ڳڑ تے کھنڈ دا تلاوڑا

ڳڑ تے چینی دا تلاوڑہ

ڳڑ تے چینی ݙوہیں ڳنے دے راؤھ نال بݨدن۔ پر ڳڑ تے چینی دے انسانی صحت تے پووݨ والے اثرات وچ زمین اسمان دا فرق ہے۔ ڳڑ یا چینی دے استعمال دا فیصلہ کرݨ کنوں پہلے ڳڑ تے چینی دی کیمیکل کمپوزیشن دا تلاوڑہ کرݨ ضروری ہے۔  

جے ڳڑ بݨاوݨ دے عمل وچ ݙنگ فریب نہ ہووے تاں ڳڑ دے وچ ہیٹھ درج کݨ موجود ہوندن:

1۔ سکروز: 50 توں 70 فیصد

2۔ فروکٹوز تے گلوکوز: 10 توں 20 فیصد

3۔ پاݨی: 5 توں 15 فیصد

4. منرلز:

(آئرن ، میگنیشیم ، پوٹاشیم ، کیلشیم ، فاسفورس)

5. وٹامنز:

( وٹامن B1 (تھیامین)، وٹامن B2 (ریبوفلاوین)، وٹامن B3 (نیاسین))

6. فائبر: 2 توں 5 فیصد

7. اینٹی آکسیڈنٹس (Antioxidants): فینولک کمپاؤنڈز تے فلیوونائڈز

ڳڑ دے مقابلے وچ اگر چینی کوں ݙٹھا ونڄے تاں چینی دے وچ ہیٹھ درج کݨ موجود ہوندن۔

1۔ سکروز: 99 فیصد

2۔ پاݨی: 0.5 فیصد کنوں گھٹ

3۔ منرلز: نہ ہووݨ دے مٹ (ریفائننگ دے دوران ختم تھی ویندن)

4۔ وٹامنز: بالکل کائنی ہوندے

5۔ فائبر: بالکل کائنی ہوندے

ڳڑ دے صحت تے مثبت اثرات ہیٹھ درج ہن

1. توانائی دا وݙا ذریعہ: ڳڑ وچ موجود گلوکوز تے فروکٹوز ٹھک پھک توانائی ݙیندے ہن۔  

2. آئرن دی تھوڑھ (انیمیا) کنوں بچاؤ: ڳڑ وچ موجود آئرن خون دی کمی کوں دور کرݨ وچ مدد کریندا ہے۔  

3. ہاضمے کیتے فائدے وند: ڳڑ ہاضمے کوں بہتر بݨاوݨ تے قبض کنوں نجات ݙیوݨ وچ مدد کریندا ہے۔  

4. جگر دی صفائی: ڳڑ جگر کوں صاف کرݨ تے زہریلے مادے خارج کرݨ وچ ٻانہہ ٻیل تھیندا ہے۔  

5. سردی تے کھنگھ وچ فائدے وند: گرم پاݨی نال ڳڑ دا استعمال سردی تے کھنگھ وچ آرام ݙیندا ہے۔  

6. اینٹی آکسیڈنٹ وسب: ڳڑ وچ موجود اینٹی آکسیڈنٹس جسم کوں فری ریڈیکلز دے نقصان کنوں بچیندے ہن۔  

جݙاں جو چینی دے وچ موجود کݨ دی وجہ توں چینی دے خینسی اثرات ٻہوں زیادہ ہوندن۔

ایں سانگوں آپݨی تے آپݨے ٹٻر دی سکھی صحت واسطے ڳڑ دے استعمال کوں ودھاوݨ تے چینی دے استعمال کوں گھٹاوݨ ویلھے دا سݙ ہے۔ ڳنے دی راہکی کرݨ والے بھرانویں کوں ارداس ہے جو اپݨے کماد دی فصل کوں شوگر ملیں دے مالکاں دے منافع وچ ودھارے دے بجائے انسانی مفاد کوں سوچیندے ہوئیں آپݨے ویلݨے لا تے ڳڑ بݨاوݨ آلے پاسے توجہ کرن تے انسانیں کوں چینی دے عذاب کنوں جان چھڑواوݨ وچ ٻانہہ ٻیل تھیون ۔۔۔