ہانس ایڈولف کریبز

ہانس ایڈولف کریبز

سر ہانس ایڈولف کریبز (25 اگست 1900 – 22 نومبر 1981) ہک جرمن-برطانوی حیاتیات دان ، طبیب تے بائیو کیمسٹ ہن ۔ او سیلولر ریسپیریشن دے مطالعے وچ ہک ماہر سائنسدان ہن ، جیڑھا جو جانداراں دے خلیات وچ ہک بائیو کیمیائی عمل ے جیڑھا خوراک تے آکسیجن توں توانائی کڈھیندا ہے تے اینکوں زندگی دے عمل کوں چلاوݨ کیتے مہیا کریندا ہے ۔ انہاں کوں خاص طور تے کیمیائی رد عمل دے ݙو اہم سلسلے دی دریافت کیتے ڄاݨیا ویندا اے جیڑھے تقریباً تمام جانداراں دے خلیات وچ تھیندے ہن ، بشمول انسان ، اینیروبک مائکرو آرگنائزمز توں علاوہ ، یعنی سائٹرک ایسڈ سائیکل تے یوریا سائیکل ۔ پہلا ، جینکوں اکثر "کریبز سائیکل" دے ناں نال ڄاݨیا ویندا اے ، میٹابولک رد عمل دا او سلسلہ اے جیڑھا آکسیجن ریسپائرنگ جانداراں دے خلیات کوں اینیروبک عمل جیویں جو گلائکولائسس مہیا کر سڳدے ، ایندے مقابلے وچ انہاں دی خوراک توں ٻہوں زیادہ ATP حاصل کرݨ دی اجازت ݙیندا اے ؛  تے ایندی دریافت کریبز کوں 1953 وچ فزیالوجی یا میڈیسن وچ نوبل انعام ݙیوایا ۔ ہانس کونبرگ دے نال ، انہاں گلائیو آکسیلیٹ سائیکل وی دریافت کیتا ، جیڑھا جو سائٹرک ایسڈ سائیکل دی ہک معمولی تبدیلی اے جیڑھی پودیاں ، بیکٹیریا ، پروٹسٹس تے فنگائی وچ پاتی ویندی ہے ۔

کریبز 1981 وچ آکسفورڈ وچ فوت تھی ڳئے ، جتھاں انہاں اپݨے کیریئر دے 13 سال 1954 توں اپݨی ریٹائرمنٹ 1967 تک یونیورسٹی آف آکسفورڈ وچ گزاریئے ہن ۔

ابتدائی زندگی تے تعلیم

کریبز جرمنی دے شہر ہیلڈیشم وچ پیدا تھئے ، انہاں دے والد دا ناں جارج کریبز ہا ، جیڑھے جو ہک کن ، نک تے گلا دے سرجن ہن ، تے والدہ دا ناں الما کریبز ہا ۔ او یہودی النسل نال تعلق رکھدے ہن تے ترائے ٻالاں وچوں وچکارلے ہن ۔ انہاں دی ہک وݙی بھیݨ ، تے ہک چھوٹا بھرا ہا ۔

کریبز اپݨے آبائی شہر دے جمنازیم اینڈریئنم وچ تعلیم حاصل کیتی ۔ پہلی عالمی جنگ دے قریب ، ستمبر 1918 وچ سیکنڈری سکول دی تعلیم مکمل کرݨ توں چھی مہینے پہلے ، انہاں کوں امپیریل جرمن فوج وچ بھرتی کیتا ڳیا ۔ انہاں کوں ہائی سکول ڈپلومہ کیتے ہک ایمرجنسی امتحان ݙیوݨ دی اجازت ݙتی ڳئی ، جینکوں انہاں اتنے اعلیٰ نمبراں نال پاس کیتا جو انہاں کوں شک ہا جو ممتحنین "ناجائز طور تے نرم تے ہمدرد" ہن ۔ ݙو مہینے بعد جنگ دے خاتمے نال ، انہاں دی بھرتی ختم تھی ڳئی ۔

کریبز اپݨے والد دے پیشے تے عمل کرݨ دا فیصلہ کیتا تے دسمبر 1918 وچ طب دی تعلیم حاصل کرݨ کیتے یونیورسٹی آف گوٹنگن وچ داخل تھئے ۔ 1919 وچ او یونیورسٹی آف فریبرگ منتقل تھی ڳئے ۔ 1923 وچ انہاں اپݨا پہلا سائنسی مقالہ ہک ٹشو سٹیننگ تکنیک تے شائع کیتا ۔ انہاں ایہ کم ولہیم وون مولینڈورف دی رہنمائی وچ کیتا ہا جیڑھا جو 1920 وچ شروع تھیا ہا ۔ انہاں دسمبر 1923 وچ اپݨا طبی کورس مکمل کیتا ۔ ڈاکٹر آف میڈیسن دی ڈگری تے میڈیکل لائسنس حاصل کرݨ کیتے ، انہاں ہک سال یونیورسٹی آف برلن دے تھرڈ میڈیکل کلینک وچ گزاریا ۔ اوں ویلے تک انہاں اپݨا پیشہ ورانہ مقصد پریکٹسنگ طبیب بݨݨ توں طبی محقق ، خاص طور تے بائیو کیمسٹری وچ بݨا گھدا ہا ۔ 1924 وچ انہاں کیمسٹری تے بائیو کیمسٹری دی تربیت کیتے برلن دے چیریٹی ہسپتال دے پیتھولوجیکل انسٹی ٹیوٹ دے شعبہ کیمسٹری وچ تعلیم حاصل کیتی ۔ انہاں 1925 وچ یونیورسٹی آف ہیمبرگ توں اپݨی ایم ڈی دی ڈگری حاصل کیتی ۔

کیریئر

1926 وچ کریبز اوٹو ہینرک واربرگ دے نال برلن دے ڈاہلیم وچ قیصر ولہیم انسٹی ٹیوٹ فار بائیولوجی وچ بطور ریسرچ اسسٹنٹ شامل تھئے ۔ انہاں کوں سالانہ 4800 مارک ادا کیتے ویندے ہن ۔ چار سال بعد 1930 وچ 16 اشاعتاں دا کریڈٹ حاصل کرݨ دے بعد ، انہاں دے سرپرست واربرگ انہاں تے زور ݙتا جو او اڳوں تے ودھن تے انہاں الٹونا (ہݨ ہیمبرگ دا حصہ) دے میونسپل ہسپتال وچ شعبہ طب وچ اسسٹنٹ دی پوزیشن سنبھالی ۔ اڳلے سال او یونیورسٹی آف فریبرگ دے میڈیکل کلینک وچ منتقل تھی ڳئے ۔ فریبرگ وچ او تقریباً 40 مریضاں دے انچارج ہن ، تے اپݨی تحقیق کرݨ کیتے آزاد ہن ۔ فریبرگ وچ ہک سال توں وی گھٹ عرصہ گزرݨ توں پہلے ، انہاں ریسرچ طالب علم کرٹ ہینسلائٹ دے نال مل تے یوریا سنتھیسس دے اورنیتھین سائیکل دی دریافت شائع کیتی ، جیڑھا جو یوریا بݨاوݨ دا میٹابولک رستہ ہے ۔ اینکوں ہݨ یوریا سائیکل دے ناں نال ڄاݨیا ویندا اے ۔ انہاں مل تے ہک پیچیدہ آبی محلول (ہک بفر) ، یا پرفیوژن ایکس ویوو وی تیار کیتا ، جیڑھا جو شریاناں وچ خون دے بہاؤ دے مطالعے کیتے ہا ۔ 1932 وچ انہاں یوریا سائیکل دے بنیادی کیمیائی رد عمل شائع کیتے ، جنہاں انہاں دی سائنسی ساکھ قائم کیتی ۔

کریبز دی ہک معزز جرمن سائنسدان دے طور تے زندگی 1933 وچ انہاں دی یہودی نسل دی وجہ توں اچانک ختم تھی ڳئی ۔ ہٹلر دی نازی پارٹی دے اقتدار وچ آوݨ دے نال ، جرمنی پیشہ ورانہ سول سروس دی بحالی کیتے قانون نافذ کیتا ، جنہاں تمام غیر جرمنیاں ، تے نازی مخالفاں کوں پیشہ ورانہ پیشیاں توں ہٹاوݨ دا حکم ݙتا ۔ کریبز کوں اپریل 1933 وچ انہاں دی نوکری توں باضابطہ طور تے برطرف کر ݙتا ڳیا ۔ انہاں دے ہک مداح ، سر فریڈرک گولینڈ ہاپکنز ، یونیورسٹی آف کیمبرج وچ فوری طور تے انہاں دی مدد کیتے آئے ، تے یونیورسٹی کوں کریبز کوں شعبہ بائیو کیمسٹری وچ انہاں دے نال کم کرݨ کیتے بھرتی کرݨ تے راضی کیتا ۔ جولائی 1933 تک ، او راک فیلر فاؤنڈیشن دی مالی مدد نال کیمبرج وچ آباد تھی ڳئے ہن ۔

حالانکہ جرمنی انہاں کوں صرف اپݨا ذاتی سامان گھن ونڄݨ تے پابندی لائی ہئی ، لیکن او خوش قسمت ہن جو سرکاری ایجنٹاں انہاں کوں انہاں دا سامان تے تحقیقی نمونے انگلینڈ گھن ونجݨ دی اجازت ݙتی ۔ او انہاں دیاں بعد دیاں دریافتاں ، خاص طور تے واربرگ ولوں تیار کردہ مانومیٹر کیتے محوری ثابت تھئے خاص طور تے ٹشوز دے پتلے ٹکڑیاں وچ آکسیجن دی کھپت دی پیمائش کیتے ؛  ایہ انہاں دی تحقیق دی بنیاد ہئی ۔

انہاں 1934 وچ بائیو کیمسٹری وچ ڈیمونسٹریٹر مقرر کیتا ڳیا ، تے 1935 وچ یونیورسٹی آف شیفیلڈ انہاں فارماکولوجی وچ لیکچرر دی پوسٹ دی پیشکش کیتی ، جیندے وچ ہک ٻہوں وݙی لیبارٹری تے دگنی تنخواہ ہئی ۔ انہاں اتھاں 19 سال کم کیتا ۔ یونیورسٹی آف شیفیلڈ 1938 وچ بائیو کیمسٹری دا ہک شعبہ کھولیا ، جینکوں ہݨ شعبہ مالیکیولر بائیولوجی اینڈ بائیوٹیکنالوجی آکھیا ویندا اے ، تے کریبز ایندا پہلا ہیڈ بݨیا ، تے آخر کار 1945 وچ پروفیسر بݨیا ۔ انہاں دے دور اچ ایہ دنیا دے بائیو کیمسٹری دے بہترین شعبیاں وچوں ہک بݨ ڳیا ۔ کریبز 1943 وچ سوربی ریسرچ انسٹی ٹیوٹ دا انتظام سنبھال گھدا ۔ 1944 وچ برطانوی میڈیکل ریسرچ کونسل شیفیلڈ وچ MRC یونٹ فار سیل میٹابولزم ریسرچ قائم کیتا ، تے کریبز کوں ڈائریکٹر مقرر کیتا ڳیا ۔ ایندے نال ، انہاں دی لیبارٹری اتنی وݙی تھی ڳئی جو مقامی لوگ مذاق نال اینکوں "کریبز دی سلطنت" آکھݨ لڳے ۔

او 1954 وچ اپݨے MRC یونٹ دے نال یونیورسٹی آف آکسفورڈ وچ وہٹلی پروفیسر آف بائیو کیمسٹری دے طور تے منتقل تھی ڳئے ، جیڑھا عہدہ انہاں 1967 وچ اپݨی ریٹائرمنٹ تک سنبھالی رکھیا ۔ بائیو کیمیکل جرنل دے ایڈیٹوریل بورڈ انہاں دی ریٹائرمنٹ تے نیک خواہشات دا اظہار کیتا ، لیکن بدلے وچ انہاں انہاں سائنسی مقالے لکھ تے مصروف رکھݨ دا وعدہ کیتا ۔ انہاں اپݨی تحقیق جاری رکھی ، تے اپݨے MRC یونٹ کوں آکسفورڈ دے ریڈکلف انفرمری وچ نوفیلڈ ڈیپارٹمنٹ آف کلینیکل میڈیسن وچ گھن ڳئے ۔ اتھوں انہاں 100 توں زیادہ تحقیقی مقالے شائع کیتے ۔

ذاتی زندگی

کریبز دی ملاقات مارگریٹ سیسلی فیلڈ ہاؤس (30 اکتوبر 1913 – مئی 1993) نال تھئی جݙݨ او 1935 وچ شیفیلڈ منتقل تھئے ۔ انہاں 22 مارچ 1938 کوں شادی کیتی ۔ کریبز بعد وچ شیفیلڈ وچ اپݨی زندگی کوں "19 خوشگوار سال" قرار ݙتا ۔ انہاں دے ݙو پتر ، پال (پیدائش 1939) تے جان (پیدائش 1945) ، تے ہک دھی ، ہیلن (پیدائش 1942) ہن ۔ جان (سر جان کریبز ، تے بعد وچ بیرن کریبز) ہک نامور اورنیتھولوجسٹ ، یونیورسٹی آف آکسفورڈ وچ پروفیسر ، جیسس کالج ، آکسفورڈ دے پرنسپل ، تے برطانوی ہاؤس آف لارڈز دے رکن بݨئے ۔

موت

ہک مختصر بیماری دے بعد ، کریبز 22 نومبر 1981 کوں آکسفورڈ وچ 81 سال دی عمر وچ فوت تھی ڳئے ۔

سائنسی سوبھاں

یوریا سائیکل (کریبز ہینسلائٹ سائیکل)

1932 وچ کریبز یونیورسٹی آف فریبرگ وچ ہک میڈیکل طالب علم کرٹ ہینسلائٹ دے نال یوریا سائیکل دے خاکہ تے کم کیتا ۔ یونیورسٹی آف فریبرگ دے میڈیکل کلینک وچ کم کرݨ دے دوران ، کریبز دی ملاقات کرٹ ہینسلائٹ نال تھئی ، جنہاں دے نال انہاں یوریا بݨاوݨ دے کیمیائی عمل دی تحقیق کیتی ۔ 1904 وچ ݙو جرمناں ، اے کوسل تے ایچ ڈی ڈیکن ، ݙکھایا ہا جو ارجینائن کوں اینزائم ارجینیز ولوں ہائیڈرولائز کر تے اورنیتھین تے غیر نامیاتی رد عمل وچ یوریا بݨایا ونڄ سڳدا ہے ۔ ایں رد عمل دی بنیاد تے ، کریبز تے ہینسلائٹ فرض کیتا جو جاندار خلیات وچ ایں طرحاں دا رد عمل تھی سڳدا اے ، تے اورنیتھین تے سیٹرولین درمیانی رد عمل تھی سڳدے ہن ۔ کریبز ارجینائن دی ترکیب کیتے ممکنہ طریقہ تے کم کرݨا شروع کیتا ۔ اپݨے واربرگ مانومیٹر کوں استعمال کریندے ہوئے ، انہاں جگر دے ہک ٹکڑے کوں خالص اورنیتھین تے سیٹرولین نال ملایا ۔ انہاں ڄاتا جو سیٹرولین امونیا تے کاربن ڈائی آکسائیڈ توں یوریا دے میٹابولک رد عمل وچ ہک اتپریرک دے طور تے کم کریندا ہے ۔ انہاں تے ہینسلائٹ اپݨی دریافت 1932 وچ شائع کیتی ۔ ایں طرحاں یوریا سائیکل (یا "اورنیتھین سائیکل") قائم تھیا ، تے ایہ دریافت تھیوݨ والا پہلا میٹابولک سائیکل ہا ۔

سائٹرک ایسڈ سائیکل (کریبز سائیکل)

یونیورسٹی آف شیفیلڈ وچ کریبز تے ولیم آرتھر جانسن سیلولر ریسپیریشن دی تحقیق کیتی جیندے ذریعے گلوکوز دے ڳلݨ سڑݨ توں توانائی پیدا کرݨ کیتے آکسیجن دی کھپت تھیندی ہے ۔ کریبز پہلے جرمنی وچ واربرگ کوں تجویز ݙتا ہا جݙݨ او کٹھے کم کریندے ہن جو مانومیٹر استعمال کر تے آکسیجن دی کھپت دا پتہ لایا ونڄ سڳدا اے تے گلوکوز میٹابولزم وچ کیمیائی رد عمل دی شناخت کیتی ونڄ سڳدی ہے ۔ واربرگ ایں خیال کوں صاف طور تے مسترد کر ݙتا ہا ۔ شیفیلڈ وچ کریبز ہک ممکنہ کیمیائی رد عمل دی شناخت کرݨ کیتے وݙے زور شور نال کم کیتا تے ٻہوں سارے فرضی رستے گھن تے آیا ۔ مانومیٹر کوں استعمال کریندے ہوئے انہاں انہاں مفروضیاں کوں ہک ہک کر تے جانچیا ۔ سکسینیٹ ، فوماریٹ تے میلیٹ نال جڑیا ہک مفروضہ کارآمد ثابت تھیا کیوں جو انہاں تمام مالیکیولز کبوتر دے سینے دے پٹھے وچ آکسیجن دی کھپت وچ اضافہ کیتا ۔ 1937 وچ جرمن بائیو کیمسٹ فرانز کنوپ تے کارل مارٹینوس سیٹریٹ استعمال کر تے رد عمل دی ہک سیریز ݙکھائی ہئی جیڑھی آکسیلو ایسیٹیٹ پیدا کریندی ہے ۔ کریبز محسوس کیتا جو ایہ مالیکیولز ایں رد عمل کیتے گمشدہ درمیانی چیزاں تھی سڳدے ہن ۔ خلاء کوں پر کرݨ کیتے چار مہینے دے تجرباتی کم دے بعد ، کریبز تے جانسن کیمیائی سائیکل دی ترتیب قائم کرݨ وچ سوبھ وند تھی ڳئے ، جینکوں انہاں "سائٹرک ایسڈ سائیکل" آکھیا ۔ اینکوں "کریبز سائیکل" یا "ٹرائی کاربوکسیلک ایسڈ (TCA) سائیکل" وی آکھیا ویندا ہے ۔

کریبز 10 جون 1937 کوں دریافت دا ہک مختصر مخطوطہ نیچر کوں بھیڄا ۔ 14 جون کوں ، انہاں ایڈیٹر توں ہک مسترد خط ملا ، جیندے وچ آکھیا ڳیا ہا جو جریدے وچ "خط و کتابت دے کالم کوں ست یا اٹھ ہفتے تک بھرݨ کیتے کافی خط موجود ہن" ، تے کریبز کوں "اینکوں کہیں ٻئے رسالے وچ جلد اشاعت کیتے جمع کراوݨ" دی ترغیب ݙتی ڳئی ۔

کریبز فوری طور تے ہک ٻہوں وݙا ورژن تیار کیتا جیدا ناں ہا "جانوراں دے ٹشوز وچ درمیانی میٹابولزم وچ سائٹرک ایسڈ دا کردار" ، جینکوں انہاں ݙو ہفتیاں بعد ڈچ جریدے اینزائمولوجیا کوں بھیڄا تے ݙو مہینیاں وچ شائع تھیا ۔ ایندے بعد مختلف جریدیاں وچ مقالیاں دی ہک سیریز شائع تھئی ۔

گلائیو آکسیلیٹ سائیکل

کریبز اپݨے سائٹرک ایسڈ سائیکل وچ ٻہوں زیادہ تفصیلات شامل کرݨ جاری رکھیا ۔ نویں دریافت انہاں دے کلاسک رد عمل وچ ہک مسئلہ پیدا کیتا ۔ 1957 وچ انہاں Hans Kornberg دے نال مل تے ڄاتا جو اتھاں ٻئے اہم اینزائمز موجود ہن ۔ ہک میلیٹ سنتھیس ہا ، جیڑھا ایسیٹیٹ کوں گلائیو آکسیلیٹ دے نال ملا تے میلیٹ بݨیندا ہا ، تے ݙوجھا آئوسائٹریٹ لائیز ہا ، جیڑھا آئوسائٹریٹ توں کڈھ تے گلائیو آکسیلیٹ مہیا کریندا ہا ۔ ایہ ݙو رد عمل عام سائٹرک ایسڈ سائیکل دی پیروی نہ کریندے ہن ، تے ایں واسطے ایں رستے کوں سائٹرک ایسڈ سائیکل دا گلائیو آکسیلیٹ بائی پاس دا ناں ݙتا ڳیا ، لیکن ہݨ اینکوں گلائیو آکسیلیٹ سائیکل دے ناں نال ڄاݨیا ویندا ہے ۔

آدر تے ایوارڈ

کریبز 1939 وچ برطانوی شہری بݨ ڳئے ۔ او 1954–1967 تک ٹرینیٹی کالج ، آکسفورڈ دے فیلو منتخب تھئے ۔ او 1947 وچ رائل سوسائٹی دے رکن منتخب تھئے ۔ 1953 وچ انہاں کوں "سائٹرک ایسڈ سائیکل دی دریافت" کیتے فزیالوجی یا میڈیسن وچ نوبل انعام ملا ۔ انہاں کوں 1953 وچ بنیادی طبی تحقیق کیتے البرٹ لاسکر ایوارڈ وی ݙتا ڳیا ۔

رائل سوسائٹی انہاں 1954 وچ اپݨا رائل میڈل ، تے 1961 وچ کوپلے میڈل نال نوازیا ۔ او 1957 وچ امریکن اکیڈمی آف آرٹس اینڈ سائنسز دے رکن منتخب تھئے ۔

