨ توں بعد ، مختلف قسم دے ڈیریویٹوز تیار کیتے ڳئے ، جنہاں وچوں کجھ ممکنہ علاج معالجے دی ایپلی کیشنز دے پیش نظر پیٹنٹ کیتے ڳئے ۔

فشر خاص طور تے شکراں تے کم کرݨ کیتے مشہور ہن ۔ ہائیڈرازائن نال متعلق انہاں دیاں ابتدائی دریافتاں وچوں ہک ایہ ہئی جو فینائل ہائیڈرازائن شکراں نال رد عمل ظاہر کر تے اینجھے مادے بنیندا ہے جنہاں کوں انہاں اوسازونز دا ناں ݙتا ہا ، تے جیڑھا جو ٻہوں کرسٹلائن تے آسانی نال بݨݨ والا ہووݨ دی وجہ توں ، اینجھے کاربوہائیڈریٹس کوں اوں توں ودھ واضح طور تے شناخت کرݨ وچ مدد کریندے ہن جتنا جو پہلے ممکن ہا ۔ بعد وچ ، ٻئے کم دے نال نال ، او ڈی-(+)-گلوکوز دی نامیاتی ترکیب کیتے وی مشہور ہن ۔ انہاں ݙیکھایا جو 16 سٹیریوآئسومیرک گلوکوز دے فارمولے کوں کیویں کڈھیا ونڄے ، تے کجھ سٹیریوآئسومیرائڈز تیار کیتے ، جئیں نال غیر متناسب کاربن ایٹم دے لی بیل-وان 'ٹ ہوف اصول دی تصدیق تھئی ۔

اینزائمولوجی دے شعبے وچ ، فشر سبسٹریٹ بائنڈنگ دے طریقہ کار دے طور تے "تالا تے چابی" ماڈل دی تجویز کیتے ڄاتا ویندا ہے ۔

فشر باربیٹوریٹس دی دریافت وچ وی اہم ہن ، جیڑھا جو نندر نہ آوݨ ، مرگی ، اضطراب تے اینستھیزیا کیتے استعمال تھیوݨ والیاں سیڈیٹیو دوائیاں دا ہک طبقہ ہے ۔ معالج جوزف وان میرنگ دے نال مل تے ، انہاں پہلی باربیٹوریٹ سیڈیٹیو ، باربیٹل ، 1904 وچ لانچ کرݨ وچ مدد کیتی ۔ انہاں اڳوں تے پروٹینز تے شاندار کم کیتا ۔ نویں طریقے متعارف کروا تے ، او پیچیدہ البومینز کوں امینو ایسڈز تے ٻئے نائٹروجنیئس مرکبات وچ تروڑݨ وچ کامیاب تھئے ، جنہاں وچوں ٻہوں ساریاں دی ساخت معلوم ہئی ، تے انہاں یونٹس دے دوبارہ ملاپ نال ، انہاں مصنوعی پیپٹائڈز تیار کیتے جیڑھے جو قدرتی مصنوعات دے قریب ہن ۔ انہاں دی تحقیقی ٹیم 1901 وچ پہلا فری ڈائیپٹائڈ (گلائسین-گلائسین) تیار کیتا ۔ 1906 تک انہاں دی تحقیقی ٹیم مختلف چین لینتھ تے امینو ایسڈ کمپوزیشن دے تقریباً 65 پیپٹائڈز بݨائے ہن ۔ 1899

انہاں دیاں 1899 توں 1906 تئیں دیاں تحقیقات 1907 وچ شائع تھیاں ۔ ترائے سال بعد پیپٹائڈز دی کل تعداد 100 توں ودھ تھی ڳئی ، جیندے وچ سب توں لمبا 18 امینو ایسڈ پیپٹائڈ ہا جیندے وچ 15 گلائسین تے ترائے لیوسین یونٹ ہن ۔ 18 امینو ایسڈ پیپٹائڈ فزیولوجیکل کیمسٹاں ولوں پروٹینز کیتے ڳئے ٹیسٹاں دے معیاری جواب ݙتے -

گھروڳی زندگی تے موت

فشر 1888 وچ ایگنس گیرلاچ نال شادی کیتی ۔ او ست سال بعد مر ڳئی ، تے انہاں ترائے پتر ہن ۔ چھوٹے ݙو پتر پہلی عالمی جنگ وچ اپݨی فوجی سروس دے دوران مر ڳئے ، پر سب توں وݙا ، ہرمن ، ہک نامیاتی کیمیا دان بݨ ڳیا ۔ ایمیل فشر 15 جولائی 1919 کوں برلن وچ 66 سال دی عمر وچ مر ڳئے ۔

آدر ، ایوارڈ تے میراث

1897 وچ انہاں بین الاقوامی ایٹمی وزن کمیشن بݨاوݨ دا خیال پیش کیتا ۔ فشر 1899 وچ رائل سوسائٹی دے غیر ملکی رکن منتخب تھئے ۔ انہاں کوں 1902 وچ کیمسٹری دا نوبل انعام "شکراں تے پیورین ترکیباں تے انہاں دے کم ولوں کیتیاں ڳیاں غیر معمولی خدمات دے آدر وچ" ݙتا ڳیا ۔ او 1904 وچ یونائیٹڈ سٹیٹس نیشنل اکیڈمی آف سائنسز دے بین الاقوامی رکن ، 1908 وچ امریکن اکیڈمی آف آرٹس اینڈ سائنسز دے بین الاقوامی اعزازی رکن ، تے 1909 وچ امریکن فلاسوفیکل سوسائٹی دے بین الاقوامی رکن منتخب تھئے ۔

ٻہوں سارے کیمیائی رد عمل تے تصورات انہاں دے ناں تے ہن:

·        فشر انڈول سنتھیسس

·        فشر پروجیکشن

·        فشر آکسازول سنتھیسس

·        فشر پیپٹائڈ سنتھیسس

·        فشر فینائل ہائیڈرازائن تے آکسازون رد عمل

·        فشر-سپیر ایسٹریفیکیشن

·        فشر گلائکوسیڈیشن

·        کیلینی-فشر سنتھیسس

فشر-ٹروپش عمل فرانز ایمیل فشر دے ناں تے ہا ، جیں میولہیم وچ میکس پلانک انسٹی ٹیوٹ فار کول ریسرچ دی سربراہی کیتی ہئی ، تے ایں دا فشر نال کوئی تعلق کائنی ۔