ہتھ وچ ہتھ آیا دِلّی وچوں خط آیا
مَن دیاں ڳالھیں من اِچ ریہ ویندیاں ہِن تاں وخت اُنھاں نال آپ نبڑدا رہندے۔ ساݙے من وچ کتھائیں ضرور سِک ٻلیندی پئی ہئی جو ہندوستان کوں ݙیکھوں ہا ۔ ہک ݙینہ سئیں ظہور دھریجہ ݙسیا جو دلّی توں سئیں ڈاکٹر جے ۔سی۔ بترادا خط آئے جو پاکستان توں سرائیکی شاعر تے ادیب آ کے 13؍اگست 2009ء کوں تھیوݨ آلے آل انڈیا مشاعرے وچ شریک تھیون۔
ایہ مشاعرہ سرائیکی ساہتیہ اکیڈمی دِلّی دے تعاون نال ’’ایج کیئر‘‘ انڈیا کرویندی پئی ہئی ۔ جے ۔سی۔ بترا دا خیال ہا جو پاکستان دے سارے سرائیکی وسیب کنوں شاعر‘ ادیب تے دانشور کٹھے تھی کے آنون تے ساکوں سوبھ ݙیون۔
AGE-CARE INDIA
ACI/PRE/2009 Dated:07-07-2009
The Age - Care India alongwith Dayal Singh College (Evening),and Siraiki Academy are organising a Cultural Programme including Indo- Pak Mushaira / Kavi Sammelan to celebrate Independence Day on Thursday, 13 August 2009 at 4.30 p.m. at Dayal Singh College (Evening) LodhiRoad, New
Delli-110003.
You are Kindly requested to be the Chief Guest of Honour and grace the occasion by your participation. You may express your views or
recite a poem / Song / geet or ghazal.
It is an effort to promote peace and harmony amongst the people of two neighboring
countries.
We have common culture and heritage. Our people are longing to have peace bereft of violence.
With regards.
Yours Sincerely.
(Dr.J.C.Batra)
ایہ جولائی دی یارھاں تریک ہئی ۔ ظہور دھریجہ دوستاں تے سنگتیاں کوں آکھیا ‘جہڑا جہڑا دانشور ہندوستان ڄلدے اوہ پاسپورٹ بݨواوے۔ میݙے جِن سیاݨے ہَن۔ میں 25؍جون کوں حج تے ونڄݨ آلی درخواست دی ہدایت مطابق پاسپورٹ دی درخواس جمع کرا آیا ہم۔ ایں عام درخواس مطابق میکوں 25؍جولائی کوں پاسپورٹ ملݨاں ہا ۔ میں آکھیا‘ تساں اپݨی فکر کرو میݙی درخواس تاں جمع ہے ۔ ایں توں پہلاں ظہور دھریجہ تے میݙا پاسپورٹ نومبر2004ء اِچ اُوں ویلے بݨیا ہا جݙاں اَساں کٹھے پنجاب حکومت دی طرفوں وفد نال پٹیالے ڳئے ہاسے ۔ اوہ پاسپورٹ عام قسم دا ہا اَتے اوکوں سرکار مشینی ریڈیبل پاسپورٹ دے اجراء دے بعد کینسل قرار ݙے چُکی ہئی۔ ظہور دھریجہ 13؍جولائی کوں ملتان پاسپورٹ آفس ڳئے تاں اُنہاں آکھیا تُساں اَپݨے ضلعے رحیم یار خان توں درخواس ݙیوو ۔سئیں فرید پیرزادہ شیت کئیں بُرے وقت کیتے پہلے توں اِی پاسپورٹ بݨوائی ودے ہَن۔ جمشید دھریجہ کول وی پاسپورٹ موجود ہا ۔ کجھ سنگتیاں ارجنٹ پاسپورٹ کیتے درخواساں جمع کرا ݙتیاں اَتے 20؍جولائی تئیں سب کوں ارجنٹ پاسپورٹ مل ڳے۔ میݙا پاسپورٹ تاں 25جولائی کوںملݨاں ہا ۔ ہُݨ اوندی ارجنٹ فیس وی جمع نہ تھی سڳدی ہئی۔ برحال میں آکھیا یا میݙی انتظار کرو یا تُساں روانہ تھیوو تے ویزے کیتے درخواس جمع کرا آئو ۔ سنگتیاں آکھیا جو تہاݙے پاسپورٹ آوݨ دے بعد ویزے کیتے درخواس ݙیسوں ۔
21؍جولائی کوں میںسئیں مقبول گیلانی نال پروگرام مطابق بہاول پور ‘ رحیم یار خان ‘ بُھنگ تے صادق آباد دے سرائیکی دانشوراں کوں مِلّݨ کیتے چلا ڳیئُم جِتھّوں میں 25؍جولائی کوں وَل آیُم ۔ سئیں ظہور دھریجہ تے سئیں فرید پیرزادہ میݙی تانگھ اِچ ہَن۔ ایہ چھݨ چھݨ دا ݙینہ ہا ۔26؍جولائی کوں آݙت وار ہا ۔ 27؍جولائی کوں سُنوار دے ݙینہ میں پاسپورٹ وصول کیتا ۔ سئیں ظہور دھریجہ تے ٻنہاں سنگتیاںدیاں ویزے کیتے درخواساں تیار ہَن۔ میݙی درخواس تیار کیتی ڳئی۔ اِنہاں کمّاں وچ 28؍جولائی گزر ڳئی ۔ اُونہی رات کوں سئیں ظہور دھریجہ تے سئیں فرید پیرزادہ اسلام آباد روانہ تھی ڳئے ۔ 29؍جولائی کوں اُتّھاں پُڄ کے مجاہد بھٹی دے کاغذات تیار تھئے ۔ نقلاں تے فوٹو کاپیاں دے مرحلے لنگھے اَتے 30؍جولائی کوں ویزے کیتے ݙہ پاسپورٹ جمع کرا ݙتے ڳئے۔
حوالہ
[لکھو | ماخذ وچ تبدیلی کرو]کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان