ہارون بن موسیٰ ملتانی

سب توں پہلے اساں ملتان دے ہک وݙے دینی شاعر ہارون بن موسیٰ ملتانی دا تذکرہ کریندوں۔ ہندوستان دے عظیم عربی شعراء دا تذکرہ کریندیں ہوئیں ڈاکٹر حامد علی خان آہدن ’’میݙی نظر وچ ہندوستان دا سب توں پہلا بلند پایہ عربی شاعر ہارون بن موسیٰ ملتانی ہے جا حظ اونکوں ملتان تے اوندے گردونواح دا سب توں وݙا شاعر قرار ݙتے۔ اوندے قصائد تے مختلف عربی اشعارجاحظ نے ’’کتاب کیواں‘‘وچ نقل کیتن۔(26)۔ میرحسان الحیدری تاریخ سندھ دے مصنف مولانا ابوظفر ندوی دے حوالے نال آہدن کہ تمام مورخین دا ایں ڳالھ تے اتفاق ہے کہ ہارون بن موسیٰ ملتانی عربی دے علاوہ مقامی ملتانی زبان وچ وی شعر آہدا ہئی اورمقامی ٻولی دے اشعار بزم توں زیادہ رزم نال تعلق رکھدے ہن۔(27)ایں لحاظ نال ہارون بن موسیٰ ملتانی ستویں صدی عیسوی دا پہلا سرائیکی شاعر اے۔

حوالے

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان

سندھی تے سرائیکی ہک بئے توں کݙݨ نکھڑن ایں بارے کُجھ نی آکھیاں ونڄ سڳدا۔ہا ھک ڳالھ مُکّی مکائی اے جو جے تونّڑیں سرائیکی دا تعلق اے ۔سندھی توں بہوں ڈھیر پرانّڑیں اے بلکہ سندھ دی کلاسیکل زبان سرائیکی ھی ہئی ۔میر حسان الحیدری موجب " خیال اے جو موجودہ سندھی 1100ء دے نیڑے سرائیکی توں الڳ ھک مستقل زبان بݨ ڳئی ۔اہں کیتے جو سندھی دے پُراݨیاں لکھتاں سرائیکی نال بہوں سارا رلاَّ کھاندِن " ابو ظفر ندوی نے تاریخِ سندھ عربی شاعر ہارون بن موسیٰ ملتانی دا ذکر کیتے جیڑھا ڈوجھی ہجری صدی دا ہندوستان دا سبھ توں وݙا شانا عربی شاعر ھا تے نال دے نال ملتانی زبان دا وی قادرالکلام شاعر ہا ڈاکدر حامد خان حامد آپڑیں مضمون " ہندوستان کے عربی شعراء " وچ ہارون بن موسیٰ ملتانی کوں عربی دے نال نال ستویں صدی ہجری دا اعظیم مذہبی سرائیکی شاعر آکھئے ۔(سرائیکی آدب ۔ریت تے روایت ۔۔۔۔۔۔31-32