ڳبھرو دے نال ݙوجھے ݙینھ دی تصویر
"گھبرو دے نال ڈوجھے ڈینھ دی تصویر"
وَلّے دا منجھے ڈھو ڈھو کے تِرکل وی ڈُکھنڑ لگ پئی اے. کہیں ویلے ہک بولے تے کہیں ویلے ڈوجھے بوہے تے کتھاؤں منجھا، کتھاؤں بسترا، کتھاؤں وہانڑاں چا چا کے تُرٹ پئے ہاں اُتوں نانواں آلا مسئلہ.. ہر شئے تے وکھرا وکھرا ناں لکھڑاں پوندئے نتاں کہیں دی ہک شئے اُتے تَلے تھی ونجیں تاں گل چھینویں نماز آ ویندی اے. مثلاً اج اساں چاچے "صالو" دے بوہے تے ہتھ مارئے تاں انہاں دی گھر آلے ماسی "بھری" پُچھیائے کونڑ ایں؟ اکرام ملویر آکھیائے "میں ظہیر احمد ہاں لُکار آلا" بس ماسی "بھری "دے بوہا کھولنڑ دی دیر ہئی تے شروع نی تھی گئی..............اوئے " تساں وت میڈے بھانڑ تے آ تَرُٹے ہاؤ؟ ناں اے جو ہَرّے ویلے تہاڈیاں شادیاں ہن اساں تہاڈے بَرسَر آ سکدے ہاں؟ پروفیسُر دی شادی تے تساں منجھا تروڑ کے مُتا ہے. ثمر دی شادی تے میڈا ڈاجھ آلا پُھلاں آلا وہانڑاں پھٹا سٹا نے، کوثر عباس دی شادی تے بسترا ڈتم او نی ولیا اُتوں وت آ گئے ہاؤ کھلوو سئی میں ڈیندی آں تہاکوں بسترے منجھےبس ماسی بھری اندروں کُڈھڑیں چا گھدی تے اساں آپڑاں منھ کر گئے ہاں. اے سارا حُسن ساڈے وسبے دا ہے جتھے نکیاں نکیاں لڑائیاں ہوندین تے آپے منیوے تھیندن جتھے لوک ولے لڑدئے تاں راتیں کٹھے بیٹھے ہوندن انا تے وڈیائی ناں دی کہیں شئے دا وجوو وی کوئی نی مثلاً اساں گھر پہنچے ہاں تاں پچھوں چاچے صالو دا پُتر منجھا بسترا ساڈے گھر گھن آیائے نال چاچی بھری دا سنہیا وی جو ہنڑ میڈی کوئی شئے پھٹی تاں خیر کوئی نی تہاڈی. میکوں یقین ایں جو ماسی "بھری" اج رات سب توں پہلے سہراں تے آسی دیگڑی ڈُدھ دی وی گھن آسی، سب توں زیادہ ٹپے وی اوہو گاہسی نال ساکوں چاہ وی پکا ڈیسی. سارے ڈینھ دے تھکیڑے توں بعد ساکوں اجازت ملی ہے جو اساں وی منھ انگھال اَواں لہٰذا اساں وی ٹنم ٹیٹ تھی کے نکاح کنڑ نکل پئے ہاں. چھیر آلا گھر وی ساڈا آپڑاں ہیں پچھوں نال آلی گلی وچ او وی ساڈے چاچے دا گھر اے. نکاح واسطے پہنچے ہاں تاں چھوراں رولا پا ڈتائے ہک آھدا ہئی بھرجائی دا "دَم بھرا" میں بنڑساں ڈوجھا آھدا ہئی میں بنڑساں میں ساراں کوں پاسے تے گھن گیاں تے انہاں کوں سمجھایم جو اے ہک ذمہ داری ہوندی ہے تے اساں سارے ہالیں چھوٹے ہاں. پہلے وی پروفیسر سیف اللہ سیفی نراض ہن جو انہاں کوں سبالا نسے بنڑایا لہذا دم بھرا پروفیسر صاحب ای ہوسن تے ڈُھکدے وی اوہا ہن.
محمدظہیراحمد مہاروی (٢٥ نومبر ٢٠١٦ء)