گھڑولی
گھڑولی سرائیکی تے سندھی شاعری دی ہک قدیم صنفِ سخن ہے۔ اے زیادہ تر سی حرفی دے انداز وچ لکھی ویندی ہے ۔ ایں صنف کوں گھڑولی یا گھڑولی لعل دے ناں نال لوک شاعری وچ ٻہوں ورتیا ڳے۔ سب توں پہلی گھڑولی اساکوں حضرت سچل سرمستؒ سئیں دی ملدی ہے۔
سوہݨے یار دی گھڑولی بھردی
ماہی یار دی گھڑولی بھردی
ہک اللہ کنوں میں ݙردی
ہک مولا کنوں میں ݙردی
آہا ہا سوہݨے یار دی گھڑولی
پیر پیراں حضرت میراں
نام گھندیں جے ٹٹیاں زنجیراں
حسنؓ حسینؓ علیؓ دا ڄایا
بار اُمت دا سر تے چایا
میں ٻانھی شاہ حیدر دی
سوہݨے یار دی گھڑولی بھردی
نوحؑ نبی دی ٻیڑی آئی
جیں وچ چڑھیا نور خدائی
میں صدق تہیں تے چڑھدی
ماہی یار دی گھڑولی بھردی
سچل سارا نور الٰہی
علی ولی دی ہے ہمراہی
میں ہر دم رب رب کردی
ماہی یار دی گھڑولی بھردی
حضرت سچل سرمستؒ سئیں دے بعد ہک ٻئے بزرگ شاعر ہمت علی شاہ رضوی 1840)ء1890ء) گھڑولی نامہ لکھیے۔ نمونے دے ݙوں بند:
الف اللہ ہے صاحب ستاری
صدقے نبی توں جان پیاری
علیؓ ولی تے ہے لاج ہماری
گولی ہاں میں تنہیں در دی
وو مولیٰ گھڑولی بھردی ‘ آہیاں میں تاں گھڑولی
ب بتول پیغمبر زادی
پاک دامن ہے سا شہزادی
یطھِمُرکم ہے صاحب ردا دی
توہ تہنیدی میں تردی
وو مولیٰ گھڑولی بھردی آہیاں میں تاں گھڑولی
ہک ٻئی طویل نعتیہ گھڑولی مدتاں توںمتواتر سرائیکی زبان اِچ چھپدی پئی اے۔ ایندے شاعر دا صحیح پتہ کینی۔ البتہ ایندے نال ڳنڈھوڑ مولود دے شاعر خلیفہ محمد مجاور ہن۔ ایں گھڑولی دی زبان تے طرزِ بیان قدیم شاعری والا ہے:
الف اللہ سرجن ہارا جی
باغ لایُس سارا جی
ظاہر کیتُس کل پسارا جی
گھڑولی لعل
ح حوراں پریاں شادی ڳاوݨ جی
شان نبی توں گھول گھماون جی
بھلا مولا ملک وسایا
گھڑولی لعل
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان