ہارٹمٹ مائیکل

ہارٹمٹ مائیکل

ہارٹمٹ مائیکل (ڄم 18 جولائی 1948) ہک جرمن بائیو کیمیا دان ہن ، جنہاں کوں 1988 وچ انٹیگرل میمبرین پروٹین ، پروٹین تے کو فیکٹرز دے میمبرین باؤنڈ کمپلیکس دے پہلے کرسٹل ڈھانچے دا تعین کرݨ کیتے کیمسٹری دا نوبل انعام ݙتا ڳیا جیڑھا کہ فوٹو سنتھیسس کیتے ضروری ہے ۔

تعلیم تے ابتدائی زندگی

او 18 جولائی 1948 کوں لوڈوگزبرگ وچ ڄمے ہن ۔ لازمی فوجی خدمت دے بعد ، انہاں ٹیوبنگن یونیورسٹی وچ بائیو کیمسٹری دی تعلیم حاصل کیتی ، اپݨے چھیکڑی سال ڈیٹر اوسٹرہیلٹ دی لیبارٹری وچ ہالوبیکٹیریا دی اے ٹی پیز سرگرمی تے کم کریندے ہوئے گزاریا ۔

سائنسی پرکھ پرچول

ہارٹمٹ بعد وچ میمبرین پروٹینز دے کرسٹلائزیشن تے کم کریندے ہن - جیڑھا کہ ایکس رے کرسٹالوگرافی ولوں انہاں دے ڈھانچے کوں واضح کرݨ کیتے ضروری ہے ۔ انہاں جوہان ڈائسن ہوفر تے رابرٹ ہوبر دے نال مشترکہ طور تے 1988 وچ نوبل انعام حاصل کیتا ۔ مائیکل تے ہوبر دے نال مل تے ، ڈائسن ہوفر ہک پروٹین کمپلیکس دا ترائے جہتی ڈھانچہ متعین کیتا جیڑھا کہ کجھ فوٹو سنتھیٹک بیکٹیریا وچ پاتا ویندا ہے ۔ ایں میمبرین پروٹین کمپلیکس کوں فوٹو سنتھیٹک رد عمل مرکز آکھیا ویندا ہا ، جیڑھا کہ فوٹو سنتھیسس دی ہک سادہ قسم شروع کرݨ وچ اہم کردار ادا کریندا ہا ۔ 1982 تے 1985 دے درمیان ، ترائے سائنسداناں ایکس رے کرسٹالوگرافی دا استعمال کریندے ہوئے 10,000 توں ودھ ایٹم دی صحیح ترتیب دا تعین کیتا جیڑھے کہ پروٹین کمپلیکس بݨیندے ہن ۔ انہاں دی تحقیق فوٹو سنتھیسس دے میکانزم دی عام سمجھ وچ ودھارا کیتا ، پودیاں تے بیکٹیریا دے فوٹو سنتھیٹک عمل وچ مشابہت ظاہر کیتی تے میمبرین پروٹینز کوں کرسٹلائز کرݨ کیتے ہک طریقہ کار قائم کیتا ۔

1987 توں او فرینکفرٹ ایم مین ، جرمنی وچ میکس پلانک انسٹیٹیوٹ فار بائیو فزکس وچ مالیکیولر میمبرین بائیولوجی ڈیپارٹمنٹ دے ڈائریکٹر تے گوئٹے یونیورسٹی فرینکفرٹ وچ بائیو کیمسٹری دے پروفیسر ہن ۔