1958 وچ انہاں نیدرلینڈز سوسائٹی فار فزکس ، میڈیکل سائنس اینڈ سرجری دا گولڈ میڈل ملا ۔ انہاں 1958 وچ نائٹ دا خطاب ݙتا ڳیا تے 1979 وچ گرٹن کالج ، کیمبرج یونیورسٹی دے آنریری فیلو منتخب تھئے ۔ او جنرل مائیکروبیالوجی سوسائٹی دے اصل رکن ہن ، جنہاں انہاں 1980 وچ آنریری رکنیت ݙتی ۔ او امریکن فلاسفیکل سوسائٹی تے یونائیٹڈ سٹیٹس نیشنل اکیڈمی آف سائنسز ݙونہاں دے منتخب رکن وی ہن ۔ انہاں 21 یونیورسٹیاں توں آنریری ڈاکٹریٹ ملی ۔

جولائی 2015 وچ کریبز دا نوبل انعام دا تمغہ £225,000 (تقریباً $351,225) وچ نیلام تھیا ۔ آمدنی سر ہانس کریبز ٹرسٹ قائم کرݨ کیتے استعمال تھئی ، جیڑھا بائیو میڈیکل فیلڈ وچ ڈاکٹریٹ دے طالب علماں کوں فنڈنگ مہیا کریندا اے تے کیمسٹاں دی مدد کریندا اے جنہاں کوں اپݨے آبائی ملکاں توں فرار تھیوݨا پیا ہا ۔

وراثت

یونیورسٹی آف آکسفورڈ وچ ہک عمارت دا ناں ہانس کریبز ٹاور ہا ، جیڑھا شعبہ بائیو کیمسٹری دے زیر قبضہ ہا ۔ 2008 وچ شعبہ بائیو کیمسٹری کیتے ہک نویں عمارت تعمیر کیتی ڳئی ، جیندے تے 20 مئی 2013 کوں ایسوسی ایشن آف یہودی مہاجرین ولوں ہک تختی لڳائی ڳئی ۔ تختی جان ، لارڈ کریبز جاری کیتی ، تے ایندے تے لکھیل عبارت ایہ ہئی:

پروفیسر سر ہانس کریبز FRS 1900 – 1981 بائیو کیمسٹ تے کریبز سائیکل دے دریافت کنندہ نوبل انعام یافتہ 1953 اتھاں 1954 – 1967 تک کم کیتا

آکسفورڈ یونیورسٹی دا شعبہ فزیالوجی ، ایناٹومی تے جینیٹکس سر ہانس کریبز پرائز لیکچر سیریز دی میزبانی کریندا ہے ۔ پچھلے ترائے وصول کنندگان ایہ ہن: جیفری فریڈمین ایم ڈی ، پی ایچ ڈی (2019) پروفیسر سر سٹیفن او'راہیلی ایم ڈی ایف آر ایس ایف میڈسکی (2022) تے 2023 وچ - پروفیسر ڈیم فرانسس ایش کرافٹ ایف آر ایس ایف میڈسکی

یونیورسٹی آف شیفیلڈ وچ کریبز انسٹی ٹیوٹ اے ، جیڑھا 1988 وچ قائم تھیا ہا ۔ ایہ ہک تحقیقی مرکز اے جیڑھا بائیو کیمیائی تحقیق وچ بین الضابطہ پروگراماں کوں گھیریندا ہے ۔

1990 وچ فیڈریشن آف یورپیئن بائیو کیمیکل سوسائٹیز سر ہانس کریبز لیکچر اینڈ میڈل قائم کیتا ، جیڑھا لارڈ رینک سینٹر فار ریسرچ ولوں ݙتا ویندا ہے ۔ ایہ بائیو کیمسٹری تے مالیکیولر بائیولوجی وچ شاندار سوبھاں کیتے ݙتا ویندا ہے ۔

ہینور میڈیکل سکول دے دوستاں دی سوسائٹی سر ہانس کریبز انعام ݙیندی اے ، جیڑھا 10,000 یورو مالیت دا ہے ۔

بائیو کیمیکل سوسائٹی کریبز میموریل سکالرشپ پیش کریندی اے ہک پوسٹ گریجویٹ (پی ایچ ڈی) طالب علم کیتے جیڑھا کہیں برطانوی یونیورسٹی وچ بائیو کیمسٹری یا کہیں اتحادی بائیو میڈیکل سائنس وچ کم کریندا ہے ۔ 2014 تک ، سکالرشپ £18,500 مالیت دا اے تے ہک سال کیتے ݙتا ویندا اے ، لیکن ترائے سال تک ودھایا ونڄ سڳدا ہے ۔